Cit atir i jami ma tye

Cit atir ka ma nyuto lok ma tye iye

Nipo Notowa Kacel ki Yomcwiny

Nipo Notowa Kacel ki Yomcwiny

‘Bedo ber ki me yomcwiny ka kibedo kacel ki mer!’​—JABULI 133:1

WER: 149, 99

1, 2. Yub ango ma binotowa kacel i yo ma kite dok pat i mwaka-ni, ki dok pingo? (Nen cal ma tye i pot karatac man.)

I NINO dwe 31, Marci 2018, dano milion mapol ki twok lobo-ni gibicito i gure mo ma bedo kicel mwaka ki mwaka. I nge poto ceng, Lucaden pa Jehovah ki jo mukene mapol gibigure kacel me po pi ginkok pa Yecu piwa. Mwaka ki mwaka, Nipo me to pa Kricito noto dano i yo me aura loyo kit yub mo keken.

2 Jehovah gin ki Yecu cwinygi bedo yom adada ka gineno dano milion mapol gicito i gure man i but lobo ducu i nino meno. Baibul tittiwa ni tye “lwak dano mapol ata, ma ngat mo pe romo kwano welgi, ma gua ki i rok ducu, ki i kaka ducu, ki dano ducu me wi lobo, ki leb ducu,” ma gidange ni: “Laro dano tye bot Lubangawa ma obedo i wi komker, ki bot Latin romo!” (Niyabo 7:9, 10) Tye me yomcwiny adada ni mwaka ki mwaka dano mapol gibedo  tye i nipo me nyuto pwoc bot Jehovah ki Yecu pi jami mabeco ma gutimo!

3. Pwony man bigamo lapeny mene?

3 I pwony man ibinongo lagam i kom lapeny angwen magi: (1) Atwero yubbe pi Nipo nining, wek anong adwogi maber? (2) Nipo konyo jo pa Lubanga nining me note kacel? (3) Atwero timo ngo wek note obed i kin jo pa Lubanga? (4) Tika Nipo me agikki bibedo tye? Ka tye, ci bibedo awene?

ATWERO YUBBE PI NIPO NINING, WEK ANONG ADWOGI MABER KI IYE?

4. Pingo pire tek ni wabed tye i Nipo?

Jehovah gin ki Yecu gineno tute pa ngat acel acel me bedo tye i Nipo

4 Pingo pire tek ni wabed tye i Nipo? Me acel, bedo tye i cokke obedo but yubwa me woro Jehovah. Watwero bedo ki tekcwiny ni Jehovah gin ki Yecu cwinygi bibedo yom matek ka gineno wan ki acel acel, watute me bedo i yub man ma pire tek loyo i mwaka-ni. Wamito ni Jehovah gin ki Yecu gunen ni watye i Nipo nikwanyo ka pe twere kulu me bedo tye iye. Ka ngo ma watimo nyuto ni cokkewa pire tek, ci man miyo Jehovah tyen lok mukene me gwoko nyingwa i “buk me po” i kom jo ma giwore. Buk man bene kilwongo ni “buk me kwo.” Buk man tye ki nying jo ducu ma Jehovah mito miyogi kwo ma pe tum.​—Malaki 3:16; Niyabo 20:15.

5. Itwero ‘ngine kekeni wek inen ka ce icung matek i niyeni’ nining i cabit mogo manok ma peya nino me Nipo oo?

5 I cabit mogo manok ma peya nino me Nipo oo, watwero tero cawa malac i lega ki tam matut i kom kit ma watwa ki Jehovah tek kwede. (Kwan 2 Jo Korint 13:5.) Lakwena Paulo otito ki Lukricitayo ni: “Kong wungine kekenwu, wek wunen ka ce wucung matek i niyewu.” Watwero timo meno nining? Watero penye kekenwa ni: ‘Tika amoko ni man aye dul ma Jehovah oyero me tiyo ticce? Tika atye ka tute ki tekona ducu me tito kwena ki pwonyo jo mukene ki kwena maber-ri? Tika kwona ki jami ma atimo nyuto ni aye ni watye ka kwo i kare me agikki dok ni agikki me lobo pa Catan-ni cok o? Tika ageno Jehovah gin ki Yecu kit macon, calo i kare ma pud acako tic pigi acaka?’ (Matayo 24:14; 2 Temceo 3:1; Jo Ibru 3:14) Tam i kom lagam pi lapeny magi twero konywa me bedo ka ‘ngine kenwa’ ka ce watye ma wacung matek.

6. (a) Yo mene ma watwero nongo kwede kwo ma pe tum? (b) Laelda mo yubbe pi Nipo nining mwaka ki mwaka, dok in bene itwero lubo lanenne nining?

6 Yo acel ma itwero yubbe kwede pi Nipo aye me kwan ki tam matut i kom pwony mogo ma loko i kom kit ma yub man pire tek kwede. (Kwan Jon 3:16; 17:3.) Yo acel keken ma watwero nongo kwede kwo ma pe tum aye me ngeyo Jehovah, ki bedo ki niye matek i kom Wode, Yecu. Me yubbe pi Nipo  watwero yero me kwano pwony ma weko wanyikke cok botgi. Man aye gin ma omego mo ma dong obedo laelda pi kare malac timo. Pi mwaki mapol, en obedo ka coko Wi Lubele ma tye ki pwony ma giloko i kom Nipo ki kit ma Jehovah kacel ki Yecu gunyuto kwede mar botwa. I cabit mogo manok ma peya nino me Nipo oo en kwano pwony magi dok tamo matut pingo yub man pire tek tutwal. I kare mogo en medo pwony mukene i kom ma tye. En bene kwano dok lwodo lok matut i kom wang Baibul ma kiketo me akwana i kare me Nipo. Laelda man owacci ka etimo jami magi ducu, ci epwonyo jami manyen mwaka ki mwaka. Madong pire tek loyo, kwanne meno weko en dongo marre i kom Jehovah gin ki Yecu. In bene ka ikwano kit meno, ci marri pi Jehovah gin ki Yecu bidongo medde ameda. Man bidongo pwocci pi gin ma gutimo piri dok ibinongo adwogi maber ki i Nipo.

NIPO KONYOWA ME NOTE KACEL

7. (a) Gin ango ma Yecu olego pire i dyewor ma kicamo iye Cam me Otyeno pa Rwot pi tyen mukwongo? (b) Ngo ma nyuto ni Jehovah ogamo lega pa Yecu?

7 I dyewor ma kicamo iye Cam me Otyeno pa Rwot pi tyen mukwongo, Yecu olego lega mo ma pire tek. En olego i kom wat macok ma en ki wonne gitye kwede. Yecu bene olego ni lupwonnyene gubed ma gunote kacel calo en ki wonne. (Kwan Jon 17:20, 21.) Ki lok ada Jehovah ogamo lega pa Wode me amara-ni. Pe tye cokke mo mukene ma moko ni Lucaden pa Jehovah gitye ma gunote kacel ma loyo Nipo. I nino meno, jo milion mapol ma gia ki i lobe patpat ma rangi del komgi patpat gicokke kacel i twok lobo ducu me nyuto ni giye ni Jehovah ocwalo Wode. I kabedo mukene, dano pe gungi neno ka dano me rok mapatpat gicokke kacel ka lega, dok bene ka gucokke ci gineno calo pe opore. Ento Jehovah gin ki Yecu pe gineno kit meno. Gineno gurewa kacel i Nipo calo gin mamwonya adada.

8. Kwena mene ma Jehovah omiyo ki Ejekiel?

8 Macalo jo pa Jehovah, notewa pe tye me ur botwa. Jehovah otito con pi note meno i lok ma en owaco bot Ejekiel. En otito bot Ejekiel ni okwany odoo aryo, acel “pi Juda” ki mukene “pi Yucepu” ci orib odoo aryo-ni wek odok odoo acel. (Kwan Ejekiel 37:15-17.) I “Lapeny pa Lukwan Bukkewa” ma okati i Watchtower me Julai 2016 otito ni: “Jehovah otiyo ki lanebine Ejekiel me tito ni jone bidwogo cen i Lobo ma Kiciko Pire ci gibinote odoco calo rok acel. Lok pa lanebi meno onongo tye ka tito bene ni jo ma giworo Jehovah i kare me agikki gibinote kacel.”

9. Mwaka ducu ka watye i Nipo, waneno note pa gurup aryo ma kitito i lok pa lanebi Ejekiel nining?

9 I acakki me 1919, Jehovah ocako yub me guru ki noto jo ma kiwirogi kacel. Gin onongo gitye calo odoo “pi Juda.” Ci dano mapol ma gitye ki gen me kwo i lobo man matwal gucako ribbe kacel ki jo ma kiwirogi. Jo ma tye ki gen me kwo i lobo man matwal  gitye calo odoo “pi Yucepu.” Jehovah ocike me ribo kacel odoo aryo magi wek ‘gudok odoo acel’ i cinge. (Ejekiel 37:19) En oweko jo ma kiwirogi kacel ki “romi mukene” gudoko “lwak acel.” (Jon 10:16; Jekaria 8:23) I kare-ni, gurup aryo magi gitye ka tic pi Jehovah ma guribbe kacel. Ki bene gitye ki kabaka acel, Yecu Kricito, ma kilwongo i lok pa lanebi Ejekiel ni “laticca Daudi.” (Ejekiel 37:24, 25) Mwaka ducu ka watye i Nipo me to pa Yecu, waneno note pa gurup aryo magi kit ma Ejekiel otito kwede. Ento gin ango ma wan ducu watwero timone wek note obed tye i kinwa?

GIN ANGO MA WAN DUCU WATWERO TIMONE WEK WABED MA WANOTE?

10. Gin ango ma watwero timone wek jo pa Lubanga gubed ma gunote?

10 Gin ango ma watwero timone wek note obed tye i kin jo pa Lubanga? Me acel omyero watute matek me dongo cwiny me mwolo. I kare ma Yecu tye i lobo, en owaco bot lupwonnyene ni myero gubed jo mamwol. (Matayo 23:12) Pol pa dano me lobo man ginene calo pigi tek loyo jo mukene. Ka wamwol, wabiworo omegiwa ma gitye ki mot me tic i kacokke ki dok wawinyo lokgi. Ka watimo meno ci jo me kacokke gibibedo ma gunote kacel. Ma dong  pire tek loyo, ka wabedo jo mamwol ci biyomo cwiny Jehovah pien en “pyem ki [nyo dag] jo ma wakke ento miyo kica bot jo mamwol.”​—1 Petero 5:5.

11. Tam matut i kom mugati ki vino ma kitiyo kwede i Nipo twero notowa nining?

11 Gin ango mukene ma watwero timone wek note obed tye i kin jo pa Lubanga? Tam matut i kom gin ma mugati ki vino gicung pire. Omyero watim meno ma Nipo pudi, tutwalle i otyeno ma Nipo pudi. (1 Jo Korint 11:23-25) Mugati ma tobi pe iye cung pi kom Yecu ma roc pe iye ma en omiyo calo gitum. Vino makwar-ri cung pi remone. Ento myero pe wange pwony magi keken. Omyero wiwa opo ni ginkok pa Yecu tye lanyut me mar pa Jehovah gin ki Yecu. Jehovah omiyo Wode piwa, ki dok bene Yecu oye pire kene me miyo kwone piwa. Ka watamo kit ma gimarowa kwede, man biweko wamarogi bene. Dok mar ma wan ducu watye kwede pi Jehovah bijingo wat i kinwa.

Ka watimo jo mukene kica, ci man weko wabedo ma wanote (Nen paragraf 12, 13)

12. I lokke i kom kabaka gin ki luticce, Yecu otitiwa nining ni Jehovah mito ni watim kica ki jo mukene?

12 Yo me adek mene ma watwero bedo ma wanote i kinwa? Ka watimo jo mukene kica ki cwinywa ducu. Ka watimo meno, ci wanyuto ni watye ki pwoc pien Jehovah twero timo botwa kica i kom balwa pi ginkok pa Yecu. Me nyuto kit ma timo kica pire tek kwede, Yecu omiyo lapor mo i kom Kabaka mo ki luticce. Tim ber kong ikwan Matayo 18:23-34 ci ipenye kekeni ni: ‘Tika atye ki miti me timo jami ma Yecu opwonyogi? Tika adiyo cwinya dok anyuto niango i kom utmegina? Tika atye atera me timo kica bot jo ma gucwero cwinya?’ Ada, tye ni bal mogo rac kato mukene. Macalo adwogi me roc ma watye kwede, twero bedo tek adada me timo kica pi bal mogo. Ento lok ma Yecu owaco-ni pwonyowa ki gin ma Jehovah mito ni watim. (Kwan Matayo 18:35.) Yecu otito ka maleng ni ka pe watimo ki utmegiwa kica ka gungut ki cwinygi ducu, ci Jehovah bene pe bitimowa kica. Meno obedo gin ma myero wan ducu watam iye matek. Me gwoko note mamwonya ma watye kwede, omyero watim bot utmegiwa kica kit ma Yecu opwonyowa kwede.

13. Wanote nining ka wabedo ki kuc ki jo mukene?

13 Ka watimo kica ki jo mukene, ci wabigwoko kuc i kin omegiwa ki lumegiwa. Lakwena Paulo otito ni omyero waket tek wek wabed ki kuc dok wanote i kinwa. (Jo Epeco 4:3) I kare me Nipo, tutwalle i dyewor me Nipo omyero itam matut i kom kit ma itero kwede jo mukene. Penye kekeni ni: ‘Tika jo mukene neno ni pe abedo ki kiniga i kom jo ma gubalo bota? Tika jo mukene neno ni atute matek me kelo ki gwoko kuc? Magi gubedo lapeny ma pigi tek ma myero watam iye.

14. Watwero nyutone nining ni ‘wadiyo cwinywa i kom luwotwa ki mar’?

14 Yo me angwen mene ma watwero bedo ma wanote i kinwa? Lubo lanen pa Jehovah i nyuto mar. (1 Jon 4:8) Pe myero wawac ni “Atwero bedo ki kuc ki utmegina ento pe mitte ni abed ki wat  macok kwedgi.” Ka watamo kit meno, ci nongo pe watye ka lubo tira pa Paulo ma owaco ni ‘wudi cwinywu i kom luwotwu ki mar.” (Jo Epeco 4:2) Paulo pe owacci omyero ‘wadi cwinywa i kom luwotwa’ keken ento omyero wadi cwinywa ‘ki mar.’ Apokapoka tye iye. Watye ki dano ma patpat i kacokke, dok Jehovah aye ma onyikogi cok bote. (Jon 6:44) Pi meno en tye ki tyen lok matir me marogi. Ka omegiwa ki lumegiwa gupore me nongo mar pa Lubanga, pingo dok watwero wacone ni pe gupore me nongo marwa? Omyero wamargi kit ma Jehovah mito.​—1 Jon 4:20, 21.

NIPO ME AGIKKI BIBEDO AWENE?

15. Wangeyo nining ni Nipo me agikki bibedo tye?

15 I nino mo acel, wabibedo i Nipo me agikki. Wangeyo man nining? Paulo owaco bot Lukricitayo ma kiwirogi ni ka gipo pi to pa Yecu mwaka ki mwaka, nongo ‘gitye ka yweko nyo tito pi lok me to pa Rwot, nio ka en bidwogo.’ (1 Jo Korint 11:26) Yecu bene oloko i kom ‘dwogone’ i kare ma en tye ka lok i kom kare me agikki piny. I kare ma en oloko i kom twon can madit atika macok bino-ni en owaci: ‘Gin ma nyuto Wod pa dano binen i polo. Ci i kare meno kaka ducu ma i wi lobo bikumo, ci gibineno Wod pa dano ka bino ki i wi pol me polo, ki twero madwong, ki deyo madit. En bioro lumalaika ki tum ma kok malongo, gibicoko jone ma en oyero ki i twok piny angwen ducu, nia ki i agikki polo tungcel nio kwede wa i agikkine mukene.’ (Matayo 24:29-31) Yecu ‘bicoko jone ma en oyero’ i kare ma en bidwogo me tero Lukricitayo ma kiwirogi ma pud gitye i lobo i polo. Man bitimme ma twon can madit atika dong ocake woko ento nongo Armagedon pudi. I lweny meno, Yecu gin ki jo 144,000, gibilweny i kom luker me lobo man ci giloyo lweny meno. (Niyabo 17:12-14) Nipo ma wabibedo iye me agikki ma Yecu pud peya ‘odwogo’ ka gamo jone ma kiwirogi bibedo Nipo me agikki.

16. Pingo imoko tammi me bedo tye i Nipo i mwaka-ni?

16 Mok tammi me bedo tye i Nipo i nino dwe 31 Marci, 2018. Leg bot Jehovah wek okonyi me tiyo jami ducu ma mitte wek wan ducu calo jone wanote kacel. (Kwan Jabuli 133:1.) I nino mo acel, wabicito i Nipo tyen me agikki. Ka wakuro nino meno, wamedde ki nyuto ni note ma wabedo kwede i Nipo mwaka ki mwaka pire tek botwa.