Cit atir i jami ma tye

Cit atir ka ma nyuto lok ma tye iye

Pingo Omyero Wami Bot Ngat ma Tye ki Jami Ducu?

Pingo Omyero Wami Bot Ngat ma Tye ki Jami Ducu?

“Wan dong wapwoyi, in Lubangawa, kun wapako nyingi me deyo matek.”​—1 TEKWARO 29:13.

WER: 95, 58

1, 2. Ngo ma Jehovah otimo piwa me nyutone ni cinge yot?

JEHOVAH obedo Lubanga ma cinge yot. Jami ducu ma watye kwede a ki bote. En aye won jami mamwonya ducu ma tye i lobo, dok en tiyo kwedgi wek kwowa obed yot. (Jabuli 104:13-15; Aggai 2:8) Wapwonyo ki i Baibul ni i kine mogo Jehovah otiyo ki jami mamwonya magi i yo me tango wek emi jami ma mitte bot jone.

2 Me labolle, Jehovah omiyo manna ki pii bot rok me Icrael i kare ma gubedo i dye tim pi mwaki 40. (Nia 16:35) Macalo adwogine, gin onongo gitye ki jami ducu ma mitte pigi. (Nekemia 9:20, 21) Lacen, Jehovah omiyo teko bot Lanebi Elica wek omed moo pa dato mo ma lagen. Mic man ma Lubanga omine-ni, okonye me culo banyane dok bene odong ki cente muromo wek en gin ki awobene gumedde ki kwo. (2 Luker 4:1-7) Dok ki kony pa Jehovah, Yecu omiyo cam ki cente i yo me tango i kare ma onongo mitte.​—Matayo 15:35-38; 17:27.

3. Ngo ma wabinyamo i pwony man?

 3 Jehovah twero tic ki gin mo keken ma iye mito wek ekony cwecce. Kadi bed kumeno, en kwayo luticce ni gumi gin mo keken ma gin gitwero me tyelo kor tic ma dulle timo. (Nia 36:3-7; kwan Carolok 3:9.) Pingo Jehovah mito ni wamine lonyo ma watye kwede? Lutic pa Lubanga i kare macon gutyelo kor ticce nining? Dul pa Jehovah tiyo ki cente ma dano gimiyo i kare-ni nining? Pwony man bigamo lapeny magi.

PINGO WAMIYO JAMI MA WATYE KWEDE BOT JEHOVAH?

4. Ngo ma wanyuto ki Jehovah ka watyelo kor ticce?

Wamiyo jami ma watye kwede bot Jehovah pien wamarre

4 Wamiyo jami ma watye kwede bot Jehovah pien wamarre dok watye ki pwoc i kome. Ka watamo i kom jami ducu ma Jehovah otimo piwa, ci man gudo cwinywa adada. Kabaka Daudi bene owinyo kit meno i kare ma onongo tye ka tito pi jami ma mitte me gero ot pa Lubanga. Daudi owaco ni jami ducu ma watye kwede a ki bot Jehovah dok ni gin mo keken ma wamiyo bot Jehovah nongo watye ka mine gin ma en kong ominiwa con.​—Kwan 1 Tekwaro 29:11-14.

5. Baibul pwonyowa nining ni miyo jami ma watye kwede ki cwinywa ducu bot Jehovah obedo but worowa ma pire tek adada?

5 Wamiyo jami ma watye kwede bot Jehovah pien meno obedo yo me worowa. I ginanyuta mo ma lakwena Jon oneno, en owinyo ka lutic pa Jehovah ma gitye i polo giwaco ni: “Rwotwa ki Lubangawa, in imyero me nongo deyo ki woro ki teko, pien in aye ma yam iketo jami ducu, dok bene pi mitti omiyo gubedo tye, meno aye gin mumiyo yam giketogi.” (Niyabo 4:11) Ki lok ada, Jehovah opore me nongo deyo ki woro ducu, pi meno, mitte ni omyero wamine jamiwa mabeco loyo. Jehovah ociko rok me Icrael kun tiyo ki Moses ni myero gubed ki nino madito kidek mwaka ki mwaka. But yub me worogi i nino madito magi onongo kwako miyo jamigi bot Jehovah. Moses owaco bot jo Icrael ni “pe gubin i nyim Rwot [Jehovah] ki cinggi nono.” (Nwoyo Cik 16:16) I kare-ni, but yub me worowa ma pire tek kwako miyo jamiwa bot Jehovah ki cwinywa ducu. Ka watimo meno, ci wanyuto ni watyelo kor tic ma dul pa Jehovah timo dok watero ni obedo tic ma pire tek.

6. Pingo pire tek ni wabed jo ma cingi yot? (Nen cal ma tye i pot karatac 15.)

6 Pire tek ni omyero wabed jo ma miyo mic ki cwinygi ducu ento pe jo ma gigamo agama keken. Baibul waco ni: “Latic ma kimiye jami ducu kit macalo cwinye mito nicakke i tinone, lacen bibedo ngat ma pe miyo pwoc.” (Carolok 29:21, NW.) Tam kong i kom latin matidi mo ma lunyodone gumine cente mo manok ento dok otiyo ki but cente meno me wilo mic pi lunyodone. Mic meno  weko lunyodone giwinyo nining? Nyo tam kong i kom lapainia mo matidi ma bedo kacel ki lunyodone ento minigi cente me konyo culo ot nyo wilo cam pi jo ma gang. Mogo nongo lunyodone pe gimito ni en otim, ento gigamo gire micce meno. Pingo? Pien meno obedo yo ma en nyuto kwede ki pwoc bot lunyodone pi jami ducu ma gitimo pire. I yo acel-li, Jehovah ngeyo ni obedo gin maber ka wamine lonyo ma watye kwede.

KIT MA LUTIC PA LUBANGA I KARE MACON GUMIYO MOT

7, 8. Jo pa Jehovah ma kicoyo lok komgi i Baibul guwekiwa lanen maber nining ma lubbe ki miyo mic (a) me timo gin mo ma onongo mitte i kare moni kikome? (b) me tyelo kor ticce?

7 Wapwonyo ki i Baibul ni jo pa Jehovah gubedo ka miyo mic me tyelo kor ticce. I kine mukene onongo gimiyo mic me timo gin mo ma mitte i kare meno. Me labolle, Moses ocuko cwiny Luicrael ni gumi mic me gero kema me woro Lubanga. Lacen, Kabaka Daudi bene otimo kumeno pi gero ot pa Lubanga. (Nia 35:5; 1 Tekwaro 29:5-9) I kare me loc pa Kabaka Yekoac, lulamdog gutiyo ki cente ma dano gujogo me yubo ka muballe i ot pa Lubanga. (2 Luker 12:4, 5) I cencwari me acel, Lukricitayo guniang ni kec opoto i Judaya, dok ni utmege ma kunu gimito kony. Pi meno, Lakricitayo acel acel omiyo gin ma en twero miyone wek kicwal ki utmege ma kunu.​—Tic pa Lukwena 11:27-30.

8 Jo pa Jehovah bene gumiyo cente me konyo jo ma onongo gitye ka telo wi ticce. Me labolle, i te Cik pa Moses, Lulevi onongo pe kiminigi ginaleya kit ma onongo kimiyo ki kaka mukene-ni. Pi meno, Luicrael mukene-ni onongo gimiyo dul acel me apar ki i kom jami ma gitye kwede bot Lulevi. Man onongo miyo kare bot Lulevi me keto cwinygi i timo tic i kema me woro Lubanga. (Wel 18:21) I yo acel-li, mon mogo ma cingi yot gutiyo ki jami ma gitye kwede me konyo Yecu kacel ki lukwenane.​—Luka 8:1-3.

Dano ducu onongo gitwero miyo gin mo olo, cakke ki i kom jo mulony adada, o kwede wa i kom jo ma lucan adada

9. Mot ma dano gimiyo i kare macon onongo a ki kwene?

9 Mot magi onongo a ki ka mapatpat. Luicrael ma gumiyo ajog me gero kema me woro Lubanga gwok nyo gukwanyo ki i kin lonyo ma gubino kwede ki i Ejipt. (Nia 3:21, 22; 35:22-24) I cencwari me acel, Lukricitayo mogo gucato jamigi, calo poti nyo ot, ci gutero centene bot lukwena. Lukwena gutiyo ki cente meno me konyo utmege ma onongo gimito kony. (Tic pa Lukwena 4:34, 35) Lukricitayo mukene onongo kare ki kare gigwoko cente wek gimi me konyo kor tic meno. (1 Jo Korint 16:2) Pi meno, dano ducu onongo gitwero miyo gin mo olo, cakke ki i kom jo mulony adada, o kwede wa i kom jo ma lucan adada.​—Luka 21:1-4.

 KIT MA WAMIYO KI MOT I KARE-NI

10, 11. (a) Watwero lubo lanen me yot cing pa lutic pa Jehovah i kare macon nining? (b) Iwinyo nining pi miyo mot me tyelo kor ticwa me Ker?

10 I kare-ni, kiromo penyowa me miyo ajog pi gin mo ma nongo mitte. Gwok kacokkewu tye ki yub me roco Ot me Kerwu nyo me gero manyen-ne. Nyo kimito roco jang gang kalwu. Watwero bene miyo kony pi jami ma nongo mitte i gurewa madit. Romo bedo ni can ma poto atura otimme i kom utmege ma i kabedo mukene dok nongo gimito konywa. Mot ma wamiyo bene konyo lumiconari, lupainia keken, luneno me adwol, ki dong jo ma gitiyo i gang kalwa madit ki jang gang kalwa i wi lobo lung. Romo bedo ni kacokkewu bene cwalo ajog kare ki kare me miyo kony i gero Odi me Gure ki Odi me Ker pi utmegiwa ma i twok lobe mapatpat.

11 Wan ducu watwero olo to miyo gin mo me tyelo kor tic ma timme i dul pa Jehovah i kare man me agikki-ni. Pe kingeyo nying jo ma gimiyo pol pa mot ma gimiyo. Ka waketo cente i canduk bolo mot i Ot me Ker nyo ka wamiyo mot kun watiyo ki kabedowa me intanet me jw.org, pe watito wel cente ma wamiyo ki jo mukene. Ento ket kong ni iwinyo ni moti tidi adada ma konye pe kono? Ki lok ada, pol pa mot ma dul pa Jehovah nongo bino ki i mot matinotino ma dano gimiyo makato madit ma giketo kicel kicel. Kadi wa utmege ma gitye ki cente manok pud gilubo lanen pa Lukricitayo macon me Makedonia. Onongo gitye i “can madit mada,” ento pud gukwayo ni kiwek gimi mot me konyo utmege.​—2 Jo Korint 8:1-4.

12. Dul pa Jehovah tute me tic ki mot ma dano gimiyo i yo maber loyo nining?

12 Lukiko Madit lagen dok nyuto ryeko i tic ki mot ma dano gimiyo. (Matayo 24:45) Lumemba me Lukiko Madit gilego ma peya gumoko tam wek gimok tam matir, dok gigoyo pulan ki diro ma lubbe ki kit ma myero kiti kwede ki cente. (Luka 14:28) I kare me Baibul, co ma lugen ma onongo gineno lok kom mot ma dano gimiyo onongo giketo tek me neno ni kitiyo kwede i tic me woro Jehovah keken. Me labolle, Ejira odwogo cen i Jerucalem ki mot mabeco ma kabaka me Percia omiyo, man onongo kwako jabu, ryal, ki jami mapol ma welgi romo dolla me Amerika milion 100 i kare-ni. Ejira onongo neno mot meno calo gubedo mic pi Jehovah. Pi meno, en omiyo tira ma lubbe ki kit ma myero kigwok ki mot magi ka gitye ka kato ki i lobo ma luyak dwong iye. (Ejira 8:24-34) I nge mwaki mogo mapol, lakwena Paulo ojogo cente me konyo utmege ma i Judaya. En oketo tek me nenone ni jo ma gutero cente meno ‘gutimo gin maber, pe i nyim Lubanga keken, ento kadi wa i nyim dano bene.’ (Kwan 2 Jo Korint 8:18-21.) I kare-ni, dulwa lubo lanen pa Ejira gin ki Paulo dok gitiyo ki mot ma dano miyo ki diro adada.

13. Pingo cokcoki dul pa Jehovah otimo alokaloka?

13 Jo me ot gitwero keto alokaloka i kit ma gitiyo kwede ki centegi wek pe giti ki cente madwong loyo ma ginongo. Nyo gitwero yenyo yo me dwoko rwom me kwogi lapiny wek gimed cawagi i tic pi Jehovah. Meno bene rom ki gin ma dul pa Jehovah timo. Cokcok-ki, tye tic  mogo manyen mapol ma kicako, dok i kine mukene kitiyo ki cente madit makato mot ma kimiyo woko. Pi meno dul pa Jehovah calo jo me ot, giyenyo yo me tic ki cente manok kun gitiyo ticce i yo mayot dok maber, wek pe kilany mot ma kimiyo.

ADWOGI MABER MA BINO PI MOT MA IMIYO

Mot ma imiyo konyo me tyelo kor ticwa ma kwako wi lobo ducu (Nen paragraf 14-16)

14-16. (a) Mot ma imiyo i dul pa Jehovah kitiyo kwede me timo ngo? (b) Dok tic magi ma dul pa Jehovah tye ka timone gukonyi nining?

14 Jo ma dong guri i ada pi mwaki mapol giwaco ni i kom kare-ni dong watye ka nongo mot mapol ki i dul pa Jehovah makato kare mo keken. I kare-ni watye ki jw.org ki JW Broadcasting. Watye ki Baibul me New World Translation of the Holy Scriptures i leb mapol. I mwaka me ticwa me 2014 ki 2015, wabedo ki gure ma kwako lobe ducu ma otero nino adek ma wiye obedo ni “Ket Cwinyi i Kom Ker pa Lubanga!” dok gure man obedo i bar tuko mogo madongo loyo i boma 14 i twok lobo lung. Jo ducu ma gubedo i gure man cwinygi obedo yom adada me bedo tye!

15 Jo mapol ginyuto pwocgi pi mic magi ma dul pa Jehovah miniwa-ni. Me labolle, luot mo acel ma gutiyo i lobo Asia gucoyo ni: “Wang ticwa onongo tye i boma mo matidi. Macalo adwogine, i kine mukene wawinyo calo watye kenwa, dok wiwa wil woko i kom kit ma dul pa Jehovah lac kwede. Ento cutcut i nge neno vidio mapatpat ma gitye i JW Broadcasting, wiwa opo ni watye i kin utmege ma gunote i twok lobo lung. Cwiny utmege ma i kacokkewa obedo yom adada pi JW Broadcasting. Pol kare wawinyo ka giwaco ni i nge neno yub makati dwe ki dwe i JW Broadcasting, giwinyo ni gitye cok ki lumemba me Lukiko Madit. Man dong gitye ki awaka madit maloyo kare mo keken me bedo i dul pa Lubanga.”

 16 Kitye ka roco Odi me Ker macok o 2,500 kulu i twok lobo-ni lung. Jo me kacokke mo acel i Honduras guwaco ni onongo gileko aleka me bedo ki Otgi me Ker, ento man dong lek meno odoko ma kome. Gin gucoyo ni: “Cwinywa yom adada me bedo i kin jo me ot pa Jehovah ma gunote i wi lobo lung, ki dok me nongo mit pa bedo i kin utmege magi.” Jo mapol bene giwinyo kit meno ka gunongo Baibul nyo buke ma jenge i Baibul i leb pengi kikome, ka utmege gikonyogi ka can ma poto atura otimme i komgi, nyo ka gineno adwogi mabeco ma ginongo i tito kwena i wang ticgi kun gitiyo ki lalor buke i dye lwak.

17. Wangeyo nining ni Jehovah tye ka tyelo kor dulle i kare-ni?

17 Jo mapol ma pe gitye Lucaden pa Jehovah pe gitwero niang kit ma watwero timo jami magi ducu ki mot ma dano miyo labongo dic mo. Ladit mo ki i kampuni mo madit olimo ka goyo bukewa mo acel. Obedo ki ur madit me niang ni jo ma gidyere adyera aye ma gitimo tic meno ducu dok ni kitiyo ki cente ma dano gimiyo kun a ki i cwinygi, labongo keto yub mo me rayo cente ki bot dano. En owaco ni pe twere me timo jami ma watimogi-ni ducu. Wan bene waye lok meno! Wangeyo ni twere keken pien Jehovah tye ka tyelo kor tic meno.​—Yubu 42:2.

MOT MA WANONGO KA WAMIYO JAMIWA BOT JEHOVAH

18. (a) Mot ango ma wanongo ka wamiyo jamiwa me tyelo kor tic me Ker-ri? (b) Watwero pwonyo lutinowa ki jo ma pud ginyen nining wek gin bene gutim kit meno?

18 Jehovah ominiwa kare me cwako tic man me Ker-ri. Ka watimo tic meno ci wang ma Jehovah ominiwa mot. (Malaki 3:10) Jehovah ocikke ni ka wabedo jo ma cingi yot, ci wabinongo adwogi maber. (Kwan Carolok 11:24, 25.) En bene wacciwa ni wabibedo ki yomcwiny ka cingwa yot, pien, “miyo mot kelo gum [yomcwiny] makato gamo agama.” (Tic pa Lukwena 20:35) I lokwa ki ticwa, watwero pwonyo lutinowa ki jo ma pud ginyen kit ma gitwero tyelo kor tic man, wek gunong mot mapol.

19. Pwony man ocuko cwinyi nining?

19 Jami ducu ma watye kwede a ki bot Jehovah. Ka wamine jami ma watye kwede, ci wanyuto ni wamarre, dok watye ki pwoc pi jami ducu ma en otimo piwa. (1 Tekwaro 29:17) I kare ma Luicrael gumiyo ajog me gero ot pa Lubanga, “cwiny lwak obedo yom pien jo magi gumiyo mot ma cwinygi opwoyo, pien gutyero mot bot Rwot [Jehovah] ki cwinygi ducu.” (1 Tekwaro 29:9) Wan bene myero wamedde wunu ki nongo yomcwiny kacel ki yengo ka wamiyo mot bot Jehovah ki i jami ma en ominiwa.