Nyiko Cok Bot Lubanga i Lega
Dul me Apar Wiye Abiro
Nyiko Cok Bot Lubanga i Lega
Pingo omyero waleg bot Lubanga?
Myero watim gin ango wek Lubanga owiny legawa?
Lubanga mono gamo legawa nining?
1, 2. Pingo omyero wanen lega calo mic madit tutwal, dok pingo mitte ni myero wange gin ma Baibul pwonyo i kome?
LOBO titidi mo ka kiporo ki piny ducu. Ada, ki bot Jehovah “muketo polo ki lobo,” rok pa dano ducu tye calo pii ma oton kicel ki i cupuria nywal ber. (Jabuli 115:15; Icaya 40:15) Kadi bed kit meno, Baibul waco ni: “Rwot tye cok bot jo ducu ma kok bote, ma gikok bote ki ada. En miyo jami ducu ma mitte bot jo ma lwore, dok winyo kokogi, ci larogi bene.” (Jabuli 145:18, 19) Tam kong ngo ma tyen lok meno obedo! Lacwec ma obedo latwer ducu tye cok kwedwa dok biwinyowa ka ‘wakok bote ki ada.’ Pud dong watye ki mic madit me lok bot Lubanga i lega ya!
2 Ka wamito ni Jehovah owiny legawa, ci omyero waleg bote i yo ma en mito. Watwero timo man nining ka pe waniang gin ma Baibul pwonyo i kom lega? Pire tek ni wange ngo ma Ginacoya waco i kom lok man, pien lega konyowa me nyiko cok ki Jehovah.
PINGO OMYERO KILEG BOT JEHOVAH?
3. Tyen lok acel ma pire tek ango mumiyo walego bot Jehovah?
3 Tyen lok acel ma pire tek mumiyo omyero waleg bot Jehovah aye ni en cuko cwinywa me lega bote. Lokke cuko cwinywa ni: “Pe wubed ki par i kom gin mo, ento i lok ducu wumi Lubanga onge gin ma wumito i lega ki i bako dogwu kacel ki miyo pwoc bene. Man bimiyo kuc pa Lubanga ma kato ngec pa jo ducu gwoko cwinywu ki tamwu maber i Kricito Yecu.” (Jo Pilipi 4:6, 7) Ki lok ada pe wamito cayo yub me kica ma Laloc Mamalo ma loyo polo ki lobo oyubo piwa!
4. Lega bot Jehovah kare ducu jingo watwa ki en nining?
4 Tyen lok mukene ma miyo walego aye ni, lega bot Jehovah kare ducu obedo yo acel me jingo watwa ki en. Lurem me ada pe giloko i kin-gi i kare ma nongo gimito gin moni keken. Me ka meno, jo ma gubedo lurem atika gibedo ki mar i kingi, dok luremgi moko matek pien nongo gibedo ka waco tamgi ka maleng, jami ma nongo giparo pigi, ki kit ma nongo giwinyo kwede i cwinygi. Tye kit meno bene ka odok i lok kom wat i kinwa ki Lubanga Jehovah. Ki kony pa buk man, dong ipwonyo jami mapol ma Baibul pwonyo i kom Jehovah, kite, ki yubbe. Dong ityeko ngeyo en calo dano kikome. Lega mini kare me tito tammi ki kit ma iwinyo kwede i cwinyi bot Wonwa ma i polo. Ka ibedo ka timo meno, ci ibinyike cok bote.—Yakobo 4:8.
JAMI MA MITTE ANGO MA OMYERO WATIM?
5. Ngo ma nyuto ni Jehovah pe winyo lega ducu?
5 Jehovah mono winyo lega ducu? Nen kong ngo ma en owaco bot jo Icrael ma gujemo i kare pa lanebi Icaya ni: “Ka wutango cingwu, abiumo wanga woko pe anenowu; kadi bed wulega tyen mapol ata, pe abiwinyo legawu wacel; pien cingwu obedo remo keken.” (Icaya 1:15) Pi meno tye kit tim mogo ma twero weko Lubanga pe winyo legawa. Dong, me wek Lubanga owiny legawa maber, omyero watim jami ma pigi tego ma mitte.
6. Wek Lubanga owiny legawa, ngo ma mitte ma pire tek, dok watwero nongone nining?
6 Gin ma mitte ma pire tek aye ni omyero wabed ki niye. (Marako 11:24) Lakwena Paulo ocoyo ni: “Labongo niye pe twerre me yomo cwinye [Lubanga], pien ngat ma mito nyiko cok bot Lubanga myero oye ni en tye ada, dok bene ni en miyo bakacic bot jo ma yenye.” (Jo Ibru 11:6) Bedo ki niye me ada pe obedo mere ngeyo ni Lubanga tye ki ni en winyo nyo gamo lega keken. Ento niye nen i ticwa. Omyero wanyut atir ni watye ki niye i yo me kwowa me nino ducu.—Yakobo 2:26.
7. (a) Pingo omyero wabed ki woro ka watye ka lok bot Jehovah i lega? (b) Ka watye ka lego Lubanga, watwero nyuto mwolo ki ada nining?
7 Jehovah bene mito ni jo ma lege omyero gulege ki mwolo ki ada. Mono pe watye ki tyen lok me bedo ki mwolo ka watye ka lok bot Jehovah? Ka dano gunongo kare me lok bot kabaka nyo preciden, pol kare giloko bote ki woro madit kun giye rwom mamalo me locce. Omyero dong watim meno ma rom mene ka watye ka lok bot Jehovah! (Jabuli 138:6) I ada, en aye “Lubanga Won Twer Ducu.” (Niyabo 16:14) Ka walego bot Lubanga, yo ma waloko kwede bote myero onyut ni watye ki mwolo i nyimme pi dit ma en tye kwede. Mwolo ma kit man bimiyo walego ki cwiny me ada, kun nongo pe wabedo ka nwoyo kit lakit lega mogo ma kinwoyo jwi-ni.—Matayo 6:7, 8.
8. Watwero tiyo tic ma rwatte ki gin ma walego pire nining?
8 Jami mukene ma mitte wek Lubanga owiny legawa en aye ni omyero watim jami ma rwatte ki legawa. Jehovah mito ni watim jami ducu ma watwero timone pi gin ma nongo walego pire. Me laporre, ka walego ni, “Miwa tin camwa me tin,” ci omyero wati matek i kit tic mo keken ma nonge ma watwero timone. (Matayo 6:11; 2 Tecalonika 3:10) Ka ce walego pi kony me lweny ki goro me kom, omyero wagwokke ki i jami mogo ma twero terowa i atematema. (Jo Kolocai 3:5) Me medo i kom jami ma pigi tego magi ma mitte-ni, tye lapeny mogo i kom lega ma wamito ni myero kigam.
GAMO LAPENY MOGO MADOK I KOM LEGA
9. Omyero waleg bot anga, kun wok ki bot anga?
9 Omyero waleg bot anga? Yecu opwonyo lulub kore me lega bot “Wonwa ma tye i polo.” (Matayo 6:9) Man nyuto ni legawa omyero owot atir bot Lubanga Jehovah. Kadi kit meno, Jehovah mito ni waye rwom pa Yecu Kricito, Wode me acweya-ni. Kit ma wapwonyo kwede i Dul me 5, kicwalo Yecu i lobo me tic macalo ginkok me koko wan ki i bal ki to. (Jon 3:16; Jo Roma 5:12) En aye dong tye Lalam Dog Madit ki Langolkop ma kiketo. (Jon 5:22; Jo Ibru 6:20) Pi meno, Ginacoya niangowa ni wami legawa owok ki bot Yecu. En kikome owaco ni: “An a yo, ki ada, ki kwo: pe tye ngat mo ma bino bot Won, kono ki i an keken.” (Jon 14:6) Ma wek kiwiny legawa, omyero waleg bot Jehovah keken kun wok ki bot Wode.
10. Pingo pe mitte ni myero waket dul komwa i yo mo ma pat ka watye ka lega?
10 Tye yo mo ma mitte ni omyero wabed iye calo nyo gungugi-ni ka watye ka lega? Pe. Jehovah pe paro ni kong waket cingwa nyo ni wabed i yo mo calo gungugi-ni. Baibul pwonyo ni watwero lega ma nongo watye i kit mapat pat. Man tye iye bedo piny, kulo wic, gungu piny, nyo cung acunga. (1 Tekwaro 17:16; Nekemia 8:6; Daniel 6:10; Marako 11:25) Gin ma pire tek i cawa me lega aye cwiny maber ento pe yo ma inen kwede bot jo mukene. Ada, i kare me ticwa me nino ducu nyo ka wakemme ki jami mogo ma ongole atura, watwero lego ki i cwinywa i kabedo mo keken ma nongo watye iye. Jehovah winyo lega ma kumeno kadi bed ni jo ma nongo gitye ka ngetwa pe guniang iye.—Nekemia 2:1-6.
11. Jami ma mako ngat moni kene ango ma rwatte me lega pire?
11 Watwero lego pi jami ango? Baibul tito ni: “Ka walegge gin mo kun walubo gin ma en mito, ci en [Jehovah] winyo legawa.” (1 Jon 5:14) Pi meno waromo lego pi jami mo keken ma rwatte ki miti pa Lubanga. Mono obedo mitine ni omyero waleg pi jami ma mako komwa kene? Eyo! Lega bot Jehovah twero bedo calo lok bot larem macok. Watwero lego kun waloko ka maleng, ma nongo ‘wayabo cwinywa’ bot Lubanga. (Jabuli 62:8) Ber wakwaye pi cwiny maleng, pien bikonyowa me timo gin ma tye atir. (Luka 11:13) Watwero bene kwaye pi kony me moko tam ki ryeko ki pi teko me lweny ki peko. (Yakobo 1:5) Ka watimo bal, omyero wakwaye pi weko balwa kun wawok ki i gityer pa Kricito. (Jo Epeco 1:3, 7) Kono, pe kop ma mako komi keni aye dong omyero obed gin ma walego pire keken. Omyero omak jami mapol ma gudo wa jo mukene bene—calo jo me odiwa ki dong jo ma watye kwedgi i niye acel.—Tic pa Lukwena 12:5; Jo Kolocai 4:12.
12. Watwero keto lok ma dok i kom Wonwa me polo me bedo me acel i legawa nining?
12 Jami ma dok i kom Lubanga Jehovah omyero obedo gin ma pire tek me acel i legawa. Ada watye ki tyen lok me nyuto pak ki pwoc ma a ki i cwinywa bote pi ber ma mege ducu. (1 Tekwaro 29:10-13) Yecu omiyo lanen me lega me aluba ma kicoyo i Matayo 6:9-13, ka ma en opwonyowa iye me lega ni nying Lubanga myero kilony, ma te lokke ni kiter calo gin maleng. Ka lacen en owaco ni Ker pa Lubanga obin dok ni giti gin ma en mito i lobo kit ma gitiyo i polo. Inge loko pi jami magi ma pigi tego ma mako Jehovah, ka dong Yecu omiyo kare me keto cwiny i kom kop ma mako komwa kenwa. Ka wan bene waketo Lubanga obedo me acel i legawa, ci nongo wanyuto ni watye ki miti i kome ma kato ber bedowa.
13. Ginacoya nyuto gin ango i kom bor pa lega?
13 Legawa omyero obed mabor lakwene? Baibul pe oketo wang cawa mo pi kit ma bor pa legawa piwa kenwa nyo pi lwak myero orii kwede. Watwero lega macek ma nongo peya wacako cam nyo lega mabor ka watye ka lega piwa kenwa, ka ma wayabo iye cwinywa bot Jehovah. (1 Camuel 1:12, 15) Ento, Yecu okwero jo ma gubedo ka kette kengi ni kitgi atir kun gilego lega mabor, me nyute kwede bot jo mukene. (Luka 20:46, 47) Lega ma kit meno pe yomo cwiny Jehovah. Gin ma pire tek aye ni omyero waleg lega ma a ki i cwinywa. Pi meno, bor pa lega romo bedo pat pat ma lubbe ki jami ma mitte ki jami ma nongo tye ka timme i kwo.
14. Ka Baibul cuko cwinywa me ‘lega kare ducu,’ nongo te lokke ngo, dok ngo ma kweyo cwinywa i lok meno?
14 Omyero waleg tyen adi? Baibul cuko cwinywa me ‘lega kare ducu,’ ‘diyo cwinywa i lega,’ ki ni “Wuleg Lubanga ma pe wukeng.” (Matayo 26:41; Jo Roma 12:12; 1 Tecalonika 5:17) Kadi kit meno, lok magi pe nyuto ni omyero wabed ka lega bot Jehovah cawa ducu. Me ka meno, Baibul cuko cwinywa me lega kare ducu, kun wamedde ki pwoyo Jehovah pi berre i komwa dok watiro bote pi nongo tela, kwe cwiny, ki teko. Mono pe kweyo cwiny me ngeyo ni Jehovah pe ongolo wang cawa mo pi bor kacel ki tyen adi ma watwero lok kwede bote i lega? Ka ada wapwoyo mic me lega, ci wabinongo kare mapol me bedo ka lega bot Wonwa me polo.
15. Pingo omyero wagam ni “Amen” i agikki me lega piwa kenwa ki lega pi lwak?
15 Pingo omyero wagam ni “Amen” i agikki me lega? Nyig lok ni “amen” gonye ni “ada,” nyo ni “wek ocobbe kit ma iwaco-ni.” Lanen me Ginacoya nyuto ni rwatte me wacci “Amen” i agikki me lega pa dano acel acel nyo lega pi lwak. (1 Tekwaro 16:36; Jabuli 41:13) Ka wagamo ni “Amen” i agikki me lega piwa kenwa, nongo wamoko ni legawa-ni oa ki i cwinywa. Dong ka wagamo ni “Amen”—kadi bed ki i cwinywa nyo malongo—i agikki me lega pa ngat mo pi lwak, nongo wanyuto ni waye ni gin ma en oloko-ni tye ada.—1 Jo Korint 14:16.
KIT MA LUBANGA GAMO KWEDE LEGAWA
16. Gen ango ma watwero bedo kwede ma dok i kom lega?
16 Jehovah mono gamo lega ada? Gamo ada do! Watye ki tyen lok me bedo ki gen ni ngat ma obedo ‘Lagam lega ducu’ gamo lega me ada ma dano milion mapol gilego. (Jabuli 65:2) Jehovah oromo gamo legawa i yo mapol mapat pat.
17. Pingo kiromo wacci Lubanga tiyo ki lumalaikane ki luticce ma i lobo me gamo legawa?
17 Jehovah tiyo ki lumalaikane ki luticce ma i lobo me gamo lega. (Jo Ibru 1:13, 14) Dong otyeko timme i kwo pa dano mapol ma nongo gitye ka lega bot Lubanga pi kony me niang jami ma i Baibul ci i ngeye cut lutic pa Jehovah gubino botgi. Timme pa jami ma kumeno nyuto ni lumalaika bene gitye ka telo wi tic me pwonyo kwena me Kerri. (Niyabo 14:6) Me gamo lega ma walego i kare ma nongo gin moni mitte atika, Jehovah romo tugo cwiny Lakricitayo mo me bino ka konyowa.—Carolok 12:25; Yakobo 2:16.
18. Yo ango ma Jehovah tiyo kwede ki cwiny mere maleng wa ki Lokke me gamo lega pa luticce?
18 Lubanga Jehovah bene tiyo ki cwiny mere maleng ki Lokke ma obedo Baibul, me gamo lega pa luticce. En romo gamo legawa pi kony me lweny ki atematema dok miniwa tira ki teko ma a ki i cwiny mere maleng. (2 Jo Korint 4:7) Pol kare lagam me legawa pi tira a ki i Baibul, ka ma Jehovah miniwa iye kony me moko tam me ryeko. Ginacoya ma konyo twero nonge i kare ma nongo watye ka kwano Baibul piwa kenwa nyo nongo watye ka kwano bukke pa Lukricitayo calo buk en-ni. Lokma pigi tego me Ginacoya ma nongo wamito ngeyone oromo nen botwa ki i gin ma kiwaco i cokke pa Lukricitayo nyo ki i lok pa laelda ma paro pi ber bedo pa kacokke.—Jo Galatia 6:1.
19. Gin ango ma omyero wiwa opo iye ka gwok legawa onen calo pe kimito gamone?
19 Ka gwok onen calo Jehovah tye ka gale ka gamo legawa, nongo pe tere ni en pe twero gamogi. Me ka meno, omyero wiwa opo ni Jehovah gamo lega i yo ma lubbe ki mitine dok i kare ma nongo en mito. En ngeyo ngo ma wamito dok cobogi i yo maber loyo kit ma wan watwero kwede. Pol kare en ye botwa me ‘lego, yenyo, ki dwongo.’ (Luka 11:5-10) Diyo cwiny ma kit meno nyuto bot Lubanga ni mitiwa tye matut tutwal dok ni niyewa kikome. Me medo i kom meno, Jehovah romo gamo legawa i yo ma nongo pe nen ka maleng botwa. Me laporre, en romo gamo legawa pi atematema mo, pe i yo me kwanyone woko, ento miniwa teko me cirone.—Jo Pilipi 4:13.
20. Pingo omyero wabed ka lega kare ducu kit ma lega obedo mic ma pire tekki?
20 Pud dong watwero bedo ki pwoc madit ni Lacwe polo ki lobo tye cok ki jo ducu ma gilego bote i yo maber! (Jabuli 145:18) Pimeno, walegu bote kare ducu kit ma en omiyowa mic ma pire tek me lega-ni. Ka watimo meno, ci wabibedo ki yomcwiny me nyikke cok bot Jehovah, ma obedo Lagam lega.
GIN MA BAIBUL PWONYO
▪ Bedo ka lega bot Jehovah kare ducu konyowa me nyikke cok bote.—Yakobo 4:8.
▪ Wek Lubanga owiny legawa, omyero waleg ki niye ki mwolo dok ki ada.—Marako 11:24.
▪ Omyero waleg bot Jehovah keken kun wawok ki bot Wode.—Matayo 6:9; Jon 14:6.
▪ Jehovah obedo, ‘Lagam lega,’ en tiyo ki lumalaikane, luticce ma i lobo, cwiny mere maleng, ki Lokke me gamo lega.—Jabuli 65:2.
[Peny me Kwan]
[Cal ma tye i pot karatac 165]
“Lacwe polo ki lobo” tye ki miti me winyo legawa
[Cal ma tye i pot karatac 171]
Legani kiromo winyone i kare mo keken
[Cal ma tye i pot karatac 172, 173]
Me gamo legawa, Jehovah twero tugo cwiny Lakricitayo mo me bino ka konyowa
