Samz 96:1-13
96 Chanté an chanté nèf bay Bondyé Senyè-a!
Sé pou tout latè-a chanté bay Bondyé Senyè-a.
2 Chanté bay Bondyé Senyè-a èk lévé nonʼy.
Toulé jou sé pou nou fè moun konnèt bon nouvèl-la mannyè i ja sové nou.
3 Fè sé nasyon-an konnèt pouvwaʼy,èk fè moun konnèt tout gwan twavay i ja fè.
4 Bondyé Senyè-a gwan èk i bon pou moun glowifyéʼy,
sé pou moun wèspèktéʼy pasé tout sé lézòt bondyé-a.
5 Sé bondyé-a sé nasyon-an ka adowé-a sé imaj,mé sé Bondyé Senyè-a ki fè syèl-la.
6 Moun ki vini douvanʼy ka wè gwandèʼy èk lonnèʼy,yo ka wè pouvwa Senyè-a èk bèltéʼy an Kay li.
7 Sé pou tout moun ki an latè-a glowifyé Bondyé Senyè-a,sé pou yo lévé nonʼy pou pouvwaʼy èk fòs li.
8 Glowifyé non Bondyé Senyè-a paski i méwité sa.Mennen an kado èk vini an Kay li.
9 Adowé Bondyé Senyè-a ki pa ni fòt-la lè i pawèt,sé pou tout latè-a twanblé douvanʼy.
10 Di tout sé nasyon-an, “Sé Bondyé Senyè-a ki wa!
I mété latè-a fò an plas li èk anyen pa sa soukwéʼy.
I kay jijé sé moun-an san pwéféwans.”
11 Sé pou syèl-la kontan èk kité latè-a wéjwi.Kité lanmè-a èk tout sa ki andidanʼy fè dézòd afòs yo kontan.
12 Sé pou savann-an èk tout sa ki andidanʼy kontan.
Sé pyé bwa-a ki an lafowé-a kay chanté afòs yo kontan,
13 paski Bondyé Senyè-a ka vini!I ka vini pou jijé latè-a.
I kay jijé sé jan latè-a èk jistisèk sé nasyon-an san pwéféwans.
