Samz 24:1-10
Sé an sam David
Sé Bondyé Ki Gwan Wa-a
24 Latè-a èk tout sa ki adanʼy sé sa Bondyé Senyè-a.
Latè-a èk tout moun ki ka wèsté anlèʼy sé sa li.
2 I mété fondasyon latè-a ofon lanmè-aèk i fèʼy asid asou dlo-a.
3 Ki moun ki ni dwa pou mouté asou mòn Bondyé Senyè-a?
Ki moun ki pé antwé an kay-la ki sa li yonn-an?
4 Sé moun ki pa ka fè bagay ki mové,moun ki pa ni vyé lidé.
Sé moun ki pa ka adowé imaj,èk moun ki pa ka fè pwonmèt yo pa ka tjenn.
5 Yo kay wisivwè bennédiksyon Bondyé Senyè-a.
Yo kay moun ki dwèt douvan Bondyé ki délivwé yo-a.
6 Sé moun kon sa ki pou vini adowé Bondyé.
Sé moun kon sa ki pou vini douvan Bondyé Jakòb-la.
7 Ouvè sé bayè-a gwan,ouvè sé lapòt-la ki la dépi lontan-an,pou gwan wa-a sa antwé.
8 Kilès ki gwan wa sala?
Sé li ki Bondyé Senyè-a ki fò èk ki ni tout pouvwa-a.
Sé li ki Bondyé Senyè-a pyèsonn pa sa genyen an batay-la.
9 Ouvè sé bayè-a gwan,ouvè sé lapòt-la ki la dépi lontan-anpou gwan wa-a sa antwé.
10 Kilès ki gwan wa sala?
Sé Bondyé Senyè-a ki chèf sé sòlda syèl-la.
Sé li menm ki gwan wa-a.
