ÓRNI roʼol lo periódico, rabiʼlo televisión, o racadiaglo radio, ¿xí raduidylo cuent cayac? ¡Noʼ xiroʼ cós mal xomod guerr, grupos de buñ ni rac toibsi par gony cós mal! Nigoreʼ buny pensary galnagan ni caduidylo ló. Sigory galguitz o galgoity de toib xfamilylo rony que rioʼlo ló galrasaʼ. Labúu guisaclo xomod Job, toib buñtzay ni goniʼ que goyoʼbu ló «xiroʼgolu galnabann» (Job 10:15).

Gonabdiitz looyca:

• ¿Ndeʼ ni goniiny Dios par naʼ né par guirá buñgudxlio la?

• ¿Pú lagary labúu guidzela galrracné par guicalóya galnagan?

• ¿Sioʼ dzú guiguaʼ buñ goxt ló Gudxlio la?

La Biblia racapytzay guirá galrranabdiitz reʼ ni rony que rasacno sacró.

«Sasiá nís ni rareʼ bisalóto, galgoity ma diti sioʼni más, ma diti sioʼ ni guisac maláy, láaca ma diti sioʼ ni guicalas rudx, láaca diti sioʼ ni tudy ló galrrioop.» (Revelación 21:4)

«Guirá buñxot guixony xomod rony toib bidxin láani.» (Isaías 35:6)

«Bisaló guirá buñ ni diti rabiʼ saxalni.» (Isaías 35:5)

 «Guirá ni noʼ lainy baʼ conmemorativas [...] sareʼ.» (Juan 5:28, 29)

«Ni toib buñ ni guibany cú guiniʼ: Caxoʼya.» (Isaías 33:24)

«Sadxin sioʼgolu ni guá buñ ló gudxlio.» (Salmo 72:16)

Diti gonylo pensary que ni sieed ló página ni ma bíilno nosi nacní toib bacaʼal. Dios ma goniʼ gonybu láani, né la Biblia rabexa ximod sac cumplirni.

Per diti ngúsi, la Biblia láaca raiby lóono ximod labúu guibanyno sacroyen né goxt nigoreʼ. Buny pensary tipratien de galnagan né galrasaʼ ni caduidylo ló. Sigory nóolo galrasaʼ por bidxiich, xfamilylo, ni noʼ galguitz o ni raity xfamilylo. Scú láani, la Biblia racné lóono par guicalóno guirá galnagan reʼ, né láaca racnéni lóono guisacno sacró órni racapyni guirá ndeʼ:

• ¿Xigony radudyno ló galrrioop?

• ¿Ximod labúu guicalóno galrasaʼ ni cadudyno ló?

• ¿Xí gonyno par guiguaʼno más sacró né xfamilno?

• ¿Xí racno órni raityno?

• ¿Sadxin dzú guibiʼno buñ ni nadxiʼ no ni ma goity la?

• ¿Xigony labúu gapnó confianz que Dios sony cumplir guirá ni ma goniʼbu?

 Ni cayoʼol lo ndeʼ raslooylo que raniiny looy guienlo xí ni merpa rasuidy la Biblia. Libro reʼ sacné looy guienlo láani. Bibiʼ ñeʼ páginas sieed galrranabdiitz ni racapy ló párrafos. Millón buñ rioladx mod rony testigos xtuny Jehová órni rasuidyibu la Biblia. Ranabdiitzyibu né racapyibu láani mod sieed ló párrafos. Rabésdo que láaca guioladxlo mod ronydo láani. Dios guiduidy xilaay looy par guienlo xí ni merpa rasuidy la Biblia.