¿NANLO chú láabu buñgonaʼ né chú layibu chop buñguieeu ca la? Buñgonaʼ reʼ nac María Magdalena, ximig Jesús. Chop buñguieeu ni nóc lairyquiich nacyibu ángeles. María noʼ caguixlóo lainy baʼ ro bigach Jesús, ¡per nigoreʼ ma diti noʼbu lagarycu! ¿Chú sané láabu? Guibino guidoni.

Órni Jesús goity, ni rasanir nisló israelitas par gony goʼox raibyibu Pilato: Órni Jesús nabanysa goníbu que guiásbu lad gueʼet ló tzón govitz. Por ngú, Pilato rony mandary que ganyibu ro bigach Jesús. ¡Modreʼ xpiin Jesús diti labúu cuannyibu laidy Jesús né guiniʼyibu que ma biásbu lad gueʼet! Pilato rony mandary layibu guixelyibu soldad.

Órni bisaʼ Jesús tzón govitz de goló goity, rosilcú toib ángel xtuny Jehová radxiin tisintiempsi. Rabébu guiee ni náaxh roʼ baʼ, ro bigach Jesús. Tipnés soldad ni cayap láabu radzuibygolú né diti noʼ xí labúu ronyibu. ¡Ralox radudy ndeʼ, órni raguixlóyibu lainy baʼ ro bigach Jesús, Jesús ma diti noʼbu cú! Layibu rioʼyibu lainy gudx né raibyibu láani a tipnés buñguieeu ni rasanir nisló israelitas par gony goʼox. ¿Nanlo xí rony guirá buñguieeu mal reʼ la? Raguiixyibu soldad par guiniʼ por galrrascú. Raibyibu soldad: Colguiniʼ que xpiimbu goleʼ né sané láabu laʼga lóoto natiasyto.

Laʼga cayac guirá ndeʼ, tipnés ximig Jesús ni nac buñgonaʼ rieed ridguen baʼ ro bigach Jesús. ¡Ma nadachni! Tisintiempsi, chop ángeles ni nóc lairyquiich noʼ cú. ¿Xigony rayopyto Jesús reʼ? ranabdiitzyibu. Láabu ma biásbu lad gueʼet. Coltzé ni maca né colgaiby láani xpiimbu. Layibu raxonyibu rieyibu. Per ló néz toib buñguieeu rareʼ lóoyibu. ¿Nanlo chú láabu la? ¡Nacbu Jesús! Ranibu: Coltzé coltzagúdx láani xpiina.

Órni tipnés buñgonaʼ reʼ raibyibu biinreʼ que Jesús nabany né ma bibiʼyibu Jesús, nagann par layibu guiluladxyibu láani. ¡Pedro né Juan raxony ro baʼ ro bigach Jesús per láani ma nadachni! Órni layibu rareʼyibu de lagarycu, María Magdalena rian stiprat lagarycu. Ór cú raguixlóbu lainy baʼ ro bigach Jesús né rabíbu chop ángeles.

¿Nanlo xí góc né laidy Jesús órni goitybu né bigachbu la? Dios buny que ma diti nadzelyibu laidy Jesús. Dios diti golís Jesús né laidy ni gopbu dzú ni yása gaitybu. Biduidybu Jesús toib laidy copy xomod nap guirá ángeles. Par gann xpiimbu que láabu nabanybu, Jesús racbu xomod toib buñ ni labúu rabíyibu.