Joel 2:1-32
2 «¡Laguxhidxi cachu lu dani Sion!
Lagucaa ti ridxi ni ricá lu guerra lu dani santo stinneʼ.
Gacaditi guiráʼ ca binni ni nabeza ndaaniʼ guidxi ca.*
¡Zeeda dxi stiʼ Jehová! ¡Maʼ gaxha nuuni!
2 Nácani ti dxi nacahui ne nacahuidóʼ,ti dxi ra zahuinni stale za ne guizáʼ nacahuidóʼ,casi ora maʼ zedayaba xpiaaniʼ dxi lu ca dani ca ora maʼ zirá gueelaʼ.
Nuu ti guidxi napa stale binni ne nadipaʼ.
Qué huayuu dxi chuʼ tobi casi laani,ne qué ziuuruʼ dxi chuʼ stobibiaʼ guiráʼ ca iza guibani binni.
3 Delante de laabe zeʼ ti bele ni cuxuuxene atrá zeeda ti bele ni cunitilú.
Naca layú ni nuu delante casi jardín stiʼ Edén,peru atrá cayaana ti desiertu,ne gastiʼ qué zanda guilá.
4 Ruluíʼcabe caballune ruxooñecabe casi ruxooñeʼ ca caballu ni rié lu guerra.
5 Caxidxi zeedacabe casi rixidxi ora riuubi ca carru ca ique ca dani ca,casi rixidxi ora cuzaaquiʼ ti bele ngola guixi bidxi.
Nácacabe casi ti guidxi nadipaʼ ni zuhuaa ne nuu listu para tinde.
6 Pur laacabe, naná ziuu guiráʼ guidxi ca.
Dede zaté lu guiráʼ binni.
7 Rucaalúcabe casi hombre nadipaʼ,riguíʼbacabe muru casi soldadu,cada tobi rizá lu neza stiʼne nin tobi qué rireecuéʼ de neza zeʼ.
8 Qué rulaanasaacabe;cada hombre maʼ zeʼ lu neza stiʼ.
Pa guiaba caadxi de laacabe pur ca guiibaʼ* ca,xcaadxi hombre ca qué rireecaʼ de lu fila.
9 Riuucabe ndaaniʼ guidxi, ruxooñecabe lu ca muru.
Ricácabe cueʼ yoo para quíbacabe, riuucabe ra ventana casi ti gubaanaʼ.
10 Racaditi guidxilayú nezalúcabe ne riniibi guibáʼ.
Ricahui lu gubidxa ne elabeeune qué rihuinni biaaniʼ stiʼ ca beleguí ca.
11 Zandisaʼ Jehová stidxi nezalú ejércitu stiʼ, purtiʼ guizáʼ stale binni nuu lu campamentu stibe.
Ni runi ni maʼ bidii stiidxaʼ la? napa poder.
Naroʼbaʼ dxi stiʼ Jehová ne guizáʼ zadxagayaa binni ni.
¿Tu laa zanda guni huantar ni yaʼ?».
12 «Peru nuuruʼ tiempu —nga nga ni ná Jehová—, laguibiguetaʼ ra nuaaʼ de guidubi ladxidoʼto,laguni ayunar, laguunaʼ ne lagacaná purtiʼ cayuubaʼ ladxidoʼto.
13 Laguicheza ladxidoʼto ne cadi xhábasitu,ne laguibiguetaʼ ra nuu Jehová Dios stitu,purtiʼ laabe riabe, ne nápabe misericordia, nápabe paciencia* ne qué rusaana de gannaxhiibe,*ne laabe zaníʼ íquebe guchaabe decisión ni gucuaabe de guseendabe ti guendananá.
14 ¿Qué gánnanu? Zándaca guiníʼ íquebe guchaabe decisión stibene uguube ndaayaʼ laatupara gúnitu ti ofrenda de biidxiʼ ne ti ofrenda ni rixii para Jehová Dios stitu.
15 ¡Laguxhidxi cachu lu dani Sion!
Laguni mandar gaca* ti ayuno; lagucaalisaa binni ti dxi especial para guni adorartu Dios.
16 Lagucaalisaa guidxi ca; lagusiá* ca binni ca.
Laguchiña ca hombre huaniisi.* Lagucaalisaa ca ni nahuiiniʼ ne ca xcuidi ni cayádxiruʼ.
Guiree novio de ndaaniʼ cuartu stiʼ ni nuu dentru, ne guiree novia, de ndaaniʼ cuartu de boda stiʼ.
17 Galaa de ra nuu entrada stiʼ templu* ne altar,racá guʼnaʼ ca sacerdote, ca ni runi xhiiñaʼ Jehová, ne guiniʼcaʼ:
“Biá xquídxiluʼ, Dios Jehová.
Cadi gúniluʼ herencia* stiluʼ xiixa ni guni burla binnira gudiiluʼ lugar guni mandar ca guidxi roʼ ca laacabe.
¿Xiñee ndiʼ naquiiñeʼ guiníʼ ca guidxi ca «¿Paraa nuu Dios stícabe pue?»?”.
18 Óraque né stale gana zapa Jehová layú stiʼne zusihuínnibe cayabe xquídxibe.
19 Zabi Jehová xquidxi:
“Raríʼ nuaaʼ cuseendaʼ ra nuutu biidxiʼ, vinu nacubi ne aceite,ne laatu zadxátipa ndaanitu.
Qué zudieeʼ lugar gusituiruʼ ca guidxi roʼ ca lutu.
20 Ni zeeda de ladu guiáʼ ca guizáʼ zitu ziniáʼ laa de ra nuutu.
Zuchechendaseʼ laabe lu ti layú nabidxi ne ni nuu stubi,zudxiilube neza ra nuu nisadóʼ ni riaana ladu rindani gubidxa*ne zudxiidéchebe neza ra nuu nisadóʼ ni riaana ladu riaaziʼ gubidxa.*
Ziasa xhoʼ yuudxuʼ stibe,ne jmaruʼ si nadipaʼ zandáʼ yuudxuʼ xhoʼ stibe.
Purtiʼ zuni Dios cosa naroʼbaʼ”.
21 Lii, layú, cadi guidxíbiluʼ.
Bixidxi ne guyuu nayecheʼ, purtiʼ zuni Jehová cosa naroʼbaʼ.
22 Laatu, ca maniʼ ni rizá lu layú, cadi guidxíbitu,purtiʼ ca layú ni napa guixi ni nuu lu desiertu zabiguetaʼ zácacani verdene zudii ca yaga ca cuananaxhi sticaʼ.
Napa xidé gudii yaga duʼgaʼ* ne lubáʼ uva guiráʼ cuananaxhi sticaʼ.
23 Laatu, ca xiiñiʼ Sion, laguxidxi ne lachuu nayecheʼ pur Jehová Dios stitu.
Laabe zudiibe laatu biaʼ nisaguié ni caquiiñeʼ lu otoño.
Zuseendabe stale nisaguié ra nuutu,nisaguié stiʼ otoño ne nisaguié stiʼ primavera, casi dxiqué.
24 Zadxátipa ca era* ca de biidxiʼ nayáne dede zaxii vinu nacubi ne aceite ndaaniʼ ca lagar* ca.
25 Naa zaguixeʼ laatubiaʼ ca iza gudó ca langosta ca cosecha stitu, langosta ni napa xhiaa, langosta ni qué gapa xhiaa, langosta ni ro stale ne langosta ni ruxuuxe,ejércitu naroʼbaʼ ni biseendaʼ luguiatu.
26 Dxandíʼ peʼ zoto dede ra guidxá ndaanitune zusisácatu lá Jehová Dios stitu,ni maʼ biʼniʼ cosa ni ridxagayaa binni pur laatu.
Qué ziuuruʼ dxi guibiguetaʼ guituilú xquidxeʼ.
27 Ne naquiiñeʼ gánnatu naa nga nuaaʼ galaa de guidxi Israelne naa nga Jehová Dios stitu. ¡Gástiruʼ stobi!
Qué ziuuruʼ dxi guibiguetaʼ guituilú xquidxeʼ.
28 Despué zundaateʼ espíritu stinneʼ luguiáʼ guiráʼ clase binni.
Ca xiiñitu hombre ne ca xiiñidxaapatu zaniʼcaʼ xi chiguizaaca,*ca binni huaniisi stitu zaníʼ xcaandacaʼne zuuyaʼ ca joven stitu visión.
29 Lu ca dxi ca dede luguiáʼ ca esclavu ne ca esclava stinneʼzundaateʼ espíritu stinneʼ.
30 Ne zuneʼ cosa guibáʼ ne lu guidxilayú ni zadxagayaa binni:
ziuu rini, bele ne columna de guʼxhuʼ.
31 Zacahui gubidxa ne zaca elabeeu riniante gueeda dxi stiʼ Jehová, dxi naroʼbaʼ ne ni zadxagayaa binni.
32 Ne guiráʼ tu gucaaridxi* lá Jehová zalá.
Lu dani Sion ne Jerusalén ziuu ca ni guxoñelú, casi maʼ guníʼ Jehová ni,ca ni guilá, ca ni Jehová peʼ gucaaridxi».
Nota
^ O «guidxilayú».
^ O «proyectil».
^ O «rindaa para guidxiichibe».
^ O «nápabe stale guendarannaxhii ni qué rirá».
^ O «Lacueechú para Dios».
^ O «ca hombregola».
^ O «pórtico».
^ O «guidxi».
^ Laani nga mar Muerto.
^ Laani nga mar Mediterráneo.
^ O «higo».
^ O «zuni profetizarcaʼ».
^ O «guni invocar». Lu diidxaʼ hebreu laaca riniʼni gucaaridxi o «guni invocar» binni lá Dios para gacanebe laacaʼ, gápacaʼ confianza laabe, ne guiníʼnecaʼ xcaadxi de labe.
