Ageo 2:1-23
2 Ne 21 stiʼ beeu gadxe que, gunabaʼ Jehová profeta Ageo gabi laacabe ca diidxaʼ riʼ:
2 «Por favor, gunabadiidxaʼ Zorobabel xiiñiʼ Sealtiel —gobernador stiʼ Judá— ne Josué xiiñiʼ Jehozadac —sacerdote ni jma risaca—* ne guidubi naca guidxi ca:
3 “¿Ñee nuu de laatu biiyaʼ pabiáʼ nandxóʼ guca yoo* riʼ dxiqué la? ¿Ximodo ruuyatu ni yanna? ¿Cadi rábitu nin gaxha de ni gúcani dxiqué né ni nácani yanna la?”.
4 »“Peru yanna, Zorobabel, guca nadipaʼ —ná Jehová—, ne lii, Josué xiiñiʼ Jehozadac, sacerdote ni jma risaca, laaca guca nadipaʼ”.
»“Ne lagaca nadipaʼ, guiratu ca binni ni nabeza lu layú riʼ —ná Jehová—, ne laguni dxiiñaʼ”.
»“Purtiʼ naa nuaaniáʼ laatu —ná Jehová, Dios stiʼ ca ejércitu—.
5 Laguietenalaʼdxiʼ ni bidieeʼ stiidxaʼ laatu dxi bireetu de Egipto; dede yanna nuuruʼ espíritu stinneʼ ládetu.* Cadi guidxíbitu”».
6 «Purtiʼ ndiʼ nga ni ná Jehová, Dios stiʼ ca ejércitu: “Sti biaje ca —maʼ cadi candaa— zuniibeʼ dxacha guibáʼ ne guidxilayú, nisadóʼ ne layú ra nabidxi”.
7 »“Zuniibeʼ dxacha guiráʼ ca guidxi, ne ziuu guiráʼ ca cosa risaca stiʼ guiráʼ ca guidxi ca ndaaniʼ yoo riʼ ne naa zuchayaʼ yoo riʼ de guendanandxóʼ”, ná Jehová, Dios stiʼ ca ejércitu.
8 »“Stinneʼ plata ne stinneʼ oro”, ná Jehová, Dios stiʼ ca ejércitu.
9 »“Jma stale guendanandxóʼ zapa yoo riʼ que yoo ni guyuu dxiqué”, ná Jehová, Dios stiʼ ca ejércitu.
»“ne zudieeʼ laatu guendariuudxí lugar riʼ”, ná Jehová, Dios stiʼ ca ejércitu».
10 Ne 24 stiʼ beeu gaʼ, lu guiropa iza de cayuni mandar Darío, gudxi Jehová profeta Ageo ca diidxaʼ riʼ:
11 «Ndiʼ nga ni ná Jehová, Dios stiʼ ca ejércitu: “Por favor, gunabadiidxaʼ ca sacerdote xi ná ley:
12 «Pa ndaaniʼ xhaba ti hombre ziné beela para sacrificiu ne guidiiñe xhábabe riʼ pan, o guidiiñeni ti guendaró o vinu o aceite o intiica si sti cosa ni ro binni, ¿zaca ni guidiiñeni ca nayá la?»”».
Para bicabi ca sacerdote: «¡Coʼ!».
13 De raqué gunabadiidxaʼ Ageo laacabe: «Pa tuuxa nuu nabiidiʼ pur gudaʼnaʼ ti gueʼtuʼ ne guedatanaʼ tobi de ca cosa riʼ, ¿zacabiidiʼ ni cánabe ca la?».
Para bicabi ca sacerdote que: «Zaca biidini».
14 Para ná Ageo: «“Zacá nga guidxi riʼ, zacá nga naca guidxi riʼ nezaluáʼ —ná Jehová— ne zacá nga guiráʼ ni rúnicabe né nácabe. Guiráʼ ni rudiicabe racá nabiidicani”.
15 »“Peru yanna, por favor, de yannadxí para delante laguiníʼ ique chaahuiʼ ndiʼ: ante quíxhecabe guié luguiáʼ sti guié para gucuícabe templu stiʼ Jehová,
16 ¿xi bizaaca dxiqué? Ora maʼ zeʼ tuuxa ra nuu ti montón biidxiʼ* para chiyubi gande medida de biidxiʼ, ridxela chii si medida; ora maʼ zeʼ tuuxa ra nuu tanque ra rutuñeecabe uva para cuee cincuenta medida de vinu, gande si medida ridxela.
17 Biniteluáʼ guiráʼ dxiiñaʼ ni bíʼnitu ra biseendaʼ ti bi ndaʼ, plaga ne granizu, peru nin tobi de laatu qué nibiguetaʼ ra nuaaʼ”, ná Jehová.
18 «“Por favor, a partir de yannadxí siempre laguiníʼ ique chaahuiʼ ndiʼ, dede dxi 24 stiʼ beeu gaʼ, dxi gudíxhecabe ca base stiʼ templu stiʼ Jehová, laguiníʼ ique chaahuiʼ ndiʼ.
19 ¿Ñee nuuruʼ biidxiʼ ndaaniʼ lugar ra riaapaʼ cani* la? ¿Cadi dxandíʼ caʼruʼ gudii lubáʼ uva, yaga duʼgaʼ, yaga granada ne yaga olivo cuananaxhi stiʼ la? Dede yannadxí zaguaaʼ ndaayaʼ laatu”».
20 Dxi 24 stiʼ beeu que bidii Jehová Ageo ca diidxaʼ riʼ guiropa biaje, ne nabe:
21 «Gudxi Zorobabel gobernador stiʼ Judá: “Chiguniibeʼ dxacha guibáʼ ne guidxilayú.
22 Zunduuxeʼ trono stiʼ ca reinu ne zaxhaʼ poder stiʼ ca reinu stiʼ ca guidxi ca. Zuniteluáʼ ca carru stícabe ne ca ni rusá cani, ne ca caballu ne ca ni riguiʼbaʼ laacame, cada tobi laaca biʼchiʼ guuti laa né espada”».
23 «“Dxi ca —ná Jehová, Dios stiʼ ca ejércitu—zaquiiñeʼ lii, Zorobabel xiiñiʼ Sealtiel, mozo stinneʼ —ná Jehová—, ne zuneʼ lii casi ti aníu ni rucaanécabe sellu purtiʼ lii nga ni maʼ gulieeʼ”, ná Jehová, Dios stiʼ ca ejércitu».
