Ageo 1:1-15

  • Gudindenécabe guidxi que purtiʼ caʼruʼ guni chaahuicaʼ templu que (1-11)

    • ¿Ñee yanna peʼ nga guzuchaahuitu lídxitu de yaga galán la? (4)

    • «Laguiníʼ ique chaahuiʼ xii nga cayúnitu» (5)

    • Guizáʼ rusábatu semiá, peru huaxiéʼ cosecha rindísatu (6)

  • Bicaadiaga guidxi que stidxi Jehová (12-15)

1  Lu guiropa iza de cayuni mandar rey Darío, primé dxi stiʼ beeu xhoopaʼ, Zorobabel xiiñiʼ Sealtiel —gobernador stiʼ Judá— ne Josué xiiñiʼ Jehozadac —sacerdote ni jma risaca*— gucuaacaʼ ca diidxaʼ ni zeeda de Jehová riʼ, ni gudxi profeta Ageo* laacaʼ: 2  «Ndiʼ nga ni ná Jehová, Dios stiʼ ca ejércitu: “Guidxi riʼ ná: «Caʼruʼ diʼ guedandá dxi gucuidu* lidxi* Jehová»”». 3  Ne biguetaʼ biquiiñeʼ Jehová profeta Ageo para gabi laacabe ca diidxaʼ riʼ: 4  «¿Ñee yanna peʼ nga guzuchaahuitu lídxitu de yaga galán pa yoo riʼ nuu nisi escombro la? 5  Yanna, ndiʼ nga ni ná Jehová, Dios stiʼ ca ejércitu: “Laguiníʼ ique chaahuiʼ xii nga cayúnitu. 6  Guizáʼ maʼ bisábatu semiá, peru huaxiéʼ cosecha huandísatu. Roto peru qué ridxá ndaanitu. Reʼtu peru qué ridxatu. Rácutu lari peru qué ruchaani laatu. Ne ni runi dxiiñaʼ para stobi riguu ni riaxa ndaaniʼ ti bolsa ni nade”». 7  «Ndiʼ nga ni ná Jehová, Dios stiʼ ca ejércitu: “Laguiníʼ ique chaahuiʼ xii nga cayúnitu”. 8  »“Laquiʼbaʼ lu dani ca, lachiné yaga ne lagucuí lidxeʼ, ti zacá chúʼladxeʼ ni ne gusisácacabe naa racá”, ná Jehová». 9  «“Cabézatu guicaatu stale peru huaxiéʼ ni gucuaatu. Ne, ora yenetu ni ra lídxitu, tobi bindubeʼ siaʼ ne zeni. ¿Xiñee yaʼ? —ná Jehová, Dios stiʼ ca ejércitu—. Purtiʼ nisi escombro nuu lidxeʼ, peru laatu nuu xhiiñatu cayápatu lídxitu. 10  Nga runi, maʼ qué ñaba gupa de guibáʼ ne maʼ qué nudii layú ca. 11  Ne maʼ qué nusabaʼ nisaguié lu layú stitu ne lu ca dani ca, nga runi bixiéʼ biidxiʼ* stitu ne vinu cubi ne aceite ne guiráʼ ni rudii lu layú. Cásica laatu ne zaqueca ca maniʼ stitu cayacanatu, ne pur gana si guiráʼ dxiiñaʼ cayúnitu”». 12  Ne Zorobabel xiiñiʼ Sealtiel, Josué sacerdote ni jma risaca xiiñiʼ Jehozadac ne guidubi guidxi que bicaadiágacaʼ stidxi Jehová, Dios sticaʼ, ne ca diidxaʼ ni guníʼ profeta Ageo, purtiʼ Jehová, Dios stícabe, biseendaʼ laa. Ngue runi bizulú guidxi que bisihuinni ridxibi Jehová. 13  Pur dxiiñaʼ ni bidii Jehová Ageo casi tobi ni riné stiidxaʼ Jehová, gúdxibe guidxi que: «“Naa nuaaniáʼ laatu”, ná Jehová». 14  Ngue runi guluu Jehová gana* Zorobabel xiiñiʼ Sealtiel —gobernador stiʼ Judá—, Josué sacerdote ni jma risaca xiiñiʼ Jehozadac ne guidubi guidxi que. Para guyécabe ne bizulú bíʼnicabe dxiiñaʼ ra lidxi Jehová, Dios stiʼ ca ejércitu, Dios stícabe. 15  Bizaaca ndiʼ 24 stiʼ beeu xhoopaʼ, lu guiropa iza de cayuni mandar rey Darío.

Nota

^ O «sumo sacerdote». Biiyaʼ glosario, sacerdote ni jma risaca.
^ Riníʼ lá riʼ “ni gule lu ti saa”.
^ O «guni chaahuidu».
^ O «templu stiʼ».
^ O «semiá».
^ O «biniibi Jehová ladxidóʼ».

Copyrights for this publication