Nehemías 2:1-20
2 Ne lu beeu Nisán,* ante gusaa rey Artajerjes gande iza de cayuni mandar, bedanécabe vinu para laa. Ne casi maca runeʼ, gucuaaʼ vinu que ne bidieeʼ ni laabe. Peru qué huayuu dxi gúʼyabe naa nuaaʼ triste.
2 Ngue runi ora biʼyaʼ rey que naa, gúdxibe naa: «Cayuuyaʼ naguunduʼ nuuluʼ.* ¿Xi cayácaluʼ? Pa lii nazaaca nuuluʼ yaʼ, zuluáʼ ladxidoʼloʼ nga nuu triste». Óraque guizáʼ bidxibeʼ.
3 Para rabeʼ rey que: «¡Guibániluʼ xadxí, rey! Ximodo qué chuaaʼ triste pa binitilú guidxi ra gaʼchiʼ ca bixhozebiidaʼ* ne bizaaquicabe ca puertaʼ stini».
4 Para gunabadiidxaʼ rey que naa: «¿Yanna yaʼ? ¿Xi nuuluʼ gúniluʼ?». Oraqueca bineʼ orar Dios ni nuu guibáʼ.
5 Ne bicabeʼ laabe: «Rey stinneʼ, pa ruuyuʼ jneza ne pa naluʼ la? bidii lugar naa chaaʼ Judá, guidxi ra gaʼchiʼ ca bixhozebiidaʼ, para ganda guneʼ chaahueʼ ni».
6 Zuba reina* que cueʼ rey que ora gudxi rey que naa: «¿Pabiáʼ tiempu cheluʼ yaʼ? ¿Padxí guibiguétaluʼ?». Para bidii rey que lugar chaaʼ ne gudxeʼ laabe pabiáʼ tiempu chaaʼ.
7 Despué gudxeʼ rey que: «Pa naluʼ la? rey, galán pa gudiicabe naa carta para gudieeʼ ca gobernador stiʼ ca guidxi ni nuu ladu riaaziʼ gubidxa de guiiguʼ Éufrates* ti gudiicabe lugar naa tideʼ dede chindayaʼ Judá.
8 Ne gudiicabe naa ti carta para Asaf, hombre rapa Parque stiʼ Rey,* ti gudiibe naa yaga para gaca muríu para ca puertaʼ stiʼ Yoo ra riuu ca soldadu ni nuu gaxha de ra templu que, para ca muru stiʼ guidxi ca ne para yoo ra chindezaʼ». Ne bidii rey que naa ca carta que, purtiʼ nachaʼhuiʼ Dios stinneʼ ne bidiináʼ naa.
9 Despué yendayaʼ ra nuu ca gobernador stiʼ ca guidxi ni riaana ladu riaaziʼ gubidxa de guiiguʼ Éufrates ne bidieeʼ laacabe ca carta stiʼ rey que. Laaca bisendané rey que naa caadxi xaíque soldadu ne hombre riguiʼbaʼ caballu.
10 Ora gunna Sanbalat horonita ne Tobías, ti xaíque* ammonita, que ni la? guizáʼ bidxiichicaʼ xiñee beeda tuuxa para gacané guidxi Israel.
11 Gunda dxi yendayaʼ Jerusalén. Gudiʼdiʼ si chonna gubidxa,
12 biasaʼ lu gueelaʼ naa ne xcaadxi hombre, ne qué ñabeʼ guirutiʼ ni bicaa Dios stinneʼ naa* guneʼ pur guidxi Jerusalén. Ti maniʼ si biréʼnedu ne décheme nga dxibaʼ.
13 Para bireeʼ huaxhinni que neza ra Puertaʼ stiʼ Valle, gudideʼ frente de ra ridá nisa ni láʼ Beendaʼ Naroʼbaʼ ne yendayaʼ dede ra nuu Puertaʼ stiʼ ca Montón Dé Ludé. Guyaaʼ yeguuyaʼ ximodo nuu ca muru stiʼ Jerusalén, ca ni binidécabe ne ca puertaʼ stini ni bizaaquicabe.
14 De raqué guyaaʼ dede ra nuu Puertaʼ stiʼ ra Ridá Nisa ne yendayaʼ ra nuu Tanque stiʼ Rey, peru maʼ qué ñanda nidideniáʼ maniʼ dxibaʼ deche que.
15 Neca zaqué gudxíbaruaʼ neza ra nuu valle que* neca maʼ huaxhinni, ne ziyuuyaʼ ximodo nuu muru que. Despué bidieeʼ vuelta ne guyuaaʼ neza ra Puertaʼ stiʼ Valle ne biguetaʼ.
16 Qué ganna ca xaíque guidxi que paraa guyaaʼ ne xi cayuneʼ. Purtiʼ caʼruʼ gabeʼ gastiʼ ca judíu nin ca sacerdote nin ca hombre risaca nin ca xaíque guidxi nin xcaadxi trabajador que.
17 Últimu gudxeʼ laacabe: «Maʼ biiyatu guizáʼ feu modo nuunu la? maʼ binitilú Jerusalén ne maʼ bizaaquicabe ca puertaʼ stini. Chuu, guni chaahuinu ca muru stiʼ Jerusalén ti gusaana de guituí lunu».
18 De raqué bisieneʼ laacabe ximodo guca Dios stinneʼ nachaʼhuiʼ né naa ne bidiinabe naa, ne gudxeʼ laacabe xi gudxi rey que naa. Ora binadiaga ca hombre que ndiʼ guniʼcaʼ: «¡Ora, guni chaahuinu ni!». Ngue runi guluusaacabe gana laacabe para gúnicabe dxiiñaʼ galán riʼ.
19 Peru ora gunna Sanbalat horonita que, Tobías xaíque* ammonita que ne Guésem árabe que xi cayúnidu, bizulú biʼniʼ búrlacaʼ laadu, bidxiichinecaʼ laadu ne rábicaʼ laadu: «¿Xi cayúnitu pue? ¿Ñee nuutu gucaalutu rey la?».
20 Para bicabeʼ laacabe: «Dios ni nuu guibáʼ nga chigacané laadu. Ne laadu ca xpínnibe zuni chaahuidu muru ca. Ne laatu la? qué gápatu gastiʼ Jerusalén, qué gápatu derechu guni reclamartu gastiʼ purtiʼ qué huayúnitu gastiʼ pur guidxi riʼ».
Nota
^ Biiyaʼ apén. B15.
^ O «nuuluʼ triste».
^ O «ca familia stinneʼ ni bibani dxiqué».
^ O «reina ni jma risaca».
^ O «ca guidxi ni nuu jma chericaʼ de Guiiguʼ ca».
^ O «bosque stiʼ rey».
^ O «funcionariu».
^ Lit. «ni guluu Dios ndaaniʼ ladxiduáʼ».
^ Raríʼ caniʼni de ti neza nisa.
^ O «funcionariu».
