Nehemías 13:1-31
13 Dxi que biindacabe libru stiʼ Moisés nezalú guidxi que. Ne biiyacabe raqué ná qué chuʼ dxi gudiicabe lugar chuʼ ti ammonita o ti moabita ndaaniʼ xquidxi Dios ni dxandíʼ,
2 purtiʼ qué nidxagalunécabe ca israelita pan ne nisa. Laga gudíxecabe Balaam para guni maldecir laacaʼ. Peru biʼniʼ Dios stidu gueeda gaca maldición que ti ndaayaʼ.
3 Ngue runi, casi peʼ binadiaga guidxi que ni ná Ley que, bizulú bixeleʼ ca israelita de ca binni ni naca de xcaadxi guidxi.*
4 Ante guizaaca ndiʼ, sacerdote ni ruuyaʼ ca cuartu ra riaapaʼ ca cosa ni nuu ra lidxi* Dios stidu nga Eliasib, tobi de ca familia stiʼ Tobías.
5 Bidii Eliasib Tobías ti cuartu naroʼbaʼ ra riaapaʼ cosa. Raqué nga riaapaʼ ofrenda de biidxiʼ,* olíbano, traste ne chii por ciento* de ca biidxiʼ, vinu cubi ne aceite ni naquiiñeʼ guicaa ca levita, ca ni ruundaʼ, ne ca ni rapa ra puertaʼ. Ne laaca raqué nga riaapaʼ ni rudiicabe ca sacerdote.
6 Biaʼ tiempu que, qué guinneʼ diaʼ Jerusalén, purtiʼ lu iza 32 de cayuni mandar Artajerjes, rey stiʼ Babilonia, biguetaʼ ra nuu rey riʼ. Peru gudiʼdiʼ si ti tiempu, gunabaʼ permisu rey que para guireeʼ.
7 Para biguetaʼ Jerusalén ne biiyaʼ guendahuati biʼniʼ Eliasib para guiaana bien né Tobías, bidiibe laa ti cuartu ra riaapaʼ cosa ni nuu lu patiu stiʼ lidxi Dios ni dxandíʼ.
8 Guizáʼ bichiichi ngue naa, ngue runi gucuaaʼ ca cosa stiʼ Tobías ni nuu ndaaniʼ cuartu ra riaapaʼ cosa ne bisaabeʼ cani fuera.
9 Despué bineʼ mandar gusiácabe ca cuartu ra riaapaʼ cosa que ne bidxiguetaʼ ca cosa ni riquiiñecabe ra lidxi Dios ni dxandíʼ, ca ofrenda de biidxiʼ ne olíbano.
10 Laaca gunnaʼ cadi cacaa ca levita ni naquiiñeʼ gudiicabe laacaʼ. Ngue runi gupa xidé biree ca levita ne ca ni ruundaʼ ni runi dxiiñaʼ raqué, ne zecaʼ zigúnicaʼ dxiiñaʼ lu layú sticaʼ.
11 Ngue runi gudindeniáʼ ca xaíque guidxi que ne gudxeʼ laacaʼ: «¿Xiñee maʼ cadi cayápatu lidxi Dios ni dxandíʼ pue?». Despué bisendacaaʼ ca ni biree que ne bidxiguetaʼ laacaʼ para gúnicaʼ xhiiñacaʼ.
12 Ne guiráʼ ca binni de Judá yené chii por ciento de biidxiʼ, vinu nacubi ne aceite ndaaniʼ ca cuartu ra riaapaʼ cosa que.
13 Ngue runi gulieeʼ sacerdote Selemías, Sadoc, ti hombre ni runi copiar stiidxaʼ Dios,* ne Pedaya, tobi de ca levita que, para gápacaʼ ca cuartu ra riaapaʼ ca cosa que. Ni gucané laacabe nga Hanán, xiiñiʼ Zacur, xiiñiʼ Matanías. Guirácabe nácacabe hombre de confianza. Dxiiñaʼ stícabe nga gudiicabe ca bíʼchicabe biaʼ raca caber guicaa cada tobi.
14 Dios stinneʼ, bietenalaʼdxiʼ naa pur guiráʼ ni maʼ bineʼ. Cadi gusiaandaluʼ guiráʼ ni maʼ bineʼ para gusihuinneʼ nadxieeʼ lídxiluʼ ne rusisacaʼ ca dxiiñaʼ raca ndaanini.*
15 Ca dxi que biiyaʼ rutuñee ca binni que uva dxi sábadu, rutópacaʼ biidxiʼ ne rudxiibaʼ cani deche burru, ne redanécabe vinu, uva, duʼgaʼ* ne guiráʼ tipu cosa ndaaniʼ guidxi Jerusalén dxi sábadu. Ngue runi gudxeʼ laacabe maʼ cadi lica gueeda gutoocabe ca cosa que dxi que.*
16 Ne ca binni de Tiro ni nabeza ndaaniʼ guidxi que redanecaʼ benda ne cosa de guiráʼ clase, ne rutoocaʼ ni lu ca binni de Judá. Rúnicabe ni ndaaniʼ guidxi Jerusalén dxi sábadu.
17 Ngue runi gudindeniáʼ ca hombre risaca de Judá ne gudxeʼ laacaʼ: «¿Xi ná xpiaanitu cayúnitu guendaquéiquiiñeʼ riʼ ne cadi cayuni respetartu ley stiʼ sábadu pue?
18 Nga nga ni biʼniʼ ca bixhozebiidatu,* ne nga runi biseendaʼ Dios ca desgracia riʼ luguianu ne luguiáʼ guidxi riʼ. ¿Ne yanna cadi cayuni respetartu ley stiʼ sábadu la? ¿Ñee nuutu guidxiichineruʼ Dios guidxi Israel la?».
19 Ngue runi, ora biiyaʼ maʼ cuchii bandáʼ ca puertaʼ stiʼ Jerusalén, ante guzulú dxi sábadu, bineʼ mandar guseegucabe cani ne cadi guxhélecabe cani dede ora guiluxe dxi sábadu. Laaca gunabaʼ chupa chonna de ca ni racané naa que gápacaʼ ca puertaʼ que ne cadi gudiicaʼ lugar chuʼné binni xiixa para gutoo dxi sábadu.
20 Ngue runi chupa chonna gueelaʼ biaana ca ni runi negocio ne ca ni rutoo gadxé gadxé cosa fuera de guidxi Jerusalén.
21 Para gudindeniáʼ laacabe ne gudxeʼ laacabe: «¿Xi cayúnitu raríʼ? Sti gueelaʼ si guiaanatu frente de muru ca, zaladxeʼ laatu». Dede dxi que maʼ qué ñeedarucabe dxi sábadu.
22 Ne laaca gudxeʼ ca levita cadi naquiiñeʼ gusaana de gusiacaʼ laacaʼ ne gueeda gápacaʼ ca puertaʼ riʼ para guiree dxi sábadu para Dios. Dios stinneʼ, laaca cadi gusiaandaluʼ ndiʼ ne bietenalaʼdxiʼ ni. Lii, ti Dios ni nabé rannaxhii, rinabaʼ lii guialuʼ naa.
23 Tiempu que laaca biiyaʼ bichaganáʼ* caadxi judíu caadxi gunaa asdodita, ammonita ne moabita.
24 Galaa de guiráʼ ca xiiñicabe riniʼcaʼ diidxaʼ asdodeu ne xcalaa que riniʼcaʼ diidxaʼ stiʼ xcaadxi guidxi, peru nin tobi de laacaʼ qué riniʼcaʼ diidxaʼ ni riníʼ ca judíu.
25 Ngue runi gudindeniáʼ ca judíu ne gunabaʼ guiaba maldición luguiacaʼ, gudiñeʼ chupa chonna de ca hombre que ne guxhaʼ guicha íquecaʼ* ne bicaa laacaʼ guni jurarcaʼ lu lá Dios. Gudxeʼ laacaʼ: «Qué zucheelatu ca xiiñidxaapatu ca xiiñicabe ne qué zachaganáʼ ca xiiñitu ca xiiñidxaapacabe nin laatu qué zachaganatu ca gunaa ca.
26 ¿Ñee cadi pur nga bichee Salomón, rey stiʼ Israel la? Qué ñuu xcaadxi rey casi laabe ndaaniʼ xcaadxi guidxi. Gunnaxhii Dios stibe laabe, ngue runi biʼniʼ laabe rey ndaaniʼ guidubi naca guidxi Israel. Neca zaqué, bicaa ca xheelabe, ca ni naca de xcaadxi guidxi, laabe gucheebe.
27 Qué guirá guidxagayaaʼ guendaquéiquiiñeʼ cayúnitu riʼ. ¿Xiñee bicheenetu Dios ne bichaganatu ca gunaa de xcaadxi guidxi ca pue?».
28 Ne tobi de ca xiiñiʼ Joiadá, xiiñiʼ Eliasib sacerdote ni jma risaca que nga xpigudxi Sanbalat, horonita que. Peru guladxeʼ laabe de ra nuaaʼ.
29 Dios stinneʼ, cadi gusiaandaluʼ ni maʼ bíʼnicabe, purtiʼ maʼ biʼniʼ biidicabe dxiiñaʼ de sacerdote ne biʼniʼ biidicabe acuerdu ni guca né ca sacerdote ne ca levita.
30 Bisiayaʼ guidxi que de guiráʼ guendaquéiquiiñeʼ runi ca binni de xcaadxi guidxi, ne gudixheʼ chaahueʼ ca dxiiñaʼ ni runi ca sacerdote ne ca levita, cada tobi né dxiiñaʼ ni raca tocar laa guni.
31 Laaca gudixheʼ chaahueʼ ora gaca caber guedanécabe yaga ne ca primé ni gudii lu layú stícabe.
Dios stinneʼ, cadi gusiaandaluʼ naa ne guluu ndaayaʼ naa.
