好多喺伯特利服務嘅年輕人經常會叫我做“爹哋”、“爸爸”、“叔叔”。我好鍾意佢哋噉樣嗌我。我已經89歲，為耶和華全時服務咗72年。我將呢啲親切嘅稱呼視為耶和華俾我嘅獎賞。根據我事奉耶和華咁多年嘅經驗，我可以由衷噉向呢啲年輕人保證：“唔好沮喪，因為你哋所做嘅，必有獎賞。”（歷代志下15:7）

我父母係從烏克蘭移民到加拿大嘅。佢哋喺馬尼托巴省嘅羅斯本定居。我親愛嘅媽媽生咗8個仔同8個女，當中冇雙胞胎，而我就排名14。爸爸好鍾意睇聖經，佢會喺星期日朝早讀聖經俾我哋聽，不過佢唔鍾意宗教，覺得宗教只係人用嚟賺錢嘅工具。佢經常諷刺話：“耶穌傳道教人，有冇收過人錢吖？”

我嘅兄弟姐妹當中，後來有8個人——4男4女接受咗真理。我家姐露絲去世之前一直都做先驅。佢喺臨終之前嗰段日子一直鼓勵身邊嘅人要留意上帝嘅話語，同佢哋講：“我好想喺新世界見翻你哋。”我哥哥泰迪最初係一個鼓吹地獄永火嘅傳教士。每個星期日早上，佢都會喺電台以强烈嘅措辭發表演講，話罪人會喺地獄受盡折磨，永遠俾火燒。不過後來，佢成為一個忠心嘅見證人，熱心事奉耶和華。

1944年6月，有一日我放學返屋企，見到檯上面放住一本叫做《將臨世界嘅復興》 *嘅册子。我翻開第一頁睇咗吓，然後又睇咗第二頁，跟住我就忍唔住睇晒成本嘞。之後，我就決心效法耶穌，事奉耶和華上帝。

呢本册子係點嚟嘅呢？原來之前，有兩個男人嚟過我哋屋企，問我哋要唔要買啲書刊或册子。我哥哥史蒂夫話：“嗰本册子我 買嘅，5分錢咋。”第二個星期，嗰兩個男人又過嚟我哋屋企。佢哋話，佢哋係耶和華見證人，會用聖經嚟回答人提出嘅問題。佢哋又話，見證人好快會喺温尼伯舉行一個大會。我家姐埃爾茜就住喺嗰個城市。我決定參加呢個大會。

我踩單車去温尼伯，全程有成320公里（200英里）。途中，我喺凱爾伍德鎮停低，因為嗰兩個嚟過我哋屋企嘅見證人就住喺嗰度。我喺逗留期間參加咗聚會，亦知道咗乜嘢係會衆。我亦都明白到，無論男女老幼，每個人都應該好似耶穌噉，逐家逐户向人傳道。

喺温尼伯，我遇到從安大略省北部嚟參加大會嘅哥哥杰克。大會頭一日，一個弟兄宣布會有浸禮。於是杰克同我就決定喺大會受浸。我哋決心受浸之後就盡快做先驅。所以大會一結束，杰克就投身全時服務。我當時只係16歲，仲要返學，所以到第二年先至做先驅。

我同斯坦·尼哥遜一齊喺馬尼托巴省嘅蘇里斯鎮開始做先驅。我好快就明白到，做先驅唔係一帆風順嘅。雖然積蓄越來越少，但我哋繼續向人傳道。有一次，我哋結束一日嘅傳道工作之後覺得好肚餓，不過身上一分錢都冇。返到屋企嗰時，我哋好驚喜噉發現，門口居然放住一大袋食物！直到今日，我哋都唔知道係邊個俾我哋嘅。嗰一晚，我哋食得好滿足。我哋喺逆境之下冇灰心沮喪，真係得到好大嘅獎賞！嗰個月嘅月尾，我嘅體重居然係有史以來最重嘅！

幾個月之後，我哋被委派到吉爾伯特普萊恩斯鎮。呢個鎮位於蘇里斯北面240公里（150英里）。當時，每個會衆嘅講台上都展示咗一張好大嘅表格，記錄咗會衆每個月嘅傳道情況。如果某個月嘅傳道時間減少咗，我就會對會衆發表演講，强調弟兄姊妹要做多啲。有個年長嘅先驅姊妹，丈夫唔喺真理，佢喺聚會結束之後眼濕濕噉同我講：“我盡咗力㗎喇，但係我真係做唔到更多。”我好内疚，仲喊咗出嚟，亦都向佢道歉。

好多精力充沛嘅年輕弟兄都同我一樣，好容易犯噉嘅錯誤，然後對自己感到失望。不過我嘅經驗係，與其灰心喪氣，不如從中吸取教訓，並且謹記在心。只要保持忠心，就必得獎賞。

我好榮幸喺21歲嘅時候就參加咗第14屆基列學校，喺1950年2月畢業。有四分一嘅學員被派到加拿大嘅魁北克省，嗰度係法語嘅地區。見證人喺當地受到猛烈嘅宗教迫害。我被委派到魁北克省金礦區嘅瓦勒多鎮。有一日，我哋一班人去附近嘅瓦爾塞訥維爾村傳道。當地嘅教士恐嚇我哋話，如果我哋唔即刻離開就對我哋唔客氣。因為噉，我將教士告上法庭，結果佢被判罰款。 *

呢個事件同其他好多類似嘅事件成為“魁北克之戰”嘅一部分。魁北克省被羅馬天主教會控制咗超過三百年。教士同佢哋嘅政治盟友迫害耶和華見證人。雖然呢段時期好艱難， 而且我哋人數唔多，不過我哋並冇灰心沮喪。誠心正意嘅魁北克人響應真理。我好榮幸幫助咗一啲人認識真理。我有機會同一個十口之家討論聖經，結果佢哋全家都事奉耶和華。佢哋嘅勇敢榜樣激勵其他人離開天主教會。我哋繼續傳道，最終獲得勝利！

1956年，我被委派到海地。對好多啱啱去到嗰度嘅海外傳道員（現稱特派傳道員）嚟講，學習法文唔係一件容易嘅事。雖然佢哋識嘅法文唔多，但係當地人都願意聽佢哋傳講嘅信息。海外傳道員斯坦利·博古斯話：“令我哋驚訝嘅係，嗰度嘅人好熱心噉幫助我哋表達自己想講嘅話。”起初，我以為自己喺魁北克學過法文，應該冇問題。不過好快我就留意到，當地大部分嘅弟兄姊妹淨係識講海地克里奧爾語。所以，如果海外傳道員想有效噉作見證，就一定要學習當地語言。於是我哋努力噉樣做，而且得到好好嘅成果。

為咗進一步幫助當地嘅弟兄姊妹，中央長老團批准我哋將《守望台》同其他書刊翻譯成海地克里奧爾語。之後，全國出席聚會嘅人數大幅增加。1950年，海地只有99個傳道員，不過到咗1960年，傳道員人數已經超過800！就喺嗰時，我被派去伯特利服務。1961年，我有殊榮成為王國職務訓練班嘅一個導師。我哋培訓咗40個長老同特别先驅。喺1962年1月嘅大會，我哋鼓勵符合資格嘅當地弟兄擴大服務。後來，佢哋當中有啲人被委任做特别先驅。呢個真係好適時，因為好快我哋就要面對迫害。

1962年1月23日，大會啱啱結束，就有警察嚟分部逮捕我同海外傳道員安德魯·得阿米科，亦都將1962年1月8日刊嘅法語《警醒！》全 部沒收。原因係，嗰期《警醒！》引錄咗某啲法語報刊關於海地人施行巫術嘅報道，而有啲人唔鍾意呢啲内容，以為係我哋分部寫嘅。幾個星期之後，海外傳道員就被驅逐出境。 * 不過，受過培訓嘅本地弟兄做得好好，繼續執行當地嘅工作。今日，我因為佢哋所表現嘅忍耐同喺屬靈上嘅進步而感到高興。而家，佢哋甚至有海地克里奧爾語嘅《聖經新世界譯本》。呢個係我哋以前夢寐以求嘅。

離開海地之後，我被委派去中非共和國做海外傳道員。我後來有殊榮從事探訪工作，之後又成為分部監督。

喺嗰時，好多王國聚會所都非常簡陋。我學習點樣喺灌木叢收集茅草搭屋頂。因為我係個新手，好多經過嘅人，見到我雞手鴨腳嘅樣，就好好奇噉望住我。不過，當地嘅弟兄姊妹見到我咁落力就受到鼓勵，更積極噉建造同維修佢哋自己嘅王國聚會所。當地嘅宗教領袖嘲笑我哋，因為佢哋用鐵皮嚟整教堂嘅屋頂，而我哋就只係用茅草。我哋冇受影響，繼續使用我哋嘅聚會所。後來，一場暴風雨襲擊首都班吉嘅時候，佢哋就笑唔出嘞。佢哋嘅鐵皮屋頂俾暴風雨吹咗落街，而我哋聚會所嘅茅草屋頂就安然無恙。為咗更好噉督導王國傳道工作，我哋喺短短嘅5個月内，就起好一個新嘅分部同海外傳道員之家。 *

1976年中非共和國禁止我哋嘅傳道工作。我被委派到乍得嘅首都恩賈梅納。喺嗰度，我遇到夏佩。佢係一個好熱心嘅特别先驅，嚟自喀麥隆。我哋喺1978年4月1日結婚。同一個月，内戰爆發。我哋同好多人一樣逃去乍得南部。戰爭結束之後，我哋返翻屋企，發現嗰度已經成為一個武裝組織嘅指揮部。我哋唔單止冇晒啲雜誌，連婚紗同結婚禮物都冇埋。不過，我哋並冇灰心沮喪，因為我哋有嘅係一生嘅伴侶，亦都有更多嘅工作要做。

大約兩年之後，中非共和國撤銷對見證人嘅禁制令，於是我哋返去嗰度從事探訪工作。我哋嘅屋企係一部車，入面有張摺疊床，一個可以裝200升（53加侖）水嘅桶，一個冰箱同一個煤氣爐。探訪嘅旅途一啲都唔容易。有一次，我哋途中至少喺117個關卡俾警察截停檢查。

當地嘅氣温經常高達攝氏50度（華氏122度）。大會嗰陣，有時好難有足够嘅水施行浸禮。所以，弟兄要挖開乾咗嘅河床，將揾到嘅水逐啲逐啲收集喺個大桶度。好多時，新人就係喺桶入面受浸嘅。

1980年，我哋被派到尼日利亞。有兩年半嘅時間，我哋喺嗰度幫手籌備新分部嘅建築工作。弟兄買咗一個兩層高，可以拆開嘅移動倉庫。我哋打算將倉庫拆開之後，搬去新分部嘅工地再重新安裝。有一日，我幫手拆倉庫，就爬到倉庫上面。到咗中午，我想爬翻落去嘅時候，冇留意下面嘅部分已經俾人拆咗，結果一腳踩空就跌咗落嚟。我嘅情 況睇嚟好嚴重，不過醫生睇過X光片之後，同夏佩講：“唔使擔心，佢只係扭傷咗，一個星期左右就冇事㗎喇。”

1986年，我哋搬到科特迪瓦從事探訪工作。我哋要探訪嘅地區亦都包括附近嘅布基納法索。我冇諗到，一年之後我哋會係布基納法索居住一段時間。

我喺1956年離開加拿大。事隔47年之後，即係2003年，我同夏佩一齊返到加拿大嘅伯特利。雖然我哋嘅國籍係加拿大，但係我哋覺得自己係屬於非洲嘅。

2007年，我喺79歲嘅時候，同太太再次返到非洲！我哋被委派到布基納法索。喺嗰度，我成為地區委員會嘅成員。後來呢度嘅辦公室成為遠程翻譯處，由貝寧分部管理。2013年8月，我哋又被委派到貝寧嘅伯特利。

雖然我嘅健康情況唔係咁好，但係我仲係好鍾意做傳道。過去三年期間，我喺其他長老嘅幫助同太太嘅支持下，好開心見到自己嘅兩個聖經學生，熱代翁同弗雷格斯受浸。而家，佢哋繼續熱心噉事奉耶和華。

喺呢段期間，我同太太被派去南非分部。我喺嗰度受到伯特利家庭悉心照顧。南非係我喺非洲服務嘅第七個國家。2017年10月，我哋得到一個好大嘅祝福。我哋被邀請參加紐約沃威克總部嘅呈獻禮。呢件事的確令我哋終生難忘！

《1994耶和華見證人年鑑》255頁話：“我哋鼓勵多年來堅忍不拔為耶和華工作嘅人：‘要勇敢，唔好沮喪，因為你哋所做嘅，必有獎賞。’”（歷代志下15:7）我同夏佩決心聽從呢個勸告，亦都鼓勵其他人噉樣做。