向人问好嘅力量
“你好！今日点呀？”
你肯定经常会噉样向人问好，可能同时仲会同对方握手或者拥抱。每个地方嘅习俗同用语可能唔一样，但系打招呼嘅基本方式都差唔多。如果我哋冇同人打招呼，或者冇回应其他人嘅问好，噉人哋就可能会觉得我哋冇爱心或者冇礼貌。
不过，唔系所有人都会主动向人问好。有啲人因为怕丑或者自卑就唔敢同人打招呼，有啲人就觉得好难向唔同种族或者唔同文化背景嘅人打招呼。不过，即使系简短嘅问候都可以带嚟美好嘅结果。
请谂吓：“向人问好嘅目的系乜嘢？关于打招呼，上帝嘅话语教导我哋乜嘢？”
向“各种各样嘅人”问好
哥尼流系第一个归信嘅外邦人。使徒彼得欢迎佢加入基督徒会众嘅时候话：“上帝系唔偏心嘅”。（使徒行传10:34）后来，彼得写信话，上帝“愿人人最终都悔改”。（彼得后书3:9）我哋可能觉得，呢啲经文主要系同学习紧圣经嘅人有关，但系彼得亦都劝勉基督徒“要尊重各种各样嘅人，爱整个弟兄团体”。（彼得前书2:17）经文鼓励我哋要向唔同种族、唔同文化背景嘅人问好。我哋噉样做，就表明自己尊重同爱佢哋。
使徒保罗鼓励会众嘅人话：“你哋要彼此乐意接纳，就好似基督乐意接纳咗我哋一样”。（罗马书15:7）保罗特别提到一啲帮助佢“坚强起嚟”嘅弟兄姊妹。作为上帝嘅子民，我哋今日遭受撒但猛烈攻击，所以弟兄姊妹更加需要受到强化。（歌罗西书4:11；启示录12:12,17）
圣经嘅例子表明，向人问好除咗使人觉得受到欢迎，仲可以带嚟更多益处。
令人安心、得到鼓励、感受到爱
耶和华准备将爱子嘅生命转到马利亚腹中嘅时候，差派天使同马利亚讲话。天使一开始就话：“蒙大恩嘅人，你好！耶和华与你同在嘞。”马利亚“非常不安”，唔明白点解天使噉样同佢讲。天使睇出呢点，就话：“马利亚，唔使惊，你蒙上帝眷顾嘞。”天使向马利亚解释，上帝会使佢生下弥赛亚。马利亚唔再感到不安，谦卑噉回答话：“我系耶和华嘅婢女！愿你所讲嘅事喺我身上实现。”（路加福音1:26-38）
对呢个天使嚟讲，可以受耶和华差遣系一个殊荣，不过佢并冇觉得同一个唔完美嘅人讲话就有失身份。佢传达信息之前，先向马利亚问好。我哋可以点样学习天使嘅榜样？我哋应该乐意向其他人问好，随时鼓励佢哋。哪怕只系讲几句话，我哋都可以使弟兄姊妹感受到佢哋的确系耶和华大家庭嘅一分子。
保罗认识好多小亚细亚同欧洲会众嘅人，佢喺书信入面个别噉问候佢哋。我哋从罗马书16章可以睇出呢点。保罗向好多基督徒同工问好。保罗提到“我哋嘅姊妹”菲比，并促请弟兄姊妹“要因为主而接待佢，给予圣民应得嘅礼遇，喺佢需要［佢哋］协助嘅事上协助佢”。保罗向百基拉同亚居拉问好，话：“唔单止我感谢佢哋，连所有外邦人嘅会众亦都感谢佢哋。”佢亦都向一啲今日好少人知道嘅人问好，例如“［佢］所爱嘅以拜尼杜”、为主辛劳嘅“杜菲拿同杜富莎”。冇错，保罗好乐意问候佢嘅弟兄姊妹。（罗马书16:1-16）
请想象吓，呢啲弟兄姊妹知道保罗记得自己，佢哋会感到几咁温暖。佢哋对保罗嘅爱，对同工嘅爱，一定因此大大加深！呢啲充满爱心嘅问候亦都会使其他基督徒受到鼓励，帮助佢哋保持坚定嘅信心。冇错，通过问候嚟表现个人关注并且真心称赞人，可以加深弟兄姊妹嘅友谊，使上帝嘅忠仆团结一致。
保罗喺部提奥利嘅港口上岸，准备出发去罗马嘅时候，当地嘅基督徒嚟迎接佢。保罗远远睇见佢哋，“就感谢上帝，壮起胆嚟”。（使徒行传28:13-15）有时，我哋只系向人微笑或者挥手打个招呼。不过，呢啲简单嘅举动都可能会使一个抑郁或悲伤嘅人得到强化。
建立共通点
使徒雅各觉得有必要严厉谴责一啲基督徒，因为佢哋同世俗友好、喺属灵上通奸。（雅各书4:4）不过请留意佢喺信嘅开头点样写：
“上帝同主耶稣基督嘅奴隶雅各，写信俾分散各地嘅十二部族。你哋好！”（雅各书1:1）雅各先表明自己同佢哋都系上帝嘅仆人，呢种问好嘅方式肯定使读到呢封信嘅人更容易接受劝告。冇错，一个谦卑嘅问候能够打开话题，甚至可以进一步讨论一啲严肃嘅问题。
我哋同人打招呼，即使只系简短嘅问候，都需要态度诚恳，表达出真挚嘅爱。就算对方冇作出回应，我哋都应该噉样做。（马太福音22:39）爱尔兰嘅一个姊妹，有一次喺聚会差唔多要开始嗰阵先到达王国聚会所。佢匆匆忙忙入去嘅时候，一个弟兄转身，面带微笑向佢打招呼：“你好，好高兴见到你呀。”姊妹咩都冇讲就坐低。
几个星期之后，姊妹同呢个弟兄讲，最近屋企发生咗一啲令佢烦恼嘅事。佢话：“嗰晚我情绪好低落，几乎唔想嚟参加聚会。我唔记得聚会嘅内容，只系记得你嘅问候。你嘅问候的确令我觉得自己受到欢迎。多谢你！”
呢个弟兄唔知道自己简短嘅问候有咁大嘅力量，佢话：“姊妹话俾我知，嗰短短几个字对佢有几咁大嘅意义。我好庆幸同佢打咗招呼，感觉真系好！”
所罗门话：“要将食物撒喺水面上，多日之后就有回报。”（传道书11:1）既然向人问好可以产生咁大嘅力量，噉我哋对基督徒同工就更应该噉样做。无论其他人定系我哋自己都会因此而喜乐大增，所以千祈唔好低估向人问好嘅力量。
