Kaʼans a paalaleʼex

¿Ka wuʼuyik wa yaan hora maʼ ta chʼaʼabal en cuentail?

WA MAʼ tu chʼaʼabal en cuentail máak tumen u maasil, yoʼolal u luʼumil, u raza, u tʼaan wa yoʼolal baʼaxoʼob suuk u beetkeʼ, jeʼel u yuʼubik maʼ yaabiltaʼaneʼ. ¿Ka wuʼuyik wa yaan hora maʼ ta chʼaʼabal en cuentail?  *...

Bejlaʼeʼ yaan k-ilik u tsikbalil juntúul máax bey tu yuʼubilubaʼoʼ. U kʼaabaʼeʼ Mefibóset. Wa yaan hora tsʼoʼok a wuʼuyikaba jeʼex letiʼoʼ, yaan a kanik yaʼab baʼaloʼob. ¿Máax le máakaʼ, yéetel baʼaxten bey tu yuʼubilubaoʼ?

Mefiboseteʼ u hijo Jonatán, u amigo David. Táanil tiʼ u kíimil tiʼ junpʼéel baʼateleʼ, Jonataneʼ tu yaʼalaj tiʼ David ka kanáantaʼak u paalal. Ka máan kʼiin, le ka tu beetaj u reyileʼ, Davideʼ tu kʼaʼajsaj baʼax aʼalaʼabtiʼ tumen u amigo. Teʼ kʼiinoʼob jeʼeloʼ, Mefiboseteʼ láayliʼ kuxaʼaneʼ. Tu chichnil Mefiboseteʼ úuch loob tiʼ, le oʼolal pʼáat maʼ tu jach páajtal u xíimbal. ¿Ta tsʼáaj cuenta baʼaxten yaan hora tu yuʼubaj bey maʼatech u chʼaʼabal en cuentaileʼ?...

Davideʼ u kʼáat kaʼach u kanáant u hijo Jonatán; le oʼolal tu yaʼalaj ka bisaʼak kajtal naatsʼ tiʼ letiʼ tu kaajil Jerusalén, tu yaʼalajtiʼeʼ yaan u tsʼáaik baʼal u jaant sáamsamal. Tsʼoʼoleʼ Zibá yéetel u paalal bey xan u j-meyajoʼobeʼ tsʼaʼab u kanáantoʼob Mefibóset. U jaajileʼ Davideʼ jach maʼalob tu kanáantil Mefibóset. ¿Baʼax a tuklik úuch ka tsʼoʼoki?...

Davideʼ anchaj yaʼab talamiloʼob ichil u familia. Absalón, u hijoeʼ, tu yóotaj u luʼs le reino  tiʼoʼ. Le oʼolal Davideʼ púutsʼi, yéetel yaʼab máaxoʼob binoʼob tu yéetel. Maʼ xaaneʼ Mefiboseteʼ taakchaj u bin tu yéeteloʼob, baʼaleʼ tumen maʼ tu jach páajtal u xíimbaleʼ maʼ béeychaj u biniʼ.

Tsʼoʼoleʼ Zibaeʼ tu tusaj David: tu yaʼalajtiʼeʼ kex wa ka béeyak u bin Mefiboseteʼ, maʼ ken u yóote tumen u kʼáat kaʼach u beet u reyil. Davideʼ tu creertaj baʼax aʼalaʼabtiʼ, le oʼolal tu tsʼáaj tiʼ Zibá le luʼum utiaʼal Mefibóset kaʼachoʼ. Le ka tsʼoʼok u baʼateʼel David yéetel Absaloneʼ, suunaj Jerusalén. Le ka suunaj Davideʼ, Mefiboseteʼ tu yaʼalaj u jaajil tiʼ, David túuneʼ tu yaʼalaj tiʼ Zibá ka pʼáatak tiʼ tu kaʼatúulal le luʼumoʼ. ¿Bix a tuklik tu yuʼubiluba Mefibóset?...

Maʼ tsʼíikilnajiʼ yéetel maʼ tu tuklaj wa maʼ maʼalob baʼax tu beetaj Davidiʼ. U yojel kaʼach tsʼoʼok u yantal yaʼab talamil tiʼ David yéetel chéen u kʼáat gobernar ich jeetsʼelil. Le oʼolal Mefiboseteʼ tu yaʼalaj ka pʼáatak tuláakal le luʼum tiʼ Zibaoʼ. Tumen baʼax maas kʼaʼanaʼan kaʼach u yilkeʼ letiʼe u suut reinar David, le máax meyajtik Jéeoba, tu kaajil Jerusalenoʼ.

Mefiboseteʼ jach muʼyajnaji yéetel mantatsʼ ku yuʼubik kaʼach maʼatech u chʼaʼabal en cuentail. Baʼaleʼ yaabiltaʼab yéetel kanáantaʼab tumen Jéeoba. ¿Baʼax ku kaʼansiktoʼon le tsikbalaʼ?... Ku kaʼansiktoʼoneʼ kex yaan hora maʼalob baʼax k-beetkeʼ jeʼel u yantal máax aʼalik baʼal maʼ jaaj t-oʼolaleʼ. Jesuseʼ tu yaʼalaj: «Wa yóokʼol kaab ku pʼektikeʼexeʼ ojéelteʼexeʼ teen táanil tu pʼektajen». Jesuseʼ jach pʼektaʼabi tsʼoʼoleʼ kíimsaʼabi. Maʼ unaj k-tuʼubsikeʼ wa k-beetik baʼax maʼalobeʼ Jéeoba, le jaajil Diosoʼ, yaan u yaabiltkoʼon, bey xan Jesús u Hijo.

Xok ta Biblia

1 Samuel 20:15-17, 41, 42

2 Samuel 4:4; 9:1-10; 19:24-30

Juan 15:18

[Tsolajil]