Le bix unaj k-ilik le baʼaxoʼob ku káalkunajoʼoboʼ

Le Bibliaoʼ ku yaʼalik unaj u tsʼaʼabal u pʼis tuláakal baʼal. Tak kaabeʼ upʼíit ka jaantaʼakeʼ maʼalob, baʼaleʼ u jaantaʼal yaʼabeʼ jeʼel u beetik kʼaaseʼ (Pro. 25:27). Láayliʼ bey u yúuchul yéetel le vino u tsʼaamaj Jéeobaoʼ bey xan yéetel uláakʼ baʼaloʼob jeʼel u káalkunajeʼ. Jeʼex u yaʼalik le Bibliaoʼ maʼ unaj u píitmáan u yuʼukʼuloʼobiʼ. Wa maʼ u beetaʼal le baʼax ku yaʼalik le Biblia yoʼolal lelaʼ, jeʼel u xuʼulul u lúubul utsil máak tiʼ Dioseʼ, u náachtal tiʼeʼ yéetel jeʼel u bisik tak tiʼ kíimileʼ. Le Bibliaoʼ bey u yeʼesik tiʼ le tsolnuʼukoʼob ku taaskoʼ bey xan tiʼ le baʼaxoʼob ku yúuchul tiʼ le máax ukʼikoʼ (Pro. 23:29-31).

Maʼ xaaneʼ yaan tiʼ súutukoʼob maʼ maʼalob ka ukʼaʼak mix upʼíit baʼal ku káalkunajiʼ, tsʼoʼoleʼ yaan kʼiineʼ jeʼel u beetik kʼaas tiʼ máakeʼ. Uláakʼoʼobeʼ ku kanáantik maʼ u yuʼkoʼob utiaʼal maʼ u beetkoʼob u tʼóochpajal mix máak, tumen ku yeʼeskoʼob yaabilaj yéetel tumen ku chʼaʼikoʼob en cuentai baʼax ku tuklik u maasil (Rom. 14:21).

Jéeobaeʼ tu yaʼalaj tiʼ le sacerdoteʼob yéetel tiʼ le levitaʼob maʼ u yuʼkoʼob mix baʼal ku káalkunaj táanil tiʼ u yokol u beetoʼob u meyajoʼob teʼ tabernáculo wa teʼ templooʼ, tumen jeʼel tak u kíimloʼob wa ka u beetoʼobeʼ (Lev. 10:8, 9; Eze. 44:21). Jeʼel u páajtal u yuʼkoʼob wa maʼ ken u beetoʼob mix upʼéel meyaj yaan yil yéetel u adorartaʼal Jéeobaeʼ, baʼaleʼ maʼ unaj u píit máan u yuʼkoʼobiʼ (1Cró. 9:29). Ken u beet u meyajoʼobeʼ, «maʼ uts u tsʼáaikubaʼob u yukʼoʼob vino le [reyoʼoboʼ], mix ka [...] káalakoʼob le j-méekʼtáanoʼoboʼ, tumen jeʼel u tuʼubsikoʼob le aʼalmajtʼaanoʼ, jeʼel xan u [xuʼulul] u beetikoʼob baʼax noʼojaʼan tu yoʼolal óotsiloʼobeʼ» (Pro. 31:4, 5). Le ancianoʼoboʼ «maʼ unaj u káaltal[oʼobiʼ]» yéetel le siervo ministerialoʼoboʼ «maʼ unaj u [...] káaltaloʼob[iʼ]» (1Ti 3:3, 8).