¿Kʼajaʼan wa tech?

¿Ta jóoʼsaj wa utsil tiʼ a xokik le revista U Pʼíich Tulumil Kanan le maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

• ¿Baʼaxten jach kʼaʼabéet u chúukpajal k-óol meyajt Jéeoba?

Tumen wa k-beetkeʼ k-eʼesik yaabilmaj Jéeoba, tiaʼanoʼon tu tséel u gobernacioneʼ yéetel k-eʼesik chéen táan u tuus le Kʼaasilbaʼaloʼ. Tsʼoʼoleʼ, ken u pʼis óoltoʼon Jéeobaeʼ yaan u chʼaʼik en cuentai le toj kuxtal yantoʼonoʼ, lelaʼ jach kʼaʼanan utiaʼal ka yanaktoʼon le kuxtal minaʼan u xuuloʼ (15/12, táan juʼunoʼob 4-6).

• ¿Máakalmáak le jejeláas kʼaabaʼob tsʼaʼan tiʼ Jesús ku chíikbesik jach yaan u béeychajal le baʼax u tukulmaj Dios u beetkoʼ?

Le juntúuliliʼ Paaloʼ, le Tʼaanoʼ, Amén, le Máax ku tʼaan t-oʼolal tu táan Diosoʼ, u Nojchil le Sacerdoteʼoboʼ yéetel le Chʼiʼibal aʼalaʼan kun taaloʼ (15/12, táan juʼun 15).

• ¿Bix jeʼel u yantaltoʼon kiʼimak óolal ken táakpajkoʼon teʼ kʼaʼaytajoʼ?

Letiʼe ka k-jach tsʼíibolt k-áantik uláakʼ máakoʼoboʼ yéetel k-tuukul tiʼ le utsiloʼob jeʼel u taasiktiʼoboʼ. Unaj xan k-kʼaʼaytaj yéetel u tuukulil k-káajsik upʼéel xook. Tsʼoʼoleʼ wa teʼ tuʼux k-kʼaʼaytaj óoliʼ mix máak u kʼáat u kʼameʼ, jeʼel u páajtal k-kaxtik uláakʼ bix jeʼel k-kʼaʼaytaj utiaʼal ka u kʼamoʼobeʼ (15/1, táan juʼunoʼob 8-10).

• Le baʼax ku yaʼalik le Bibliaoʼ, ¿bix u yáantkoʼon k-il wa maʼalob le baʼax ku beetaʼal ken muʼukuk utúul kimenoʼ?

Le máaxoʼob meyajtik Jéeobaoʼ maʼ kʼaas u yilkoʼob u yokʼol máak ken kíimik utúul u láakʼtsililiʼ, baʼaleʼ u yojloʼobeʼ ken kíimik máakeʼ jach xuʼulul ku beetik u kuxtal. Le oʼolaleʼ, kex ku yaʼalaʼaltiʼob baʼal tumen máaxoʼob maʼ J-jaajkunajoʼobeʼ, maʼatech u beetkoʼob mix upʼéel tiʼ le baʼaloʼob ku tsʼáaikoʼob naʼatbil yaan u pixan máak yéetel jeʼel u beetik kʼaas wa uts tiʼ máakeʼ. Utiaʼal maʼ u yantal kʼuuxililoʼobeʼ, yaan máaxoʼobeʼ ku tsʼíibkoʼob baʼax unaj u beetaʼal ken kíimikoʼob (15/2, táan juʼunoʼob 29-31).

• U «juʼunil j-tiʼibil bej (libro de Jasar)» yéetel «u tsʼíibil juʼunil u baʼateloʼob Yuumtsil[eʼ]», ¿Dios wa beet u tsʼíibtaʼaloʼob, baʼaleʼ saʼatoʼob? (Jos. 10:13; Núm. 21:14).

Maʼatech. Maʼ xaaneʼ le tsʼíiboʼob chʼaʼachiʼitaʼab tumen jujuntúul tiʼ le máaxoʼob tsʼíib le Bibliaoʼ, chéen jujumpʼéel libroʼob ku tʼaanoʼob tiʼ baʼaxoʼob uchaʼan tiʼ u kaajil Israel. Baʼaleʼ maʼ Dios beet u tsʼíibtaʼaloʼobiʼ (15/3, táan juʼun 32).