ADÁN yéetel Evaeʼ maʼ tu yuʼuboʼon u tʼaan Diosiʼ le oʼolal tu máansoʼobtoʼon le kʼeban yéetel le kíimiloʼ. Kex beyoʼ Dioseʼ maʼ tu kʼexaj baʼax u tukultmaj u beetik yoʼolal wíinikiʼ. Desde tu káajbal le Biblia tak tu tsʼoʼokbaleʼ chíikaʼan u yilaʼal Dioseʼ maʼ u kʼex baʼax u tukultmaj u beetkiʼ.

• «Le utsil máakoʼoboʼ bíin u tiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul» (Salmo 37:29).

• «Yuumtsileʼ, bíin u xuʼuls junpuliʼ le kíimiloʼ, bíin u choʼo u jaʼil u yich tuláakal máak» (Isaías 25:8).

• «Le kíimiloʼ letiʼe u tsʼook enemigo kun xuʼulsbiloʼ» (1 Corintoiloʼob 15:26).

• «Maʼ tun yantal kíimil, mix okʼol, mix yaj óolal, mix kʼiʼinamil» (Apocalipsis 21:4).

¿Baʼax ken u beet Dios utiaʼal u xuʼulsik le kíimiloʼ? Jeʼex tsʼoʼok k-ilkoʼ le Bibliaoʼ ku yaʼalikeʼ «le utsil máakoʼoboʼ bíin u tiaʼalintoʼob le luʼumaʼ». Chéen baʼaleʼ ku yaʼalik xaneʼ minaʼan mix máak «ka u beet uts mantatsʼ» wa «maʼ u kʼebanchajal» (Eclesiastés 7:20). Yoʼolal lelaʼ maʼ xaaneʼ jeʼel k-tuklik maʼ kun béeytal le baʼax u yaʼalmaj u beetik Diosoʼ. Baʼaleʼ kʼaʼajaktoʼoneʼ Dioseʼ ‹maʼ tu páajtal u tuus› (Tito 1:2). ¿Baʼax kʼaʼabéetchaj u beetik utiaʼal u béeytal baʼax u tukultmaj kaʼach yoʼolal wíinik?

Tumen u yaabiltmoʼoneʼ Jéeobaeʼ tu tsʼáaj junpʼéel boʼol utiaʼal u salvartikoʼon tiʼ le kíimiloʼ. Le boʼoloʼ unaj jach igual yéetel le bukaʼaj ku kʼáataʼaloʼ, jaʼaliʼ bey jeʼel u yutstal le baʼax úuchoʼ. Chéen baʼaleʼ mix máak jeʼel u páajtal kaʼach u beetik lelaʼ tumen tuláakloʼon kʼebanoʼon, le oʼolal le Bibliaoʼ ku yaʼalik: «Mix máak jeʼel u páajtal u [salvartikuba] tu juunal u yóoleʼ mix tu páajtal u boʼotik tiʼ Yuum [Dios] utiaʼal ka toʼokok u kuxtal. ¡Minaʼan taakʼin utiaʼal ka páatak u maʼanal u kuxtal juntúul máak[!]» (Salmo 49:7, 8).

Juntúul kʼeban máakeʼ maʼ tu páajtal u boʼotik u kʼeban u maasil, kéen kíimkeʼ jach chéen u kʼeban ku boʼotik (Romailoʼob 6:7). Le oʼolaleʼ utiaʼal u boʼotaʼal u kʼeban tuláakal máakeʼ kʼaʼabéet kaʼach u kuxtal juntúul máak minaʼan u kʼeban (Hebreoʼob 10:1-4).

Dios túuneʼ tu túuxtaj u Hijo way Luʼum utiaʼal ka síijik bey juntúul máak minaʼan u kʼebaneʼ (1 Pedro 2:22). Jesuseʼ tu tsʼáaj «u kuxtal bey junpʼéel boʼol utiaʼal u salvartaʼal yaʼab máakoʼobeʼ» (Marcos 10:45). U kuxtal Jesús tu kʼuboʼ letiʼe boʼol kʼaʼabéet utiaʼal u xuʼulsaʼal tiʼ le kíimiloʼ yéetel ka yanaktoʼon le kuxtal minaʼan u xuuloʼ (Juan 3:16).

Teʼ kʼiinoʼobaʼ táan u béeychajal le profecíaʼob yanoʼob teʼ Bibliaoʼ. Bejlaʼeʼ kuxaʼanoʼon ‹tu tsʼook kʼiinoʼob›, le oʼolal jach talam le kuxtaloʼ (2 Timoteo 3:1). Le u tsʼook kʼiinoʼoboʼ yaan u xuʼulul kéen kʼuchuk u «kʼiinil le juiciooʼ bey xan tu kʼiinil u xuʼulsaʼal tiʼ le kʼasaʼan máakoʼoboʼ» (2 Pedro 3:3, 7). Chéen baʼaleʼ le máaxoʼob utsoʼoboʼ maʼ kun xuʼulsbiloʼob, baʼaxeʼ yaan u kʼamkoʼob «kuxtal minaʼan u xuul» (Mateo 25:46).

Tsʼoʼoleʼ yaan xan u kuxkíintaʼal u millonesil máakoʼob yéetel yaan u tsʼaʼabaltiʼob u páajtalil u kuxtaloʼob minaʼan u xuul. Jesuseʼ tu kuxkíintaj juntúul xiʼipal tu kaajil Naín. Teʼeloʼ tu yilaj juntúul koʼolel táan u yokʼol tumen kíim le juntúuliliʼ paal anchaj tiʼoʼ, Jesuseʼ jach tu chʼaʼaj óotsilil tiʼ le koʼolelaʼ ka  tu kaʼa kuxkíintaj u paal (Lucas 7:11-15). Apóstol Pablo xaneʼ tu yaʼalaj: «Teneʼ táan xan in páaʼtik u kaʼa kuxkíintaʼal le kimenoʼob jeʼex u yaʼalmil Diosoʼ, le utsoʼoboʼ bey xan le kʼasaʼanoʼoboʼ». Le jatsʼuts esperanzaaʼ junpʼéel bix u yeʼesiktoʼon Dios jach u yaabiltmaj wíinik (Baʼaxoʼob [Hechos] 24:15).

U millonesil máakoʼobeʼ yaan u kuxtaloʼob utiaʼal mantatsʼ way Luʼumeʼ. Le Bibliaoʼ ku yaʼalik: «Le utsil máakoʼoboʼ bíin u tiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul[iʼ]» (Salmo 37:29). Teʼ kʼiinoʼob jeʼeloʼ yaan u páajtal u yaʼalikoʼob yéetel kiʼimak óolal le baʼax tu yaʼalaj apóstol Pablo kex walajki dos mil añosaʼ: «Kíimil, ¿tuʼux yaan a páajtalil utiaʼal a tsʼáanchaʼatikoʼon? Kíimil, ¿tuʼux tsʼoʼok a yaach?» (1 Corintoiloʼob 15:55). Bey kun xuʼulsbil tiʼ le nojoch enemigo beetik u muʼyaj máakoʼ.