Mateo 25:1-46
25 U Reinoil kaʼaneʼ bey jeʼex diez x-chʼúupalaloʼob* tu chʼaʼaj u lámparaʼob*+ ka jóokʼ u chʼaʼob u beel le noviotsiloʼ.+
2 Cinco u túulaleʼ minaʼan u naʼatoʼob, yéetel le uláakʼ cincooʼ yaan u naʼatoʼob.+
3 Le minaʼan u naʼatoʼoboʼ tu bisaj u lámparaʼob, chéen baʼaleʼ maʼ tu bisoʼob uláakʼ aceite utiaʼal u lámparaʼobiʼ.
4 Pero le yaan u naʼatoʼoboʼ tu bisaj u lámparaʼob bey xan nuʼukuloʼob chuupoʼob yéetel aceite.
5 Chéen baʼaleʼ le noviotsiloʼ maʼ séeb kʼuchiʼ, letiʼob túuneʼ jach taakchaj u weenloʼobeʼ ka weenoʼob.
6 Jach chúumuk áakʼab túuneʼ uʼuyaʼab u kʼaʼam aʼalaʼal: ‹¡Jeʼel ku taal le noviotsiloʼ! ¡Jóokʼeneʼex a kʼameʼex!›.
7 Tuláakal túun le x-chʼúupalaloʼoboʼ líikʼoʼobeʼ ka tu listokíintaj u lámparaʼob.+
8 Le minaʼan u naʼatoʼoboʼ tu yaʼaloʼob tiʼ le yaan u naʼatoʼoboʼ: ‹Tsʼáaʼextoʼon junpʼíit aceite tumen k-lámparaʼobeʼ jach taʼaytak u tuʼuploʼob›.
9 Le x-chʼúupalaloʼob yaan u naʼatoʼoboʼ tu yaʼaloʼob: ‹Wa k-tsʼáaikteʼexeʼ maʼ xaaneʼ maʼ kun chúukpajal tiʼ toʼoniʼ. Maas maʼalob ka xiʼikeʼex tu yiknal le máaxoʼob konikoʼ ka a man a tiaʼaleʼexiʼ›.
10 Chéen baʼaleʼ le bijaʼan u manoʼob le aceiteoʼ kʼuch le noviotsiloʼ, le x-chʼúupalaloʼob túun u listokíintmaj u lámparaʼoboʼ ookoʼob tu yéetel tu festejoil le tsʼoʼokol beeloʼ,+ ka túun kʼaʼal le joonajoʼ.
11 Ka suunaj túun le uláakʼ x-chʼúupalaloʼoboʼ tu yaʼaloʼob: ‹¡Yuumtsil, Yuumtsil, jeʼekʼabttoʼon le joonajoʼ!›.+
12 Letiʼ túuneʼ tu núukajtiʼob: ‹U jaajileʼ maʼ in kʼaj óoleʼexiʼ›.
13 Le oʼolaleʼ maʼ a weenleʼex,+ tumen maʼ a wojleʼex mix u kʼiinil mix u yorailiʼ.+
14 U reinoil kaʼaneʼ bey jeʼex juntúul máak nukaʼaj jóokʼol viaje táanxel luʼumileʼ. Letiʼeʼ tu tʼanaj u esclavoʼobeʼ ka tu kʼubéentajtiʼob le baʼaxoʼob yaantiʼoʼ.+
15 Tiʼ juntúuleʼ tu tsʼáaj cinco bolsas taakʼin,* tiʼ uláakʼeʼ kaʼapʼéel yéetel tiʼ uláakʼeʼ junpʼéel. Tiʼ cada juntúuleʼ tu tsʼáaj le jaypʼéel jeʼel u páajtal u meyajtikeʼ, ka tsʼoʼokeʼ bin táanxel luʼumil.
16 Le máax tu kʼamaj cinco bolsas taakʼinoʼ bin tu séebaʼanileʼ ka meyajnaj tu yéeteloʼob, ka tu náajaltaj uláakʼ cinco.
17 Bey xan le máax tu kʼamaj kaʼapʼéel bolsa taakʼinoʼ tu náajaltaj uláakʼ kaʼapʼéel.
18 Chéen baʼaleʼ le esclavo tu kʼamaj chéen junpʼéel bolsaoʼ bineʼ tu páanaj le luʼumoʼ ka tu mukaj le taakʼin* tsʼaʼabtiʼ tumen u tsʼuuliloʼ.
19 Ka máan yaʼab kʼiinoʼobeʼ taal u tsʼuulil le esclavoʼoboʼ ka joʼopʼ u kʼáatiktiʼob baʼax tu beetoʼob yéetel le taakʼin tu kʼubéentajtiʼoboʼ.+
20 Ka túun taal le tu kʼamaj cinco bolsas taakʼinoʼ ka tu taasaj uláakʼ cinco bolsas táan u yaʼalik: ‹In tsʼuulil, ta kʼubéentajten cinco bolsas taakʼin; ilawile, tin náajaltaj uláakʼ cinco›.+
21 U tsʼuulileʼ tu yaʼalajtiʼ: ‹Jach maʼalob baʼax ta beetaj, jach utsech yéetel chúukaʼan a wóol. Tumen chúukpaj a wóol tiʼ jujunpʼéel baʼaloʼobeʼ yaan in kʼubéentiktech yaʼab baʼaloʼob.+ Kiʼimakchajak a wóol jeʼex kiʼimakil in wóoleʼ›.*+
22 Ka tsʼoʼokeʼ taal xan le tu kʼamaj kaʼapʼéel bolsa taakʼinoʼ ka tu yaʼalaj: ‹In tsʼuulil, ta kʼubéentajten kaʼapʼéel bolsa taakʼin; ilawile, tin náajaltaj uláakʼ kaʼapʼéel›.+
23 U tsʼuulileʼ tu yaʼalajtiʼ: ‹Jach maʼalob baʼax ta beetaj, jach utsech yéetel chúukaʼan a wóol. Tumen chúukpaj a wóol tiʼ jujunpʼéel baʼaloʼobeʼ yaan in kʼubéentiktech yaʼab baʼaloʼob. Kiʼimakchajak a wóol jeʼex kiʼimakil in wóoleʼ›.
24 Tu tsʼookeʼ taal le esclavo tu kʼamaj chéen junpʼéel bolsa taakʼinoʼ ka tu yaʼalaj: ‹In tsʼuulil, teneʼ in wojel jach yaʼab baʼax ka kʼáatik tiʼ a esclavoʼob, ka jooch tuʼux maʼ paakʼalnajechiʼ yéetel ka cosechar tuʼux maʼ ta kʼíitchʼintaj mix baʼaliʼ.+
25 Le oʼolal sajakchajeneʼ ka binen in muk a taakʼin. Jeʼel a taakʼinaʼ›.
26 U tsʼuulil túuneʼ tu yaʼalajtiʼ: ‹Kʼasaʼan yéetel maʼakʼóol máak, wa a wojel kin jooch tuʼux maʼ paakʼalnajeniʼ, yéetel kin cosechar tuʼux maʼ tin kʼíitchʼintaj mix baʼaleʼ,
27 ¿baʼaxten túun maʼ ta bisaj in taakʼin tiʼ le j-kanan taakʼinoʼoboʼ? Wa ka a beet kaʼach beyoʼ kéen kʼuchkeneʼ yaan kaʼach in kʼamik in taakʼin* paʼteʼ yéetel u interésil.
28 Luʼseʼex le taakʼin tin tsʼáajtiʼoʼ ka a tsʼáaʼex tiʼ le máax yaan diez bolsas taakʼinoʼ.+
29 Tumen tiʼ le máax yaantiʼeʼ yaan u tsʼaʼabal u maasil tiʼ, yéetel yaan u yaʼabtal le baʼaxoʼob yaantiʼoʼ, chéen baʼaleʼ le máax minaʼantiʼeʼ tak le bukaʼaj yaantiʼoʼ yaan u luʼsaʼaltiʼ.+
30 Le oʼolaleʼ jóoʼseʼex le esclavo mix baʼal u biilaloʼ ka a píikchʼinteʼex teʼ táankab tuʼux éeʼjochʼeʼenoʼ. Teʼeloʼ tiʼ kun okʼol yéetel tiʼ ken u karachʼt u kojiʼ›.
31 Le kéen taalak u Paal máak+ yéetel nojoch autoridad bey xan yéetel tuláakal u ángeloʼobeʼ+ yaan u kutal tu kiʼichkelem trono.
32 U máakiloʼob tuláakal kaajoʼobeʼ yaan u muchʼkíintaʼaloʼob tu táan, letiʼ túuneʼ yaan u jatskoʼob jeʼex u beetik le j-kanan taman kéen u jats le tamanoʼob tiʼ le chivoʼoboʼ.
33 Yaan u tsʼáaik le tamanoʼob+ tu x-noʼojoʼ, yéetel le chivoʼoboʼ tu x-tsʼíik.+
34 Le Rey túunoʼ yaan u yaʼalik tiʼ le máaxoʼob yanoʼob tu x-noʼojoʼ: ‹Teʼex tsʼoʼok a bendecirtaʼaleʼex tumen in Taataeʼ, koʼoteneʼex, tiaʼalinteʼex le Reino beetaʼab a tiaʼaleʼex desde tu káajbal yóokʼol kaaboʼ.*
35 Tumen wiʼijchajeneʼ ka ta tsʼáajeʼex baʼal in jaante, ukʼajchajeneʼ ka ta tsʼáajeʼex jaʼ in wukʼe. Kex maʼ a kʼaj óoleneʼexeʼ ta kʼameneʼex maʼalob.+
36 Ka pʼáat minaʼan in nookʼeʼ ta tsʼáajeʼex in nookʼ,+ kʼojaʼanchajeneʼ ka ta kanáanteneʼex, kʼaʼalen cárceleʼ ka taaleʼex a wileneʼex›.+
37 Le utsul máakoʼob túunoʼ yaan u yaʼalikoʼob tiʼ le reyoʼ: ‹Yuumtsil, ¿baʼax kʼiin ka t-ilaj wiʼijech ka t-tsʼáaj baʼal a jaante? ¿Baʼax kʼiin ka t-ilaj ukʼajech ka t-tsʼáaj jaʼ a wukʼe?+
38 ¿Baʼax kʼiin ka t-kʼamech kex maʼ k-kʼaj óolechiʼ? ¿Baʼax kʼiin ka t-ilaj minaʼan a nookʼ ka t-tsʼáaj a nookʼ?
39 ¿Baʼax kʼiin ka t-ilaj kʼojaʼanech wa kʼalaʼanech cárcel ka binoʼon xíimbaltech?›.
40 Le Reyoʼ yaan u núukiktiʼob: ‹Tu jaajil kin waʼalikteʼexeʼ tuláakal le baʼaxoʼob ta beeteʼex tiʼ juntúul u maas chichnil in sukuʼunoʼobaʼ tiʼ teen ta beeteʼex›.+
41 Tiʼ le máaxoʼob túun yanoʼob tu x-tsʼíikoʼ yaan u yaʼaliktiʼob: ‹Náachkuntabaʼex tiʼ teen,+ teʼex le a náajaltmaj a píikchʼintaʼaleʼex teʼ kʼáakʼ maʼatech u tuʼupul+ beetaʼan utiaʼal le Kʼaasilbaʼal* yéetel u ángeloʼoboʼ.+
42 Tumen le ka wiʼijchajeneʼ maʼ ta tsʼáajeʼex baʼal in jaantiʼ, le ka ukʼajchajeneʼ maʼ ta tsʼáajeʼex jaʼ in wukʼiʼ.
43 Kex táanxel tuʼux in taaleʼ maʼ ta wóotaj a kʼameneʼexiʼ, le ka pʼáat minaʼan in nookʼeʼ maʼ ta tsʼáajeʼex in nookʼiʼ, le ka kʼojaʼanchajen yéetel ka kʼaʼalen cárceleʼ maʼ ta kanáanteneʼexiʼ›.
44 Letiʼob túuneʼ yaan u núukikoʼob tiʼ le reyoʼ: ‹Yuumtsil, ¿baʼax kʼiin ka t-ilaj wiʼijech yéetel maʼ t-tsʼáaj baʼal a jaantiʼ? ¿Baʼax kʼiin ka t-ilaj ukʼajech yéetel maʼ t-tsʼáaj jaʼ a wukʼiʼ? ¿Baʼax kʼiin ka taalech yéetel maʼ t-kʼamechiʼ? ¿Baʼax kʼiin ka pʼáat minaʼan a nookʼ, ka kʼojaʼanchajech, ka kʼaʼalech cárcel yéetel maʼ t-áantechiʼ?›.
45 Le reyoʼ yaan u núukiktiʼob beyaʼ: ‹Tu jaajil kin waʼalikteʼexeʼ tuláakal le baʼaxoʼob maʼ ta beeteʼex tiʼ juntúul u maas chichnil in sukuʼunoʼobaʼ maʼ ta beeteʼex tiʼ teniʼ›.+
46 Le máakoʼob túunaʼ yaan u xuʼulsaʼaltiʼob utiaʼal mantatsʼ,+ chéen baʼaleʼ tiʼ le utsul máakoʼoboʼ yaan u tsʼaʼabaltiʼob kuxtal minaʼan u xuul».+
Notas
^ Ilawil página 2568.
^ Ich griegoeʼ le tʼaan ku meyaj teʼelaʼ ku tsʼáaik naʼatbil x-chʼúupalaloʼob mix baʼal yanchajak u yiloʼob yéetel juntúul xiib.
^ Ich griegoeʼ ku yaʼalaʼal kaʼach «talento». U aalil junpʼéel talento griegoeʼ 20.4 kilos.
^ Ich griegoeʼ ku yaʼalaʼal kaʼach «plata».
^ Wa «Kiʼimakchajak a wóol yéetel a tsʼuulil».
^ Ich griegoeʼ ku yaʼalaʼal kaʼach «plata».
^ Teʼelaʼ táan u yúuchul tʼaan tiʼ le kʼiinoʼob ka káaj u yantal u paalal Adán yéetel Evaoʼ.
^ Ich griegoeʼ ku yaʼalaʼal kaʼach «Diablo».
