ANA apano tukusatenda yindu yine yakulandana ni yaŵatendaga ŵakulocesya ŵakala? Baibulo jacilambo casambano jacisungu jajakopwece mu 2013 jasasile kuti jwakulocesya ali “mundu jwele Mlungu akusamanyikasya yakulinga yakwe kupitila mwa jwalakwejo. Ŵakulocesya ŵaŵecetaga maloŵe gakutyocela kwa Mlungu. Ŵasalaga ya yindu yayicitendekwa kusogolo, kwajiganya ŵandu ya Yehofa, kupeleka malamusi, soni kulamula.” M’wejisoni, atamose kuti ngatukusalocesya ya msogolo nambo tukusasalila ŵandu maloŵe gakutyocela kwa Mlungu gagakusasimanikwa m’Baibulo.—Mat. 24:14.

Kwasalila ŵane yakwamba Mlungu jwetu Yehofa, soni kwajiganya yakwamba lisosa lyakwe, uli upile wekulungwa mnope. Tukusakamula masengo gelega pampepe ni ‘lilayika lyalikuguluka mwinani.’ (Ciu. 14:6) Nambope, patukukamula masengoga mpaka tusimane ni yakusawusya yampaka yitutendekasye kuliŵalila upile wekulungwa watukwetewu. Ana yine mwa yakusawusyayi yili yapi? Ndaŵi sine tukusapela, kutenguka kapena kuliwona kuti tuli ŵangali mate. Nombe nawo ŵakulocesya ŵakala ŵalipikanagasoni m’yoyo nambo nganaleka kumtumicila Yehofa. Soni Yehofajo ŵakamucisye kuti akwanisye masengo gawo. Kwende tulole yisyasyo ya ŵakulocesyaŵa soni yatukulijiganya kwa jemanjaji.

Ndaŵi sine tukusapela mnope ni masengo gatukusatenda lisiku ni lisiku mwati mpaka tulepele kwawula mu undumetume. Yili yisyene kuti tukusasaka kupumula ligongo atamose Yesu ni ŵandumetume ŵakwe ŵapumulaga. (Maliko 6:31) Nambo aganicisye ya masengo gaŵakwete jwakulocesya Esekiyeli paŵaliji ku Babulo. Pandaŵiji Ayisalayeli ŵaliji ali ŵakamwile ukapolo. Mlungu ŵamsalile Esekiyeli kuti ajigale njelwa ni ajambulepo msinda wa Yelusalemu. Soni jwalakwe ŵasosekwaga kusyungulila msinda wakuwanicisyawo mwakugona mumbali mwakwe. Kwa masiku 390 ŵasosekwaga gona mbali ja ku mciji, kaneko kwa masiku 40 ŵasosekwaga gona mbali ja kumlyo. Yehofa ŵamsalile Esekiyeli kuti,  “Une cinjimtaŵa ni ngonji, kuti mkagalawucila kumbali jine, mpaka mli mmalisisye masiku genu gakusyungulila msindawo.” (Ezek. 4:1-8) Komboleka kuti yeleyi yatendekasyaga lung’wanu Ayisalayeli ŵaŵakamwile ukapolowo. Agambe ganisya, Esekiyeli ŵasosekwaga kutenda yeleyi kwa caka ni miyesi. Ana cici cicamkamucisye jwalakwe kwanilisya undumetume wakwewu?

Esekiyeli ŵamanyililaga ligongo lyakwe Mlungu ŵamsagwile kuti aŵe jwakulocesya. Mlungu ŵamsalile jwalakwe kuti, “Cinga [Ayisalayeli] cacipikanila kapena iyayi . . . , cacimanyililape kuti pasikati pawo paliji jwakulocesya.” (Ezek. 2:5) Jwalakwe nganaliŵalila cakulinga ca masengo gakwe. M’yoyo, ŵagonile mwakusyungulila msinda wa Yelusalemu wakuwanicisya. Yiŵatesile jwalakwe yalosisye kuti ŵaliji jwakulocesya jusyesyene. Pali papitile ndaŵi, jwalakwe soni Ayisalayeli acimjakwewo ŵapikene kuti, “Msinda wula awujonasile.” Yeleyi yili yitendekwe Ayisalayeli ŵayimanyi kuti pasikati pawo paliji jwakulocesya.—Ezek. 33:21, 33.

Moŵa agano tukusakalamusya ŵandu ya konanjikwa kwa cilambo cakusakala ca Satanaci. Atamose kuti ndaŵi sine tukusapela, nambope, tukusakamulicisya masengo macili getu pakulalicila Maloŵe ga Mlungu, kutenda maulendo gakuwilisya, soni kutendesya majiganyo ga Baibulo. Payikukwanilicikwa yakulocesya yakwamba mbesi ja cilamboci, m’weji tulosisye kuti tuli “ŵandu ŵele Mlungu akwakamulicisya masengo pakumanyikasya yakulinga yakwe.”

Msimu wa Yehofa ukusatukamucisya kuti tulipeleceje ni mtima wosope. Nambope ndaŵi sine tukusatenguka ligongo lyakuti ŵandu ŵane ngakusawupocela cenene utenga wetu. Patutengwice, tukusosekwa kujigalila cisyasyo ca jwakulocesya Yelemiya. Ŵandu ŵamnyosyaga jwalakwe ligongo lyakulalicila utenga wa Mlungu kwa Ayisalayeli. Ligongo lya kupela ni yeleyi, jwalakwe ndaŵi jine ŵasasile kuti, “Ngasisalasoni ya jwalakwe soni ngasimbecetasoni m’lina lyakwe.” Yelemiya ŵaliji mundu mpela m’weji. Nambope jwalakwe ŵajendelecele kulalicila utenga wa Mlungu. Ligongo cici? Jwalakwe ŵasasile kuti, “Nambo mumtima mwangumu, maloŵe gakwe galiji mpela moto wakolela. Galiji mpela moto wakolela wawuwugalile m’mawupa gangu. Napesile ni kwamba kutama ngaŵeceta mwati nganingombola kupilila.”—Yer. 20:7-9.

M’wejisoni, mpaka tumalane ni kutenguka kwakukusayika ligongo lyakuti ŵandu nganapocela cenene utenga wetu mwakuganicisya mnope kusosekwa kwa utengawo. Mpaka uŵe mpela ‘moto wakolela wawuwugalice m’mawupa getu.’ Kuti tukombole kutenda yeleyi tukusosekwa kuŵalangaga Baibulo lisiku lililyose.

Aklistu ŵane alasileje ni nganisyo ligongo lyakupocela undumetume wanganawupikanicisyaga. Komboleka kuti nombe najo jwakulocesya Hoseya ŵasimene ni yeleyi. Yehofa ŵamlamwile jwalakwe kuti, “Mjawule mkalombele jwamkongwe jwacikululu. Pelepo cacim’ŵelecela ŵanace ligongo lya cikululu cakweco.” (Hos. 1:2) Agambe ganisya mwakapikanile mumtima Mlungu ali ŵasalile kuti alombele jwamkongwe jwacikululu. Nambo Hoseya ŵakundile yaŵamsalile Yehofayi. Jwalakwe ŵamjigele Gomeli kuŵa ŵamkwakwe, soni ŵam’ŵelecele mwanace jwamlume. Mkupita kwa ndaŵi jwalakwe ŵaŵelecesoni ŵanace ŵaŵili jwamkongwe ni jwamlume. Yikuwoneka kuti ŵanace ŵaŵiliŵa ŵaliji ŵa acalume ŵane. Yehofa ŵaliji ali amsalile Hoseyajo kuti ŵamkwakwewo ‘cacawutucila acalume ŵakumnonyelawo.’ Maloŵega gakulosya kuti Gomeli paŵalekangene ni acalume ŵanewo ŵawujile kwa Hoseya. Yikaŵe kuti wawojo ŵaliji jwakulocesyaju, ana akakundile kuwujilana ni Gomeli? Nambotu Yehofa ŵamsalile Hoseya kuti atende yeleyi. Mwati jwakulocesyajo ŵamsumilesoni jwamkongwejo ni mbiya syejinji mnope.—Hos. 2:7; 3:1-5.

Komboleka kuti Hoseya nganamanyililaga umbone wa undumetume wakwewo. Nambo, yaŵatesileyi yikutukamucisya kumanyilila mwaŵapikanilaga Yehofa mumtima mtundu wa Yisalayeli paumjimucile. Ayisalayeli ŵane ŵamtima wambone ŵawujile kwa Yehofa.

Moŵa agano, Mlungu ngakusiŵasalila ŵandu kuti ‘alombeleje acakongwe ŵacikululu.’ Nambo, ana pana lijiganyo lililyose lyatukupata pa kusacilila kwa Hoseya kutenda undumetumewu? Lijiganyo limo lili lyakuti tukusosekwa kuŵa ŵakusacilila kulalicila  ngani syambone “pelanga soni kunyumba ni nyumba,” atamose patukuyiwona kuŵa yakusawusya. (Mase. 20:20) Kombolekasoni kuti matala gane gakulalicilila gakusatusawusya. Konjecesya pelepa, ŵandu ŵajinji ŵakusalijiganya Baibulo ni Ŵamboni sya Yehofa akusasala kuti akusanonyela kulijiganya Baibulo nambo nganaŵa akombwele kwawula kunyumba ni nyumba kukuwandisya utenga wambone. Nambo mkupita kwandaŵi, ŵajinji mwa ŵanduŵa akusatanda kulalicila ngani syambone. Ana akuliwona lijiganyo lyatukupata kutyocela kwa Hoseya?

Panasoni lijiganyo line lyatukupata kwa jwakulocesya Hoseya juŵakundile undumetume wakusawusya mnopewu. Jwalakwe akakanile kulombela jwamkongwe jwa cikululujo. Yikaŵe kuti Hoseya nganalemba ngani jeleji pangali mundu atamose jumo jwakamanyilile ngani jakweji. Moŵa aganosoni, ŵandu nganaŵa amanyilile yakwamba Yehofa naga ngatukukamulicisya masengo upile watukwete wakwasalila utenga wambone. Mlongo jwine jwacinyamata lina lyakwe Anna jwakulijiganya pa sukulu jine ku United States ŵapatile upile wakwalalicila acimjakwe. Jwakwiganya ŵasalile ŵanacewo kuti alembe ngani jakutesya lung’wanu kuti ciŵasalile acimjawo ŵamkalasimo. Anna akakombolece kwamba kutama ngakamulicisya masengo upilewo pakwalalicila acimjakwewo. Nambo jwalakwe ŵawuweni welewu kuŵa upile wakutyocela kwa Mlungu. Jwalakwe ŵapopesile kwa Yehofa kuti amkamucisye soni ŵaliji jwakusacilila kamulicisya masengo upilewo. Kaneko ŵalembile ngani ja mtwe wakuti, “Ana pana maumboni gakulosya kuti yaumi yatyocele ku yindu yangali umi?”

Anna ali aŵalasile ngani jakwejo, msikana jwine juŵakulupililaga kuti yaumi yatyocele ku yindu yangali umi ŵatandite kum’wusya yiwusyo yejinji. Anna ŵamjajile cenene yiwusyo yakweyo. Mkwiganya jula ŵasangalele ni ngani jaŵalembile Annajo mwati ŵampele mtuka. Kutandila pandaŵijo, Anna aŵele ali mkutagulilana ni msikana juŵam’wusyisye yiwusyo yejinji jula. Ligongo lyakuti Anna ŵakundile “undumetume” waŵampele Yehofawu, jwalakwe ŵatite, “Sambano ngusalalicila ngani syambone mwangali woga.”

Atamose kuti nganituŵa ŵakulocesya, nambope naga tukujigalila msimu wakulipeleka wa ŵakulocesya mpela Esekiyeli, Yelemiya soni Hoseya, mpaka tukombole kutenda lisosa lya Yehofa. Wuli ngaŵalanga ngani syakwamba ŵakulocesya ŵane ŵakala pandaŵi ja kulambila kwa peŵasa, kapena palijiganyo lyapajika ni kulola mwampaka ajigalile cisyasyo cawo?