Chiwunukuko Chakwawula kwa Yohane 14:1-20
14 Kaneko nam’weni Mwanachejwangondolo+ Petumbi lya Siyoni+ ali ajimi ni ŵane ŵakwana 144,000,+ ŵele ŵakwete lina lyakwe soni lina lya Atati+ ŵakwe pausyo pawo.
2 Napikene masegwe kutyochela kwinani mpela mkokomo wa mesi gejinji soni mpela kulindima kwamachili. Masegwego gapikanikaga mpela nyimbo jakwimba ŵandu yimpepe ni yida yakwimbila yangonji.
3 Jemanjaji ŵaliji mkwimba nyimbo jakupikanika mpela jasambano+ pameso pa mpando waumwenye, yaumi mcheche+ soni achakulungwa.+ Paliji pangali atamose jumo juŵakombwele kulijiganya nyimbojo nambo ŵa 144,000+ basi, ŵele ŵajigele pachilambo chapasi mwakwasuma.
4 Jemanjaji nganalisakasya ni achakongwe, sonitu ali ŵaswela.*+ Nambosoni jemanjaji akusamkuya Mwanachejwangondolo kulikose kwakwawula.+ Jemanjaji ŵasumile kutyochela+ pasikati pa ŵandu mpela yisogosi yandanda+ kwa Mlungu soni kwa Mwanachejwangondolo,
5 soni pakamwa pawo nganipakopoka yaunami yiliyose. Jemanjaji ŵangali chakulemwa chilichose.+
6 Kaneko naliweni lilayika line lili mkuguluka mwinani. Lilayikali lyakwete ngani syambone syakuti likalalichile kwa wosope ŵakutama pachilambo chapasi, ŵakutyochela mu chilambo chilichose, mbumba jilijose, chiŵecheto chilichose, soni mtundu uliwose.+
7 Lilayikalyo lyaliji mkuŵecheta mwakwesya maloŵe kuti, “Wosope amjogope Mlungu soni ampe uchimbichimbi, ligongo ndaŵi jakuti ŵalamule* ŵandu jikwanile.+ Myoyo amlambile jwele juŵapanganyisye kwinani, chilambo chapasi, nyasa+ soni nduluko sya mesi.”*
8 Naliwenisoni lilayika line lyaŵili lili mkulikuya lyandanda lila. Lilayikali lyaliji mkuŵecheta kuti, “Jugwile. Babulo Jwamkulungwa+ jugwile.+ Jwalakweju ali jwamkongwe jwatendekasisye mitundu josope ja ŵandu kumwa finyo jwakwe jwakwatendekasya ŵanduwo kukumbila mnope ndamo ja chikululu.”*+
9 Lilayika linesoni lyatatu, lyagakuyisye malayika gane gala. Lilayikali lyaliji mkuŵecheta mwakwesya maloŵe kuti, “Naga jwalijose akuchitindiŵalila chilombo+ ni chiwanichisyo chakwe, soni naga akupochela chimanyisyo pausyo pakwe kapena pamkono pakwe,+
10 jwalakwejo chachimwasoni finyo jwa Mlungu, jwajuli ukali wakwe. Jweleju ali finyo jwangasungunukula jwele Mlungu akumtaga m’chikapu chakwe chakusunjila ukali.+ Jwalakwejo chachimlagasyasoni ni moto soni ni maganga ga sulufule+ gakolela moto pameso pa malayika geswela soni pameso pa Mwanachejwangondolo.
11 Lyosi lya moto wakwalagasyawo lichiŵa lili mkutuka ni kwelaga mwinani mpaka kalakala.+ Wosope ŵaŵachilambilaga chilombo chila ni chiwanichisyo chakwe, soni ŵaŵapochele chimanyisyo cha lina lyakwe ngasapumula musi ni chilo.+
12 Alitu ni ligongo lyakwe ŵaswelawo+ akusosekwa kuŵa ŵakupilila. Jemanjaji ni ŵakusasunga malamusi ga Mlungu soni kukuya chikulupi+ chiŵalosisye Yesu mwa Mlungu.”
13 Kaneko napikene maloŵe kutyochela kwinani gali mkusalila une kuti, “Mlembe kuti, ŵana upile ŵandu ŵakuwa ali ŵakamulana ni Ambuje+ kutandila sambano jino kwawulaga msogolo. Msimu ukusimichisya kuti, elo, jemanjaji apumule kumasengo gaŵakamwile mwakulipeleka, pakuŵa yosope yiŵatesile yikwawula pampepe ni jemanjajo.”
14 Kaneko naliweni liwunde lyeswela. Paliwundepo patemi jwinejwakwe jwakuwoneka mpela mwanache jwa mundu.+ Jwalakwe ŵawete chisoti chaumwenye chagolide kumtwe kwakwe soni ŵanyakwile chikwakwa chakutema mnope mmyala mwakwe.
15 Lilayika line lyakopochele kutyochela ku nyumba ja Mlungu. Lilayikali lyaŵechete mwakwesya maloŵe kwa jwele juŵatemi paliwunde jula kuti, “Sambano mtulusye chikwakwa chenucho kuti mtande kugungula, ligongo ndaŵi jagungula jikwanile soni mbeju sya pachilambo chapasi sikomele.”+
16 Pelepo juŵatemi paliwunde jula ŵachituluchisye chikwakwa chakwe chila pachilambo chapasi, mwamti ŵagungwile mbeju sya pachilambopo.
17 Lilayika linesoni lyakopochele kutyochela ku nyumba ja Mlungu jajili kwinani. Lilayikali lyakwetesoni chikwakwa chakutema mnope.
18 Kaneko pakopochelesoni lilayika line kutyochela pamalo gakupelechela mbopesi. Lilayika lyeleli lyakwete ulamusi wakulamulila moto. Lilayikali lyagumisile mwakwesya maloŵe kwa lilayika lyalyajigele chikwakwa chakutema mnope lila kuti, “Sambano mtulusye chikwakwa chenu chakutema mnopecho kuti mtande kukata mipeleya* ja pachilambo chapasi, pakuŵa mipeleyajo jijiwile.”+
19 Pelepo lilayikalyo lyatuluchisye chikwakwa chakwecho pachilambo ni kukata mipeleya ja pachilambo chapasi. Kaneko ŵajikusulile mipeleyajo mu chakuminyila mipeleya chekulungwa, chachikwimila ukali wa Mlungu.+
20 Mipeleyajo ŵajiminyilaga kusa kwa msinda, mwamti myasi jajakopweche mwelemo jaliji jejinji mpaka kwika kuchipundi kwa mahachi, soni myasijo jajendelele palutando lwa masitadiya 1,600.*
Maloŵe Gamwiŵanda
^ Mu Chigiliki ŵatiga, “achalume ŵele nganagonejepo ni jwamkongwe.”
^ Kapena kuti “yisima ya mesi.”
^ Kapena kuti “ŵawelusye.”
^ Mu Chigiliki akusati, por·neiˈa. Alole mbali jakuti, Kugopolela kwa Maloŵe.
^ Mipeleya jili mtundu winewakwe wa yisogosi yakusayikamulichisya masengo pakupanganya finyo.
^ Lutando lwelelu luli chiŵandika makilomita 296. Ulewu wa sitadiya jimo waŵaga mamita 185. Alole Yakumbesi B14.
