Ŵandu ŵajinji akwete nganisyo syakulekanganalekangana pangani jakwamba umi soni ciwa. Ŵane akusakulupilila kuti panyuma paciwa cacikolasoni umi m’litala line lyakwe, kapena kumalo kwine kwakwe. Ŵanesoni akusakulupilila kuti mundu pawile akusapagwasoni kwine kwakwe. Nambope ŵane akusakulupilila kuti mundu pawile nikuti umi umalile papopo.

Komboleka kuti wawojosoni akwete yakusayikulupilila panganiji mwakamulana ni kwaŵapagwile soni ndamilo jawo. Pakuŵa ŵandu ŵajinji akwete nganisyo syakulekanganalekangana pakwamba yayikusatendekwa mundu pawile, ana ŵani ŵampaka atukamucisye kumanyilila yisyesyene? Kapena kwapi kwampaka tupate kwanga kwa ciwusyo cakusyungusya mtweci?

Kwa yaka yejinji, acimlongola ŵa dini aŵele ali mkwiganya kuti mundu akwete msimu wangawa. Ŵandu mu dini syosope syekulungwakulungwa mpela dini sya Ciklistu, soni dini ja Cihindu, Ciyuda, Cisilamu ni dini sine akusakulupilila kuti msimu wa mundu wangawa. Nambosoni kuti mundu pawile, msimuwo ukusatyoka kuja kutama kwinani. Nambo ŵacibuda akusakulupilila kuti mundu pawile akusapagwasoni mwakuwilisyawilisya, kaneko cindu cine cikusatyoka mwa mundujo nikwawula ku mbepo.

Ligongo lya yijiganyo yeleyi, ŵandu ŵajinji akusakulupilila kuti ciwa cikusawugula litala lya ku umi wine wasambano. Nambosoni akusakulupilila kuti caliji cakulinga ca Mlungu kuti ŵandu aweje. Nambo ana Baibulo jikusasala yamtuli panganiji? Tukwaŵenda kuti aŵalanjesoni ngani jakuyicisya. Calole kuti yajikusasala Baibulo panganiji yili yakamula mtima.