Ana mpaka tusimicisye mwamtuli kuti yosope yaŵalagwisye Mlungu yicikwanilicikwa? Yesu nganakayicila ata panandi kuti yosope yaŵalagwisye Mlungu yicikwanilicikwa, soni yaŵajiganyaga yalimbikasyaga ŵandu ŵaŵampikanilaga. Kwende tulole cisyasyo cimo panganiji caŵasasile Yesu Pakulalicila kwa Petumbi cacikusimanikwa pa Mateyu 5:18. Lilembali likusati, “Ngumsalicisya kuti kwinani ni cilambo capasi mpaka yityoce mwangasawusya kulekangana nikuti mbali jimo ja cilembo ca M’cilamusi jityoce yindu yosope mkaniyitendekwe.”

Cilembo camwana mnope ca Cihebeli cikusakolanjikwa kuti yod (kalembe kakwe m’Cihebeli). Cilembo celeci cili candanda payilembo mcece yakwimila lina lya Mlungu lyakuti Yehofa. * Alembi ni Afalisi ŵajiwonaga ‘mbali ja cilembo’ cilicose ca M’cilamusi ca Mlungu kuŵa jakusosekwa mnope mpela mwayaŵelele ni maloŵe soni yilembo yosope.

Yesu jwasasile kuti yili yangasawusya kuti kwinani ni cilambo capasi yityoce kulekangana nikuti mbali jimo ja cilembo ca M’cilamusi jityoce yindu yosope mkaniyitendekwe. Nambope Malemba gakusatusimicisya kuti kwinani soni cilambo capasi ngasiyityoka mpaka kalakala. (Salimo 78:69) M’yoyo, yaŵasasile Yesuyi yagopolelaga kuti yosope yayaliji M’cilamusi yasosekwaga kwanilicikwa.

Ana Yehofa akusakwanilisya yakulocesya yiliyose atamose kambali kamnono? Elo. Mwambone, kalakala Mlungu jwasalile Ayisalayeli kuti pakulya ngondolo ja Pasaka akakasaga maupa gakwe. (Eksodo 12:46) Jeleji mpaka tujiwone mpela ngani jamnono. Ana Ayisalayeliwo ŵamanyililaga kugopolela kwakutenda yeleyi? Komboleka kuti nganamanyililaga. Nambope Yehofa jwamanyililaga cenene kuti yeleyi yaliji yakulocesya yayasalaga yakwamba Mesiya kuti jwalakwe ngasamtemangula liwupa pacaciwa pacitela cakulagacisya.—Salimo 34:20; Yohane 19:31-33, 36.

Ana yaŵasasile Yesu pakwamba ya cilembo ca M’cilamusi yikutujiganya cici? Yikutujiganya kuti yosope yaŵasasile Yehofa yicikwanilicikwa atamose kambali kamnono.