Nebukadinesala ali ŵajigalile ku Babulo acimlongola ŵa ku Yuda, jwasalile asilikali ŵakwe kuti asagule acacanda ŵamacili, soni ŵakuwoneka cenene pasikati pa maŵasa ga acimlongolago. Acacandaŵa ŵaliji ŵakuti ajiganyidwe kwa yaka yitatu kuti caŵe acimlongola ŵakusosekwa mnope m’cilambo ca Babulo. Nebukadinesala ŵapelece masengo gakwalolela acacanda ŵala kwa nduna jakwe jine jakolanjidwa Asipenasi. M’yoyo acacandaŵa ŵasosekwaga kulijiganya kuŵalanga, kulemba soni kuŵeceta ciŵeceto ca ku Babulo. Jemanjaji ŵasosekwagasoni kuti alyeje yakulya yaŵalyaga mwenye ni nduna syakwe. Acacanda mceceŵa ŵaliji Daniyele, Hananiya, Misayeli, soni Asaliya. Nambo Asipenasi ŵapele acacandaŵa mena gacibabulo. Menago galiji, Belitesasala, Sadilaki, Mesaki soni Abedinego. Ana yaŵalijiganyagayi yatendekasisye kuti alece kumtumicila Yehofa?

 Acacandaŵa ŵaliji ŵakusacilila mnope kumpikanila Yehofa. Jemanjaji ŵamanyililaga kuti ngakusosekwa kulyaga yakulya ya mwenye. Acacandaŵa ŵakanile ligongo lyakuti Cilamusi ca Yehofa casalaga kuti yine mwa yakulyayo yaliji yangaŵajilwa kulya. M’yoyo ŵamsalile Asipenasi kuti, ‘Conde akatupaga yakulya ya mwenye.’ Nambo Asipenasi ŵasalile acacandawo kuti, ‘naga jemanja ngamlyaga yakulya ya mwenye ni kuwonekaga mpela mkulwala, mwenye cacimbulaga une.’

Daniyele jwaganisisye yakutenda, ni ŵamsalile jwakwalolela jula kuti, ‘Conde atupeje liponda ni mesi kwa masiku 10. Kaneko catulandanye ni acacanda ŵakulya yakulya ya mwenye.’ Jwakwalolelajo ŵajiticisye yeleyi.

Pambesi pamasiku 10, Daniyele ni acimjakwe ŵatatu ŵala ŵawonekaga ni yilu yambone kulekangana ni acacanda wosope. Yehofa ŵasangalele ni jemanjaji ligongo ŵampikanile. Jwalakwe ŵampelesoni Daniyele lunda lwakupikanicisya mesomkulola soni sagamisi.

Pambesi pa majiganyogo, Asipenasi ŵajawisye acacanda ŵala kwa Nebukadinesala. Mwenye jwaŵecetene ni acacandawo ni jwayiweni kuti Daniyele, Hananiya, Misayeli soni Asaliya ŵakwete lunda soni umanyilisi kupunda acacanda wosopewo. M’yoyo jwalakwe jwasagwile jemanjaji kuti akamuleje masengo kunyumba jakwe ja ucimwene. Jwalakwe jwawusyaga lunda pangani syakusosekwa mnope. Yehofa ŵapele jemanjajo lunda kupunda acalume ŵalunda ŵa mwenye soni acalume ŵakutenda yamasenga.

Atamose kuti Daniyele, Hananiya, Misayeli soni Asaliya ŵaliji m’cilambo cacilendo, nambo nganaliŵalila kuti ŵaliji ŵandu ŵa Yehofa. Ana mmwejo cimcimkumbucila Yehofa ndaŵi syosope atamose kuli kwangali acinangolo ŵenu?