LIJIGANYO 35

Yampaka Atende Kuti Asaguleje Yindu Mwalunda

ALOLELE

Wosopewe tukusasosekwa kusagula yakutenda paumi. Yejinji yatukusasagula, mpaka yitukamuchisye kapena iyayi. Yeleyi mpaka yikwaye unasi wetu ni Yehofa. Mwachisyasyo, mundu mpaka asosekwe kusagula malo gakutama soni masengo gakumkamuchisya kupata yakusosechela ya paumi. Konjechesya pelepa mundu mpaka asagule naga akusaka kulombela kapena iyayi. Kusagula yindu mwalunda mpaka kutukamuchisye kuti tuŵeje ŵakusangalala soni kuti tumsangalasyeje Yehofa.

1. Ana mpaka atende uli kuti Baibulo jakamuchisyeje kusagula yindu mwalunda?

Mkanasagule yakutenda, apopeleje kaje kwa Yehofa kuti ŵakamuchisye. Kaneko awungunye yajikusasala Baibulo kuti amanyilile nganisyo sya Yehofa payakusaka kusagulayo. (Aŵalanje Misyungu 2:3-6.) Ndaŵi sine Yehofa mpaka atupe lilamusi pangani jine jakwe. Myoyo kupikanila mpaka kutukamuchisye mnope.

Nambi mpaka atende yamtuli naga Baibulo jangasala lilamusi pangani jakusaka kusagulajo? Atamose yili myoyo, Yehofa mpaka ŵalongolele “litala lyakwenela kulikuya.” (Yesaya 48:17) Mwamtuli? M’Baibulo mwana mfundo syampaka syalongolele kusagula yakutenda. Mfundosi sili usyesyene wawukusatukamuchisya kumanyilila nganisyo sya Mlungu. Ndaŵi syejinji patuŵalasile ngani jine m’Baibulo, ni patukusamanyilila nganisyo sya Mlungu. Patumanyilile nganisyo syakwe, ni patukusasagula kutenda yindu yakumsangalasya jwalakwe.

2. Ana akusosekwa kuyiganichisya yindu yapi mkanasagule yakutenda?

Baibulo jikusati, “Mundu jwakalamuka akusalolechesya [“kuganichisya,” NWT] mwakwendela.” (Misyungu 14:15) Yayikugopolela kuti mkanasagule yakutenda, apateje ndaŵi jakuyiganichisya. Pakuganichisya yakusaka kusagulayo, aliwusye kuti: ‘Ana ni mfundo japi ja m’Baibulo jampaka najikamulichisye masengo? Ana yachisaguleyi chiyingamuchisye kuŵa jwakusangalala? Nambi chiyakwaye ŵane mwamtuli? Chiwusyo chakusosekwa mnope chiŵeje chakuti, ana yachisaguleyi chiyimsangalasye Yehofa?’—Detulonomo 32:29.

Yehofa ni jwakuŵajilwa kutukamuchisya kumanyilila yindu yambone ni yakusakala. Patukumanyilila chenene malamusi ga Mlungu soni mfundo syakwe ni kutendaga yindu mwakamulana ni yeleyo, yikusatukamuchisya kuti tukole mtima wambone. Mtima welewu ni wawukusatukamuchisya kumanyilila chachili chambone, soni chakusakala. (Aloma 2:14, 15) Patulijiganyisye chenene maloŵe ga Mlungu, yikusakamuchisya kuti mtima wetu utukamuchisyeje kusagula yindu mwalunda.

KULIJIGANYA YEJINJI

Chitulijiganye yasikusati mfundo sya m’Baibulo soni mtima wetu pakutukamuchisya kusagula yakutenda.

3. Baibulo jalongoleleje kusagula yakutenda

Ana mfundo sya m’Baibulo mpaka situkamuchisye chamtuli patukusagula yakutenda? Alolele FIDIYO, kaneko akambilane yiwusyo ayi.

FIDIYO: Akuyeje Mfundo sya m’Baibulo Pakusagula Yakutenda (5:54)

Ana ni mtuka wapi wambone waŵatupele Yehofa?
Ligongo chichi Yehofa ŵatupanganyisye kuti tulisagulileje yakutenda?
Ana Yehofa atupele chichi pakusaka kutukamuchisya kuti tusaguleje chenene yakutenda?

Kuti alole mfundo ja m’Baibulo, aŵalanje Aefeso 5:15, 16. Ni akambilane yiwusyo ayi: Ana mpaka atende yamtuli kuti ‘akamulichisye chenene masengo ndaŵi’ jawo pa yindu yakuyichisyayi? . . .

kuŵalanga Baibulo.
kola ulombela wambone, kuŵa nangolo soni mwanache jwambone.
kusimanikwa pamisongano ja mpingo.

4. Awujiganyeje mtima wawo kuti asaguleje yindu mwalunda

Yikusaŵa yangasawusya kusagula chenene yindu naga pana lilamusi lya m’Malemba pangani jatukusagulajo. Nambo uli naga pali pangali lilamusi? Alolele FIDIYO, kaneko akambilane chiwusyo achi.

FIDIYO: “Akoleje Mtima Wampaka Wakamuchisye Kusagula Chenene Yindu” (5:13)

Mu fidiyoji, ana mlongoju atesile yamtuli pakuwujiganya mtima wakwe kuti asaguleje yakumsangalasya Yehofa?

Ligongo chichi ngatukusosekwa kwaŵenda achimjetu kutusagulila yakutenda? Aŵalanje Ahebeli 5:14, kaneko akambilane yiwusyo ayi:

Atamose kuti mpaka yiŵe yangasawusya kwaŵenda ŵane kuti atusagulile yakutenda, ana tukusosekwa kumanyilila chichi?
Ana tukwete yindu yapi yakutukamuchisya kusagula yindu mwalunda?

Mwakulandana ni mapu, nombe mtima wetu mpaka utulongolele ku yindu yambone kapena yakusakala

5. Akakuŵasyaga ŵane

Ŵandu akusasagula yindu mwakulekangana. Ana mpaka tutende yamtuli kuti tukakuŵasyaga ŵane? Aganichisye yakutendekwa yiŵili ayi:

Chandanda: Mlongo jwakusanonyela kulisalalisya mnope ayiche mu mpingo wele alongo ŵakwe yangasangalasya pakum’wona mlongo ali atesile yeleyo.

Aŵalanje Aloma 15:1 soni 1 Akolinto 10:23, 24, kaneko akambilane yiwusyo ayi:

Mwakamulana ni malembaga, ana mlongo jula akasagwile yamtuli? Ana wawojo mpaka atende yamtuli naga jwine asagwile yakulekangana ni ya wawojo?

Chaŵili: M’bale akumanyilila kuti Baibulo jangalekasya kumwa ukana mwakuŵajilwa, nambo jwalakwe asagwile kuti akamwaga. M’baleju am’ŵilasile ku chisangalalo ni akwawona abale ŵane ali mkumwa ukana.

Aŵalanje Jwakulalichila 7:16 soni Aloma 14:1, 10, kaneko akambilane yiwusyo ayi:

Mwakamulana ni malembaga, ana m’baleju akasagwile yamtuli? Ana mpaka atende yamtuli pakum’wona mundu jwine ali mkutenda yindu yele mtima wawo wangakunda kuyitenda?

Yakwakamuchisya kuti asaguleje yindu mwalunda

1. Amŵendeje Yehofa kuti ŵakamuchisyeje kusagula yakutenda.—Yakobo 1:5.

2. Awungunyeje m’Baibulo soni mabuku gakulondesya ya m’Baibulo kuti apate yampaka yakamuchisye. Mpaka awusye lunda kwa Aklistu ŵakumanyilila yejinji kuti ŵakamuchisye.

3. Aganichisyeje yampaka yitendechele mtima wawo soni wa ŵane payakusaka kusagulayo.

YAKUSAŴECHETA ŴANDU ŴANE: “Mundu mpaka atende yiliyose yakusaka. Yangali kandu kuti ŵane chayiwone wuli.”

Ana ligongo chichi tukusosekwa kuganichisyagasoni mwachapikanile Mlungu soni ŵandu ŵane mumtima ni yatusagwileyo?

YALIJIGANYISYE

Tukusasagula yindu yakuŵajilwa patumanyilile nganisyo sya Mlungu. Kaneko ni kuganichisyasoni naga yachitusaguleyo mpaka yakamuchisye ŵane kapena kwakuŵasya.

Yiwusyo Yakuwilisya

Ana mpaka asagule chamtuli yindu yampaka yimsangalasye Yehofa?
Ana mpaka awujiganye chamtuli mtima wawo kuti wakamuchisyeje kumanyilila yambone soni yakusakala?
Ana mpaka tutende yamtuli kuti tukakuŵasyaga ŵane?

Tumalisisye kulijiganya pa:

Akole Chakulinga Achi

Aganichisye yindu yakusaka kusagula kusogoloku. Kaneko akamulichisye masengo mfundo sitatu mu libokosi lyakuti “ Yakwakamuchisya Kuti Asaguleje Yindu Mwalunda”

Yakulinga yine:

Your other goal