LIJIGANYO 02

Baibulo Jikusatukamuchisya Kukola Sogolo Jambone

ALOLELE

Ŵandu pachilambopa akusimana ni yakusawusya yayikwatendekasya kuti akaŵaga ŵakusangalala, alajeje nganisyo soni kupikana kupweteka. Ana wawojo pakwete payatendechele yeleyi? Komboleka kuti akulaga ni ulwele kapena kuti mundu juŵamnonyelaga awile. Mwine mpaka aliwusyeje kuti, ‘Ana yili yakomboleka kola umi wakusangalala?’ Baibulo jikusajanga chiwusyo chelechi.

1. Ana Baibulo jikusasala yamtuli pakwamba yamsogolo?

Baibulo jangagamba kusala ligongo lyakwe chilambo chigumbele ni yakusawusya, nambo jikusasalasoni kuti yakusawusyayi yichimala. Yajikusasala Baibulo yikusatupa “chembecheyo.” (Aŵalanje Yelemiya 29:11, 12.) Chembecheyochi chikusatukamuchisya kupilila yakusawusya yetu soni kuŵa ŵakusangalala. Chikusatusimichisyasoni kuti tuchiŵa ŵakusangalala mpaka kalakala.

2. Ana Baibulo jikusasala kuti umi uchiŵa uli kusogoloku?

Baibulo jikusaŵecheta kuti jichiyika ndaŵi jele ngasipapagwa “chiwa, chanasa, kulila, kapena kupikana yipwetesi.” (Aŵalanje Chiwunukuko 21:4.) Yakusawusya mpela kulaga, ungali chilungamo, yilwele soni chiwa ngasiyipagwasoni. Baibulo jikusaŵecheta kuti ŵandu tachisangalalaga ni umi mpaka kalakala m’paladaiso pachilambopa.

3. Ana mpaka atende yamtuli kuti akulupilileje yajikusasala Baibulo?

Ŵandu ŵajinji akusakola chembecheyo, nambo akusakayichila yakwambecheyayo kuti yichitendekwa. Nambope yajikusasala Baibulo yichitendekwa. Mpaka aŵe ŵakusimichisya kuti yeleyi yichitendekwa naga ‘akupikanichisya Maloŵe ga Mlungu mwalung’wanu.’ (Masengo 17:11) Pakulijiganya Baibulo mpaka asagule kuyikulupilila yajikusajiganya Baibulo yakwamba yindu yayichitendekwa msogolo.

KULIJIGANYA YEJINJI

Chitulole yajikusasala Baibulo yayichitendekwa msogolo. Soni kuti chembecheyo chachikusimanikwa m’Baibulo chikwakamuchisya ŵandu ŵajinji.

4. Baibulo jikusatusalila kuti tuchikola umi wangamala soni wamlama

Kwende tulole yajikusasala Baibulo yayichitendekwa msogolo. Ana ni yindu yapi yakusayijembecheya mwachidwi, soni ligongo chichi?

Aŵalanje malemba gagali pasipa gagakusala yayichitendekwa msogolo kaneko aganichisye yiwusyo ayi:

Ana akuganisya kuti malembaga gali gakamuchisya kwa wawojo? Ana malembaga mpaka gape chembecheyo ŵamwiŵasa mwawo kapena achimjawo?

Aganichisye ali mkutama m’chilambo mwele:

MWANGALI . . .	JWALIJOSE . . .
kupikana kupweteka, kalambala kapena chiwa.—Yesaya 25:8.	chachawona achimjawo ŵele ŵaŵawile ali mkwimuka.—Yohane 5:28, 29.
kulwala kapena kulemala.—Yesaya 33:24; 35:5, 6.	chachisangalala ni chilu chambone soni chachikola machili mpela anyamata.—Yobu 33:25.
yindu yangali chilungamo.—Yesaya 32:16, 17.	chachikola yakulya yejinji, majumba gambone soni chachisangalala ni masengo gawo.—Salimo 72:16; Yesaya 65:21, 22.
kulaga ligongo lya ngondo.—Salimo 46:9.	chachiŵa pamtendele usyesyene.—Salimo 37:11.
kulagasika nganisyo.—Yesaya 65:17.	chachitama ni umi mpaka kalakala.—Salimo 37:29.

5. Yajikusasala Baibulo mpaka yitukamuchisye atamose apano

Ŵandu ŵajinji akusajasa mtima soni kutumbila ligongo lya yakusawusya yakusasimana nayo. Ŵandu ŵane akusalingalinga kuti achenje yindu. Alole yayitite pakwakamuchisya ŵane yakulochesya ya m’Baibulo. Alolele FIDIYO, kaneko akambilane yiwusyo ayi.

FIDIYO: Nasakaga Kumalana ni Yindu Yangali Chilungamo (4:07)

Mwakamulana ni fidiyoji, ana Rafika jwalagaga ni yindu yangali chilungamo yapi?
Atamose kuti yindu yangali chilungamoyo nganiyimala, ana Baibulo jamkamuchisye chamtuli?

Yajikusasala Baibulo pakwamba ya msogolo mpaka yitukamuchisye kumalana ni kulagasika nganisyo patusimene ni yakusawusya. Aŵalanje Misyungu 17:22 ni Aloma 12:12 kaneko akambilane yiwusyo ayi: