HISITOLIA 85
Neʼe Tupu Ia Sesu ʼi Te Falemanu
ʼE KOUTOU ʼiloʼi koa pe ko ai te kiʼi tamasiʼi ʼaenī? ʼIo, ʼe ko Sesu. Neʼe hoki tupu age pe ʼi te falemanu. ʼE fakatakoto e Malia ia Sesu ki te kaiʼaga manu, ʼaē ʼe tuku ki ai te meʼa kai ʼa te ʼu asino pea mo te tahi ʼu manu. Kae he koʼe ʼe nonofo ia Malia pea mo Sosefo mo te ʼu manu? ʼE mole ko te faʼahi ʼaia ke tupu ai he kiʼi tamasiʼi.
Koʼeni tona tupuʼaga: Ko te tuʼi ʼo Loma, ia Sesale Aukusito, neʼe ina fai te lao ʼe fakatotonu ai ke liliu te hahaʼi fuli ki te kolo ʼaē neʼe nātou tutupu ai ʼo tohi tonatou ʼu higoa. Pea neʼe tupu ia Sosefo ʼi Petelehemi. Kae ʼi tanā kaku atu mo Malia, neʼe mole kei ʼi ai he kogafale ke nā nonofo ai. Koia neʼe tonu ai ke nā ʼolo ʼo nonofo ʼi te falemanu. Pea ʼi te ʼaho ʼaia neʼe fānauʼi ai e Malia ia Sesu! Kae ohage ko te meʼa ʼaē ʼe koutou fakatokagaʼi, neʼe lelei pe te kiʼi tamasiʼi.
ʼE koutou sio koa ki te ʼu tagata tauhi ōvi ʼaē ʼe ʼōmai ʼo fakasiosio ia Sesu? Neʼe nātou nonofo ʼi te ʼu gāueʼaga ʼi te pōʼuli ʼo leʼoleʼo tanatou ʼu faga ōvi, pea neʼe mū ʼi tonatou ʼu tafaʼaki te mālama. Neʼe ko te ʼaselo! Neʼe matataku ʼaupito te ʼu tagata tauhi ōvi. Kae neʼe ʼui age e te ʼaselo kia nātou: ‘Tuku takotou mataku! ʼE ʼi ai taku logo lelei maʼa koutou. ʼI te ʼaho nei, ʼi Petelehemi, kua tupu te ʼAliki ko Kilisito. ʼE ina hāofaki anai te hahaʼi! ʼE koutou maʼu atu anai ia ia ʼe kofukofu ʼi te ʼu kie pea ʼe takoto ʼi te kaiʼaga manu.’ ʼI te moʼi temi pe ʼaia neʼe hā ai te ʼu tuʼuga ʼaselo pea nātou fakavikiviki ki te ʼAtua. Pea neʼe foimo ʼolo atu ai te ʼu tagata tauhi ōvi ʼo fakasiosio kia Sesu, pea ʼi te temi nei kua nātou maʼu ia ia.
ʼE koutou ʼiloʼi koa pe koʼe ʼe makehe ia Sesu? ʼE koutou ʼiloʼi koa pe ko ai moʼoni ia ia? Koutou manatuʼi, ʼi te ʼuluaki hisitolia ʼo te tohi ʼaenī neʼe tou palalau ʼo ʼuhiga mo te ʼuluaki Foha ʼo te ʼAtua. Ko te Foha ʼaia neʼe gāue mo Sehova ʼi te fakatupu ʼo te lagi pea mo te kele pea mo te tahi ʼu meʼa. Ko Sesu ia te Foha ʼaia!
ʼIo, neʼe toʼo e Sehova te maʼuli ʼo tona ʼAlo ʼi te lagi pea neʼe ina tuku ifo ki te ʼalo ʼo Malia. Pea neʼe tupu te kiʼi tamasiʼi ʼaia ohage pe ko te tuputupu ʼo te tahi ʼu kiʼi tamaliki ʼi te loto fatu ʼo tanatou ʼu faʼe. Kae ko te kiʼi tamasiʼi ʼaenī neʼe ko te ʼAlo ʼo te ʼAtua. Pea neʼe tupu ia Sesu ʼi te falemanu ʼaenī ʼo Petelehemi. Kua koutou mahino la ʼi te temi nei pe koʼe neʼe fiafia ʼaupito te kau ʼaselo ʼi tanatou fakahā ki te ʼu hahaʼi tauhi ōvi ʼaia kua tupu ia Sesu?