MANATU TAFITŌ | KO AI TE KAU KAKAMOʼONI ʼA SEHOVA?
Ko te faʼahiga hahaʼi feafeaʼi ia te kau Fakamoʼoni ʼa Sehova?
ʼE natou kau ki he kautahi fakamalamanei kaʼe mole ki he ʼu kutuga fakalotu. ʼE tuʼu ʼonatou pilo lalahi ʼi Amelika, kaʼe ko te tokolahi ʼo te kau Fakamoʼoni ʼa Sehova ʼe maʼuʼuli ʼi te tahi ʼu fenua. ʼI tona fakahagatonu, ʼe natou teitei toko valu miliona pea ʼe natou akoʼi ki te hahaʼi ia te Tohi-Tapu ia fenua ʼe 230 tupu. Koia, ʼe natou mulimuli ai ki te ʼu palalau ʼaeni ʼa Sesu: “E fakamafola anai te logo lelei aeni o te puleaga i te malamanei katoa, ke fakamooni ki te u puleaga fuli.”—Mateo 24:14.
Tatau aipe pe ko te fenua fea ʼe natou maʼuʼuli ai, ʼe natou fakalogo lelei ki te lao kaʼe ʼe mole natou kau ki te politike. Koteʼuhi ʼe natou fakalogo ki te tokoni ʼa Sesu ki te kau Kilisitiano ke “mole natou kau i te malamanei.” Ko te tupuʼaga la ʼaia, ʼo tanatou mole kau ki he ʼu faʼahi fakapolitike pea mo lagolago ki ai. (Soane 15:19; 17:16) ʼI tona fakahagatonu, lolotoga te Lua Tau Fakamalamanei neʼe pilisoniʼi, mo fakatagaʼi pea mo matematehi ia te kau Fakamoʼoni ʼa Sehova koteʼuhi neʼe natou nonofo agatonu ki tanatou tauhi. Neʼe tohi fenei e te patele Siamani: “ʼE feala ke natou fakamoʼoni neʼe ko natou pe ʼae neʼe fakafisi ki te tau ʼuhi ko ʼonatou leʼo ʼo loto, ʼi te temi ʼae neʼe takitaki ai te puleʼaga Siamani.” (Tolu Reich)
“ ʼE mahino ia ʼe natou maʼu [te kau Fakamoʼoni ʼa Sehova] he toe malohi ʼi te aga ʼae ʼe tonu ke fai. ʼE feala ke tou fakaʼaogaʼi ia natou ki he ʼu tuʼulaga maʼoluga ʼi te faʼahi fakapolitike, kaʼe ʼe mole feala ke tou sisio kia natou ʼi he temi ʼi te ʼu tuʼulaga ʼaia. . . . ʼE natou fakamoʼoni ki te ʼu takitaki fakapuleʼaga kaʼe ʼe natou tui ʼe gata pe ki te Puleʼaga ʼo te ʼAtua ʼe ina lavaʼi te fakatokatoka te ʼu faigataʼaia fuli ʼa te tagata.”
ʼE mole natou faiga anai ke fakagata tanatou felogoʼi mo te hahaʼi. Neʼe faikole fenei ia Sesu ki te ʼAtua ʼo ʼuhiga mo ʼana tisipulo: “E mole au kole atu kia koe ke ke too kehe natou mai te malamanei.” (Soane 17:15) ʼE natou hage pe ko te hahaʼi fuli. Koia la ʼae ʼe kotou sisio ai kia natou, ʼe natou gaue pea mo olo ʼo ako.