Ko Sehova ʼe Ko “Ia ʼAē ʼe Ina Haofaki” Tātou

“Ko Sehova ʼe tokoni anai kiā nātou pea mo ina haofaki anai nātou.”—PES. 37:40.

1, 2. Koteā te moʼoni maʼuhiga ʼo ʼuhiga mo Sehova ʼe fakalotofīmālie pea mo fakalotomālohi kiā tātou?

 KO TE malu ʼe fetogi. ʼI te foli e te kele ia te laʼā, ʼe fakatupu ai ia te fetofetogi ʼa te malu. Kae ko te Tupuʼaga ʼo te kele pea mo te laʼā ʼe mole fetogi ia. (Mala. 3:6) ʼE ʼui fēnei ʼi te Tohi-Tapu: “Ia ia ʼaē ʼe mole ʼi ai he fetogi ʼo te ʼaluʼaga ʼo te malu.” (Sake 1:17) Ko te moʼoni maʼuhiga ʼaia ʼo ʼuhiga mo Sehova ʼe fakalotofīmālie moʼoni pea mo fakalotomālohi kiā tātou, tāfito lā mokā tou tau mo he ʼu faigataʼaʼia. Koteā tona tupuʼaga?

² Ohagē ko te manatu ʼaē neʼe kua tou vakaʼi ʼi te ʼalatike ki muʼa atu, ko Sehova ʼe ko “Ia ʼaē ʼe ina haofaki” tana hahaʼi ʼi te ʼu temi muʼa. (Pes. 70:5) ʼE mole fetogi ia ʼi he temi pea ʼe ina fakahoko tuʼumaʼu tana fakapapau; koia, ʼe maʼu ai e tana kau ʼatolasio iā ʼaho nei ia he ʼu tupuʼaga ke natou falala ai “ ʼe tokoni anai kiā nātou pea mo ina haofaki anai nātou.” (Pes. 37:40) Neʼe haofaki feafeaʼi e Sehova tana ʼu kaugana ʼi totatou temi? ʼE feafeaʼi tana fakahoko ia te faʼahi ʼaia ʼo ʼuhiga mo tātou takitokotahi?

 Neʼe Ina Haofaki Tātou Mai Te Kau Fakafeagai

 3. He koʼē ʼe feala ke tou ʼiloʼi fakapapau ʼe mole tāʼofi anai e te kau fakafeagai ia te hahaʼi ʼa Sehova ke natou fakamafola ia te logo lelei?

³ ʼE mole he fakafeagai mai iā Satana ʼe ina tāʼofi anai ia te kau Fakamoʼoni ʼa Sehova ke natou tauhi ʼāteaina pē kiā Sehova tokotahi. ʼE ʼui papau fēnei mai ʼi te Folafola ʼa te ʼAtua: “Ko mahafu fuapē ʼe faʼu anai moʼo fakafeagai kiā te koe ʼe iku noa anai, pea ko lea fuapē ʼe lagaʼi anai ʼi te fakamāu ʼo fakafeagai kiā te koe ʼe ke tauteaʼi anai.” (Isa. 54:17) Neʼe faigaʼi e te kau fakafeagai ke natou tāʼofi ia te fai fakamafola ʼa te hahaʼi ʼa te ʼAtua, kae neʼe mole hona fua. Tou vakaʼi age muʼa ia te ʼu faʼifaʼitaki e lua.

4, 5. Koteā te fakafeagai neʼe hoko ki te hahaʼi ʼa Sehova ʼi te taʼu 1918, pea neʼe koteā tona fua?

⁴ ʼI te taʼu 1918, neʼe tau te hahaʼi ʼa Sehova mo te fakataga neʼe fakatuʼutuʼu e te kau takitaki lotu moʼo fakagata ia tanatou gāue fai fakamafola. ʼI te ʼaho 7 ʼo Maio, neʼe fakatotonu e te puleʼaga ke puke ia J. F. Rutherford, ʼaē neʼe ina takitaki ʼi te temi ʼaia ia te gāue fai fakamafola ʼi te mālamanei kātoa, pea mo ʼihi atu tehina ʼo te kautahi. Hili kiai māhina e lua, pea tukugākoviʼi ia te Tehina ko Rutherford pea mo tana ʼu kaugā gāue, ʼo ʼui neʼe natou fonofono moʼo fakafeagai ki te puleʼaga pea neʼe fai te ʼu fakatūʼā mamafa ke pilisoniʼi nātou. Neʼe ʼi ai koa he fua ʼo te fakaʼaogaʼi ʼaē e te kau fakafeagai ia te ʼu telepinale moʼo fakagata ia te gāue fai fakamafola? Kailoa ia!

⁵ Kotou manatuʼi ia te fakapapau ʼa Sehova: “Ko mahafu fuapē ʼe faʼu . . . moʼo fakafeagai kiā te koe ʼe iku noa anai.” ʼI te ʼaho 26 ʼo Malesio 1919, neʼe hoko ai te ʼaluʼaga fakaofoofo, hili māhina e hiva ʼo te pilisoniʼi ʼo te Tehina ko Rutherford pea mo tana ʼu kaugā gāue, neʼe fakagafua ke foaki te falā moʼo fakaʼāteaina te ʼu tehina ʼaia. ʼI te taʼu ʼaē neʼe hoa kiai, ʼi te ʼaho 5 ʼo Maio 1920, neʼe molehi e te telepinale ia te ʼu tukugākoviʼi ʼaē neʼe fai kiā nātou. Neʼe fakaʼaogaʼi e te ʼu tehina tanatou ʼāteaina ʼaia moʼo fakahaʼele ki muʼa ia te gāue ʼo te Puleʼaga. Neʼe koteā tona fua? Talu mai ai, neʼe hoko te toe tuputupu lahi ʼaupitō! ʼO ʼuhiga mo te ʼu fua lelei ʼaia, ʼe tonu ke fakamālo kiā “Ia ʼaē ʼe ina haofaki.”—1 Ko. 3:7.

6, 7. (a) Neʼe gaohi feafeaʼi ia te kau Fakamoʼoni ʼa Sehova ʼo Siamani ʼi te temi ʼaē neʼe takitaki ai e te kau Nasi, pea neʼe koteā tona ikuʼaga? (b) Koteā ʼaē ʼe tou ʼiloʼi papau ʼaki te ʼu meʼa ʼaē neʼe hoko ki te hahaʼi ʼa Sehova ʼo totatou temi ?

⁶ Tou vakaʼi ʼi te temi nei te lua faʼifaʼitaki. ʼI te taʼu 1934, neʼe fakapapau e Itilele ʼe ina molehi kātoa anai ia te kau Fakamoʼoni ʼa Sehova ʼi Siamani. Neʼe mole ko hana palalau fēia pē. Neʼe hoko moʼoni ia te puke pea mo te pilisoniʼi ʼo te kau Fakamoʼoni ʼa Sehova. Ko te toko lauʼi afe kau Fakamoʼoni neʼe gaohi koviʼi; ko te toko lauʼi teau neʼe matehi ʼi te ʼu lotoʼā fakamamahi. Neʼe fua koa ia te fakatuʼutuʼu ʼaē ʼa Itilele ke molehi kātoa ia te kau Fakamoʼoni? Neʼe ina fakagata kātoa koa te fakamafola ʼo te logo lelei ʼi Siamani?  Kailoa ia! Lolotoga te fakataga ʼaia, neʼe fakahoko fakafufū e totatou ʼu tehina ia te gāue fai fakamafola. ʼI te tō ʼo te puleʼaga Nasi, neʼe natou fakaʼaogaʼi tonatou ʼāteaina moʼo hoko atu ia te fai fakamafola. Iā ʼaho nei, ko kaugā fagona ʼo te Puleʼaga ʼi Siamani kua teitei toko 165 000. Ko “Ia ʼaē ʼe ina haofaki” neʼe ina toe fakahoko ia tana fakapapau ʼaenī: “Ko mahafu fuapē ʼe faʼu . . . moʼo fakafeagai kiā te koe ʼe iku noa anai.”

⁷ Ko te ʼu meʼa ʼaē neʼe hoko ki te kau Fakamoʼoni ʼa Sehova ʼo totatou temi, ʼe fakamoʼoni mai ko Sehova ʼe mole ina fakagafua anai ʼi he temi ke molehi fakakūtuga tana hahaʼi. (Pes. 116:15) Kae ʼe feafeaʼi ʼo ʼuhiga mo tātou takitokotahi? ʼE haofaki feafeaʼi e Sehova ia tātou takitokotahi?

ʼE Ina Puipui Koa Tātou Takitokotahi ʼi Te Faʼahi Fakasino?

8, 9. (a) ʼE tou ʼiloʼi feafeaʼi ʼe mole puipui tuʼumaʼu pē anai tātou ʼi te faʼahi fakasino? (b) Koteā ʼaē ʼe tonu ke tou manatuʼi?

⁸ Ko tātou takitokotahi ʼe tou ʼiloʼi ʼe mole puipui tuʼumaʼu pē anai tātou ʼi te faʼahi fakasino. ʼE tou mulimuli ki te aga ʼaē neʼe fai e te toko tolu kau Hepeleo agatonu, ʼaē neʼe natou fakafisi ke natou tulolo ki te fakatātā ʼaulo ʼo te Hau ko Nepukanesa. Ko te ʼu talavou e toko tolu ʼaia ʼaē neʼe manavasiʼi ki te ʼAtua neʼe mole natou fakatalitali ke puipui fakamilakulo nātou e Sehova ke mole natou lāvevea. (Lau ia Taniela 3:17, 18.) Ki muli age neʼe fakaʼāteaina nātou e Sehova mai te afi ʼo te gutuʼumu kakaha. (Tan. 3:21-27) Kae māʼiapē lā ʼi te temi muʼa, neʼe tahitahiga te hoko ʼo he fakaʼāteaina fakamilakulo. Tokolahi te ʼu kaugana agatonu ʼa Sehova neʼe matehi e te kau fakafeagai.—Hep. 11:35-37.

⁹ ʼE feafeaʼi iā ʼaho nei? Ko Sehova ʼe ko “Ia ʼaē ʼe ina haofaki” pea ʼe mahino ia ʼe feala ke ina haofaki te hahaʼi mai he ʼu ʼaluʼaga ʼe tuʼutāmaki ai tonatou maʼuli. ʼE feala koa ke tou ʼiloʼi papau te ʼu ʼaluʼaga ʼaē ʼe haofaki ai peʼe kailoa e Sehova he tahi? Kailoa ia. Kae ko he tahi neʼe hao mai he tuʼutāmaki, ʼe lagi ʼi tana manatu neʼe ko Sehova ʼaē neʼe ina haofaki ia ia. Tou tōkakaga naʼa tou meʼa noaʼi ia tana manatu ʼaia. Tahi ʼaē, tou manatuʼi tokolahi te kau Kilisitiano agatonu neʼe mamate ʼi tonatou fakatagaʼi, ohagē ko te meʼa neʼe hoko ʼi te temi ʼo te kau Nasi. Ko ʼihi neʼe mamate ʼi he ʼu ʼaluʼaga fakaʼofaʼofa. (Tnk. 9:11) ʼE feala ai ke tou feʼekeʼaki fēnei: ‘Neʼe mole lava “haofaki” koa e Sehova ia tana hahaʼi agatonu ʼaē neʼe fakapōgi ?’ ʼE mole feala ke moʼoni ia te ʼu palalau ʼaia.

10, 11. He koʼē ʼe mole he mālohi ʼa te tagata mokā hoko mai te mate, kae koteā ʼaē ʼe feala ke fai e Sehova ʼo ʼuhiga mo te mate?

¹⁰ Kotou tokagaʼi ia te faʼahi ʼaenī: ʼE mole feala ke tāʼofi e te tagata mokā hoko mai te mate, heʼe mole he tagata ʼe feala ke ina “haofaki tona nefesi mai te nima ʼo te Seole,” peʼe ko te Hatesi, te faitoka ʼaē ʼe ʼolo kiai te hahaʼi fuli. (Pes. 89:48) Kae ʼe feafeaʼi ʼo ʼuhiga mo Sehova? Ko te tuagaʼane neʼe hao ʼi te temi fakamataku ʼo te kau Nasi, ʼe ina manatuʼi te ʼu palalau neʼe fai age e tana faʼē neʼe ko te Fakamoʼoni moʼo fakalotofīmālieʼi ia ia ʼi te mamate ʼo te hahaʼi ʼaē neʼe ʼofa ai ʼi te ʼu lotoʼā fakamamahi: “Kapau ʼe mole feala ke tuʼu ake he tahi mai te mate, pea ko te mate ʼe mālohi age ia ʼi te ʼAtua, kae ā koa?” ʼE mahino ia ko te mate ʼe mole mālohi age ia ʼi te ʼAtua māfimāfi ʼo te maʼuli! (Pes. 36:9) Ko nātou fuli ʼaē ʼi te Seole, peʼe ko te Hatesi, ʼe manatuʼi nātou e Sehova, pea ʼe ina fakahao anai nātou fuli takitokotahi mai ai.—Luka 20:37, 38; Fakh. 20:11-14.

¹¹ ʼO fakatalitali ki te temi ʼaia, ʼe tokaga ia Sehova ki te maʼuli ʼo tana kau ʼatolasio agatonu iā ʼaho nei. Tou vakaʼi age muʼa ia ʼaluʼaga e tolu ʼaē ʼe mahino papau ia ʼe ko “Ia ʼaē ʼe ina haofaki” tātou.

ʼE Ina Puipui Tātou ʼi Te Faʼahi Fakalaumālie

12, 13. He koʼē ʼe ko te puipui fakalaumālie ʼaē ʼe maʼuhiga ʼaupitō, pea ʼe foaki feafeaʼi mai e Sehova ia te puipui ʼaia kiā tātou?

¹² ʼE foaki mai e Sehova ia te puipui fakalaumālie, ʼaē ʼe maʼuhiga ʼaupitō age ia. ʼUhi ko tātou ko he kau Kilisitiano moʼoni, ʼe tou mahino ai ʼe ʼi ai te meʼa ʼe maʼuhiga age ia ʼi totatou maʼuli ʼi te temi nei. Ko te koloa maʼuhiga e tahi ʼaē ʼe tou maʼu, ʼe ko tatatou ʼu felōgoi takitokotahi ʼaē mo Sehova. (Pes. 25:14; 63:3) Kapau ʼe mole tou felōgoi mo Sehova, pea ʼe mole he ʼuhiga ʼo totatou maʼuli ʼi te temi nei, pea ʼe puli  anai mo tatatou ʼamanaki ʼaē ki te maʼuli ʼi te kā haʼu.

¹³ Meʼa lelei foki, heʼe foaki mai e Sehova ia te tokoni ʼaē ʼe ʼaoga kiā tātou ke tou taupau ai he felōgoi lelei mo ia. Moʼo tokoni kiā tātou, ʼe tou maʼu ia tana Folafola, mo tona laumālie māʼoniʼoni, pea mo tana kōkelekāsio ʼi te mālamanei. ʼE feafeaʼi hatatou fakaʼaogaʼi lelei ia te ʼu tokoni ʼaia? ʼI tatatou ako fakalelei tuʼumaʼu ia tana Folafola, ʼe mālohi ai anai tatatou tui pea mo tatatou falala. (Loma 15:4) Kapau ʼe tou kole fakamālotoloto ia tona laumālie, pea ʼe ina foaki mai anai ia he mālohi ke tou tekeʼi ai te ʼu fakahala ʼaē ʼe tupu ai ia hatatou fai ia he aga ʼe kovi. (Luka 11:13) Kapau ʼe tou mulimuli ki te takitaki ʼa te kalasi ʼa te kaugana ʼi te ʼu tohi Fakatohi-tapu, pea mo te ʼu fono mo te ʼu fakatahi, pea ʼe fafaga anai tātou ʼaki te “meʼa kai [fakalaumālie] ʼi tona temi totonu.” (Mat. 24:45) Ko te ʼu tokoni ʼaia ʼe ko he puipui fakalaumālie maʼa tātou pea mo he ʼu tokoni ke tou nonofo ovi tuʼumaʼu pē ki te ʼAtua.—Sake 4:8.

14. Kotou fakamatala te meʼa neʼe hoko ʼe hā lelei ai ia te puipui fakalaumālie ʼaē ʼe foaki mai e Sehova.

¹⁴ ʼO ʼuhiga mo te puipui fakalaumālie ʼaia, tou manatuʼi ia te taumātuʼa ʼaē neʼe tou talanoa ki ai ʼi te kamataʼaga ʼo te ʼalatike ako ʼaē kua ʼosi. Hili ni ʼu ʼaho ʼi te kua ʼosi puli ʼo tanā taʼahine ko Theresa, neʼe fakahā age ia te logo fakaʼofaʼofa ʼaupitō: Neʼe fakapōgi tanā taʼahine. a ʼE manatuʼi fēnei e te tamai: “Neʼe au kole kiā Sehova ke ina puipui toku ʼofafine. ʼI tona maʼu leva ʼaē kua fakapōgi, neʼe au kamata feʼekeʼaki pe koʼē neʼe mole tali e Sehova taku ʼu faikole. ʼE au ʼiloʼi ʼe mole puipui fakamilakulo e Sehova ia tana hahaʼi takitokotahi. Neʼe au haga faikole ke au mahino ki te meʼa ʼaē neʼe hoko. Neʼe au loto fīmālie ʼi taku ʼiloʼi ʼaē ʼe foaki e Sehova he puipui fakalaumālie ki tana hahaʼi, ko tona fakaʼuhiga, ʼe ina foaki mai ia te meʼa ʼaē ʼe ʼaoga kiā tātou ke puipui ai ia tatatou ʼu felōgoi mo ia. Ko te puipui lā ʼaia ʼaē ʼe maʼuhiga tāfito age, heʼe fakalogo kiai totatou kā haʼu heʼegata. Neʼe puipui fēia e Sehova ia Theresa; neʼe tauhi agatonu kiā te ia ʼi te temi ʼaē neʼe mate ai. Neʼe au maʼu ia te tokalelei ʼi taku ʼiloʼi ʼaē kua fakalogo pē tona fakatuʼuake ki te ʼu nima ʼofa ʼo Sehova.”

ʼE Tokoni Mai ʼi Te Temi ʼo Te Mahaki

15. ʼE lava tokoni feafeaʼi mai ia Sehova mokā tou tau mo hotatou mahaki kovi?

¹⁵ ʼE feala kiā Sehova ke tokoni mai kiā tātou ‘ ʼi te takotoʼaga mahaki’ ohagē ko tana fai ʼaē kiā Tavite. (Pes. 41:3) Logolā ʼi te temi nei, ʼe mole haofaki tātou e Sehova ʼaki he fakamālōlō fakamilakulo, kae ʼe tokoni moʼoni mai ia kiā tātou. ʼO feafeaʼi? Ko te ʼu pelesepeto ʼaē ʼe tou maʼu ʼi tana Folafola, ʼe feala ke tokoni mai mokā tou fai he ʼu tonu fakapotopoto ʼo ʼuhiga mo he faitoʼo pea mo he tahi age ʼu faʼahi. (Taag. 2:6) ʼE feala ke tou maʼu he ʼu manatu pea mo he ʼu tokoni ʼe ʼaoga ʼi te ʼu ʼalatike ʼaē neʼe tā ʼi Te Tule Leʼo pea mo te Réveillez-vous ! ʼaē ʼe talanoa ki totatou mahaki. ʼAki tona laumālie, ʼe feala ke foaki mai e Sehova ia “te mālohi ʼaē ʼe fakalaka ʼi te mālohi māhani”  moʼo tauʼi ia totatou fihifihia pea mo taupau tatatou agatonu, tatau aipē peʼe koteā tona ikuʼaga. (2 Ko. 4:7) ʼAki te tokoni ʼaia, ʼe mole tou tuʼaniaʼi fau anai ia totatou mahaki, naʼa tupu ai anai ia hatatou mole kei fakamuʼamuʼa ia te ʼu faʼahi fakalaumālie.

16. Koteā ʼaē neʼe fai e te tehina ʼo ʼuhiga mo tona mahaki?

¹⁶ Kotou tokagaʼi ia te tehina tūpulaga ʼaē neʼe tou talanoa ki ai ʼi te kamataʼaga ʼo te ʼalatike ako ʼaē kua ʼosi. ʼI te taʼu 1998, neʼe maʼu tona mahaki ʼe higoa ko te sclérose latérale amyotrophique, peʼe ko te SLA, pea ki muli age neʼe palalisia kātoa leva ia. b Neʼe ina kātakiʼi feafeaʼi ia tona mahaki? ʼE ina fakamahino fēnei: “Neʼe ʼi ai te ʼu temi neʼe au lotomamahi ai ʼi taku manatu ʼaē ʼe feala pē ke au hao mai toku ʼu mamahi mo kapau ʼe au mate anai. Kā lahi fau toku lotomamahi, pea ʼe au faikole ke tuku mai e Sehova ia meʼa e tolu: ia he loto ʼe tokalelei, pea ke au fakatalitali, pea mo faʼa kātaki. Neʼe au logoʼi neʼe tali e Sehova ia taku ʼu kole ʼaia. ʼAki he loto ʼe tokalelei ʼe feala ai ke au metitāsioʼi ia he ʼu manatu fakalotofīmālie, ohagē lā peʼe feafeaʼi anai toku maʼuli ʼi te mālama foʼou mokā ʼe au haʼele anai, mo kai ki he meʼa kai ʼe kano lelei, pea mo toe fai palalau ai mo toku fāmili. Ko te fakatalitali ʼe tokoni mai ke au tali ia te ʼu mamahi pea mo te ʼu faigataʼaʼia ʼo toku palalisia. Ko te faʼa kātaki ʼe tokoni mai ke au nofo agatonu pea mālohi ʼi te faʼahi fakalaumālie. ʼE hagē pē ia te ʼu meʼa ʼaē ʼi toku loto ko te tagata fai pesalemo ko Tavite, heʼe au logoʼi ʼe tokoni mai ia Sehova ʼi taku takoto mahaki.”—Isa. 35:5, 6.

ʼE Tokaga Ki Totatou Maʼuli ʼi Te Faʼahi Fakasino

17. Koteā ʼaē ʼe fakapapau mai e Sehova kā ina fai maʼa tātou, pea koteā te fakaʼuhiga ʼo te fakapapau ʼaia?

¹⁷ ʼE fakapapau mai e Sehova ʼe ina foaki mai anai ia te ʼu meʼa ʼaē ʼe ʼaoga kiā tātou ʼi te faʼahi fakasino. (Lau ia Mateo 6:33, 34 pea mo Hepeleo 13:5, 6.) ʼE mole fakaʼuhiga leva ʼe ina foaki fakamilakulo mai anai ia te ʼu meʼa ʼaē ʼe ʼaoga kiā tātou ʼi te faʼahi fakasino, peʼe mole kei he ʼaoga ke tou gāue. (2 Tes. 3:10) Koʼenī te fakaʼuhiga moʼoni ʼo te fakapapau ʼaia: Kapau ʼe tou fakamuʼamuʼa ia te Puleʼaga ʼo te ʼAtua ʼi totatou maʼuli pea mo tou fia gāue moʼo taupau totatou maʼuli, pea ʼe feala ke tou falala ʼe tokoni mai anai Sehova ke tou maʼu ia te ʼu meʼa ʼaē ʼe ʼaoga ki totatou maʼuli. (1 Tes. 4:11, 12; 1 Tim. 5:8) ʼE feala ke ina foaki mai ia te ʼu meʼa ʼaē ʼe ʼaoga kiā tātou ʼi hona ʼaluʼaga fakaofoofo, ʼo feala pē ke ina fakaʼaogaʼi he tehina peʼe ko he tuagaʼane ke tokoni mai peʼe ke ina foaki mai he gāue.

18. Fakamatala ia he meʼa neʼe hoko ʼe fakahā ai ʼe feala pē kiā Sehova ke ina foaki mai ia te ʼu meʼa ʼaē ʼe ʼaoga kiā tātou mokā tou maʼuli faigataʼaʼia.

¹⁸ Kotou manatuʼi te faʼē ʼaē ʼe ina taupau tokotahi tana tamasiʼi, ʼaē neʼe tou talanoa ki ai ʼi te kamataʼaga ʼo te ʼalatike ako ʼaē kua ʼosi. ʼI tana mavae mo tana taʼahine ki te tahi koga meʼa, neʼe faigataʼa ia he maʼu ʼo hana gāue. ʼE ina fakamahino fēnei: “Neʼe au ʼalu ʼo fai fakamafola ʼi te ʼuhu, pea ʼi te ʼu hili hoʼatā fuli neʼe au kumi gāue. ʼE au manatuʼi ʼi te tahi ʼaho, neʼe au ʼalu ai ki te fale koloa ʼo toʼo mai he foʼi huʼa pipi. Neʼe au tuʼu ʼo sioʼi ia te ʼu lauʼakau, kae neʼe mole feʼauga taku foʼi falā moʼo totogi ia haku ʼu lauʼakau. Neʼe mole heʼeki ʼi ai he temi neʼe au lotomamahi fēia ai ʼi toku maʼuli. ʼI taku liliu ki fale ʼi te ʼaho ʼaia, neʼe fonu toku fakaheketālaʼa ko te lauʼakau kehekehe. Neʼe feʼauga aipē te ʼu lauʼakau ʼaia ke mā kai lolotoga ni ʼu māhina. Neʼe au tagi pea mo fakamālo kiā Sehova.” Mole tuai kiai, pea ʼiloʼi e te tuagaʼane, ko te ʼu kato lauʼakau ʼaia neʼe ʼaumai e te tehina ʼo te kōkelekāsio heʼe ʼi ai tana gāueʼaga. Ki muli age, neʼe  faitohi fēnei e te tuagaʼane ki te tehina ʼaia: “Tatau aipē mo kapau ʼi te ʼaho ʼaia neʼe au fakamālo ʼaupitō kiā te koe, kae neʼe au toe fakamālo foki kiā Sehova ʼi tana fakaʼaogaʼi tou agaʼofa moʼo fakamanatuʼi mai kiā te au ia tona ʼofa.”—Taag. 19:17.

19. ʼI te mamahi lahi, koteā ʼaē kā tui papau anai kiai ia te ʼu kaugana ʼa Sehova, pea koteā ʼaē ʼe tou fakatotonu ke tou fai ʼi te temi ʼaenī?

¹⁹ ʼE hā lelei mai, ko te meʼa ʼaē neʼe fai e Sehova ʼi te temi muʼa pea mo totatou temi, ʼe tou maʼu ai he tupuʼaga ke tou falala ʼe ko Ia totatou Tokoni. Kua vave pē, kā hoko mai anai ia te mamahi lahi ki te mālama ʼa Satana, pea ʼi te temi ʼaia ʼe ʼaoga tāfito ai anai kiā tātou ke tokoni mai ia Sehova. Kae ʼe feala pē anai ki te ʼu kaugana ʼa Sehova ke natou falala kātoa kiā te ia. ʼE feala anai ke natou lagaʼi ake ʼanatou ʼulu pea mo fakafiafia, ʼi tanatou ʼiloʼi ʼaē kua ovi mai tonatou haofaki. (Luka 21:28) ʼI te temi ʼaenī, logolā ia te ʼu faigataʼaʼia ʼaē ʼe feala ke hoko mai kiā tātou, tou fakatotonu ke tou falala kiā Sehova, ʼaki tatatou tui papau ʼaē ko totatou ʼAtua ʼaē ʼe mole fetogi, ʼe ko “Ia ʼaē ʼe ina haofaki” anai tātou.

[ʼU nota]

ʼE Kei Kotou Manatuʼi Koa?

• ʼE lava haofaki feafeaʼi e Sehova ia nātou ʼaē neʼe fakapōgi?

• He koʼē ʼe maʼuhiga ʼaupitō age ia te puipui fakalaumālie?

• Koteā te fakaʼuhiga ʼo te fakapapau mai e Sehova ʼe ina foaki mai anai te ʼu meʼa ʼaē ʼe ʼaoga kiā tātou ʼi te faʼahi fakasino?

[ʼU fehuʼi ʼo te ako]

[Paki ʼo te pasina 15]

Neʼe puke te Tehina ko Rutherford pea mo tana ʼu kaugā gāue ʼi te taʼu 1918, pea neʼe fakaʼāteaina nātou ki muli age, pea neʼe molehi ia te ʼu tukugākovi ʼaē neʼe fai kiā nātou

[Paki ʼo te pasina 17]

ʼE feala ke tokoni mai ia Sehova ʼi te “takotoʼaga mahaki”