Xoossaa Qaalaappe Tamaara

Haymaanooteti Waananee?

Ha huuphe yohoy neeni oychidoba gidana danddayiya oyshatu zaaruwaa qonccissees; qassi he zaarota Geeshsha Maxaafan awan demmana danddayiyaakko yootees. Yihoowa Markkati he zaarota nenaara tobbanau ufayttoosona.

1. Ubba haymaanootetikka loˈˈoo?

Daro haymaanootetun Xoossau yayyiya ashkke asati deˈoosona. I he asata beˈees, qassi etau qoppees. SHin, issi issi asay haymaanootiyaa sunttan iitabaa oottiyoogee azzanttiyaaba. Beni wode, haymaanootiyaa kaalettiyaageeti banttanaara eqettiyaageeta ubba tuggayidosona. (2 Qor. 4:3, 4; 11:13-15) Ha wodiyan, oduwan siyiyoogaadan, haymaanootiyaa kaalettiya issoti issoti shabbirssaa denttettidosona woy olaa kaafidosona, woykko guutta naata qohidosona.—Maatiyoosa 24:3-5, 11, 12 nabbaba.

Geeshsha Maxaafay haymaanooteti naaˈˈu qommo, giishin woy tuma woy worddo gidiyoogaa yootees. Worddo haymaanootee Xoossaabaa tumaa tamaarissenna. Gidikkokka, Xoossaa Yihooway asay abaa tumaa eranaadan koyees.—1 Ximootiyoosa 2:3-5 nabbaba.

2. Haymaanooteti waananee?

Xoossay bana siiqoos giiddi abaa wordduwaa tamaarissiya haymaanootetun asay cimettanaadan koyenna. He haymaanooteta mintti kaalliyaageeti Seexaanaa Dabloosi haariyo alamiyaara dabbotiyoogaa dosoosona. (Yaaq. 4:4; 1 Yoh. 5:19) Xoossaayyo exatiyoogaappe asa kawotettau exatiya haymaanooteta Xoossaa Qaalay shaaramuxen leemisees. Geeshsha Maxaafay he shaaramuxiyo “Gita Baabiloono” yaagidi, beni Nohe wode Bashsha Haattaappe simmin worddo haymaanootee doommido katamaa sunttan xeesees. Asaa naata balettiyaanne huqqunniya haymaanootiyaa Xoossay matan xayssana.—Ajjuutaa 17:1, 2, 5, 17; 18:8, 23, 24 nabbaba.

 3. Xoossay saˈaa asaa ubbaa ufayssiyaabaa oottanay ayba ogiyaanee?

Worddo haymaanootee mata wode xayanaagee mishiraacho. Hegee saˈa ubban deˈiya asaa huqqunnaappe woppissana. Hegaappe simmin worddo haymaanootee asay shaahettanaadan oottennanne asaa balettenna. Qoppiya mereta ubbay issippe issi tumu Xoossau goynnana.—Isiyaasa 11:9; Ajjuutaa 18:20, 21; 21:3, 4 nabbaba.

4. Ashkke asay waatana bessii?

Worddo haymaanootiyaa giddon deˈiya ashkke asaa Yihooway dogibeenna. I tumaa tamaarissiyoogan hegaa mala asata issippe shiishshiiddi deˈees.—Mikiyaasa 4:2, 5 nabbaba.

Yihooway baayyo oottanau koyiyaageeti ba soo asa gidanaadan mokki ekkees. Nuuni Yihoowayyo oottiyoogaa doommiyo wode nu laggetinne dabboti yiillotiyaaba gidikkonne, daro anjjuwaa demmoos. Xoossaa dabbo gidoos; ayyaanaaban so asaa gidida, siiqiya dabbotanne merinaa deˈuwaa hidootaa demmoos.—Marqqoosa 10:29, 30; 2 Qoronttoosa 6:17, 18 nabbaba.

Gujo qofaa demmanau Yihoowa Markkati attamissido ha maxaafaa shemppo 15nne 16 xeella. Tumuppe Geeshsha Maxaafay Tamaarissiyoy Aybee?

[Sinttaa 26n deʼiya misiliyaa qonccissuwaa]

The Complete Encyclopedia of Illustration/J. G. Heck