Aqo Deꞌoy Giiga Xayiyoy Aybissee?

“Parisaaweti paaccanau Yesuusakko yiidi, ‘Issi asi issiban gaasottidi, ba machchiyo yeddanau nu higgee azazii?’ yaagidi a oichchidosona.”—Maa. 19:3.

YESUUSA wode deꞌida issoti issoti, ‘Aqo deꞌoy laalettennan deꞌana danddayettii, qassi hegaadan deꞌana koshshii?’ giidi oychidosona. Etayyo Yesuusi hagaadan giis: “Xoossai koiro eta medhdhiiddi, attumaasanne maccaasa oottiis. Hegaa gishshau, ‘Issi asi ba aawaanne ba aayyiyo aggi bayidi, ba machcheera issippe de7ees; eti naa77ai issi asa gidoosona’ yaagiya qaalaa nabbabibeekketii? Hegaa gishshau, eti issi asa gidiyoogaappe attin, naa77u asa gidokkona; hegaa gishshau, Xoossai issippe gattidoogaa asi shaakkoppo.” a (Maa. 19:4-6) Aqo deꞌuwan asay shaahettennan deꞌanaadan Xoossay koyidoogee qoncce.

Ha wodiyan daro biittan, machiyo yeddiyoogan, xeetaappe 40 kushe gidiya woy hegaappe dariya aqo deꞌuwan asay issippe deꞌiyoogaa aggidi ‘shaahettees.’ Geeshsha Maxaafay aqo deꞌuwaa xeelliyaagan yootiyo zoree ha wodiyan maaddennabee? Aqo deꞌoy giiga xayiyoy he giigissoy bala gidido gishshataassee?

Ha leemisuwaa qoppite: Azinanne machcho gidida naaꞌꞌu keetta asay issi mala kaamiyaa shammidosona. Issi keetta asay bantta kaamiyaa loytti oyqqoosona; qassi akeekan laaggoosona. Yaatiyo gishshau, eta kaamee moorettenna. Hankkooti qassi, bantta kaamiyaa loytti oyqqanau aynne baaxetokkona; qassi akeeki baynna hanotan laaggoosona. He kaamee moorettiis; yaatin aggi bayidosona. Naaꞌꞌanttoogee moorettanaadan oottidabay aybee—kaamiyan paccidabi deꞌiineeyye a godati baliinee? He hanotan daro baggi oyshettiyaageeti he kaamiyaa godata gidiyoogee tuma.

Hegaadankka, daro aqo deꞌoy giiga xayiyoogee aqo deꞌo giigissuwan paccidabi deꞌees giyoogaa gidenna. Miilooniyan qoodettiya aqo deꞌoy giiga gididoogee ha giigissuwan paccidabi baynnaagaa bessees. Giiga aqo deꞌoy issi uri, keetta asaynne heeraa asay ufayttanaadaaninne woppu gaanaadan oottees. Aqo deꞌoy laalettennan deꞌanaadan kaamiyaagaadan ubbatoo loytti oyqqana koshshees.

Intte aqo deꞌo oyqqoosappe guutta wode woy daro laytta gidin, aqo deꞌuwaa loytti oyqqanaunne minttanau Geeshsha Maxaafay zoriyo zoree maaddees. Kaallidi deꞌiya sinttatun issi issi leemisoti qonccidosona.

[Tohossa qofaa]