NE SHOORUWAA mataara kanttaydda a sarotaasa. I nebaanne ne soo asaabaa issi issibaa akeekidoogaa mata wode eradasa. Ikka nena sarotidi wuttees. I, “Nena issibaa oychoo? Intte hara asaappe dummatanaadan oottidabay aybee?” yaagees. Neeni, “Ne giyoobay tawu gelibeenna” yaagaasa. I hagaadan gees: “Intte Yihoowa Markka gidekketii? Intte hara asaappe dumma. Intte hara haymaanootiyaa kaalliya asaa mala gidekketa; baalaa bonchekketa, polotikan oossinne exatekketa, qassi olettekketa. Intte giddon sijjaaraa uyiya uri baawa. Qassi intte soo asaa kanddoy keehi loꞌꞌo. Intte hara asaappe daroban dummatanaadan oottiyaabay aybee?”

Hegaa zaaroy kaallidi deꞌiyaagaa gidiyoogaa eraasa: “Nuuni Xoossaa Kawotettawu haarettoos. Kawoy Yesuusi nuna ubbatoo geeshshees. Nuuni a geeduwaa kaallidi ha iita alamiyan dumma asa gidanaadan i nuna maaddiiddi deꞌees. Masiyaa Kawotettay Yihoowa bonchissanawu Xoossaa asaa ayyaanaaban, kandduwaaninne dirijjitiyaara gayttidaagan waatidi geeshshiiddi takkidaakko ha shaahuwan beꞌana.