Momo Lie Olohuela Via Siatela Oku Nyõleha?

‘Va Fariseo vamue veya ku Yesu, yu vo seteka’ vati: “Ci tava okuti ulume umue o nyalela ukãi waye evelo limue?”—Mateo 19:3.

OMANU vamue va kala koloneke via Yesu, vo pulisile nda citava oku nyõla olohuela ale sio. Pole, Yesu wa va kumbulula hati: “Ka wa tangeli okuti kefetikilo usovoli wa va lulika ulume lukãi? Noke wa amisako hati, “Ulume o sia isiaye la inaye, o likakatela lukãi waye, kuenje kavali kavo va linga etimba limuamue. Oco ka va lingi vali omanu vavali, puãi va linga omunu umosi. Oco eci ca tokekisa Suku omunu ka ka ci [tepe].” * (Mateo 19:4-6) Suku wa sokiya okuti olohuela vi kala otembo yalua.

Koloneke vilo, kolofeka vialua ci soka 40 koloporsendu viomanu va kuele, va pitĩla kesulilo poku linyãla. Anga olonumbi Viembimbiliya viatiamẽla kolohuela ka vi kuete vali esilivilo? Nda olohuela vi nyõleha ci lekisa hẽ okuti esokiyo liaco ka lia suilepo?

Konomuisa ocindekaise eci: Olohueli vimue via landa akãlu. Olohueli viatete, vi tata ciwa ekãlu liavo, kuenda va liendisa lutate. Ekãlu liaco ka linyõleha. Olohueli viavali, vi pita otembo oku ñuala ñuala lekãlu liavo kuenda ka va li tati ciwa. Noke ekãlu liaco li nyõleha kuenje va li siapo. Kocindekaise colohueli viavali, helie o kuete ekandu, ekãlu ale, ele ovo muẽle? Ocili okuti, olohueli viavali ovio vi kuete ekandu.

Cimuamue haico, nda olohuela vialua vi nyõleha, ka ci lomboloka okuti esokiyo liaco ka li kasi ciwa. Kuli omanu valua okuti olohuela viavo vi enda ciwa. Eci, ci nena esanju loku kolapo komunu lomunu vepata, kuenda komanu vosi. Olohuela vi sokisiwa lekãlu okuti, vi sukila oku vi tata ciwa, oco vi amameko otembo yalua.

Oco olohuela viove via amameko, olonumbi Viembimbiliya vi pondola oku ku kuatisa oku vi tata loku vi pamisa, pole ci sukila oku likolisilako calua. Vovipama vi kuãimo mu sangiwa ovolandu atiamẽla kondaka eyi.

[Atosi pombuelo yamẽla]