Yehosua wa fa eci a tẽlisa 110 kanyamo noke yoku songuila afendeli va Yehova vokuenda kuanyamo alua. Osimbu a kala komuenyo, va Isareli va fendelele Yehova. Pole, noke yolofa via Yehosua ovo va fetika oku fendela oviteka ndeci va Kanana va enda oku linga. Omo okuti va Isareli ka va kuamele Yehosua otembo yosi, Yehova wa ecelela okuti soma umue wo ko Kanana o tukuiwa hati, Yavini o va talisa ohali. Omanu va pinga ekuatiso ku Yehova kuenje Yehova wa eca kokuavo usongui umue wokaliye o tukuiwa hati, Baraka. Eye wa laikele oku kuatisa omanu oku tiuka ku Yehova.

Ukãi umue uprofeto o tukuiwa hati Devora wa tumiwa oku enda ku Baraka. Eye wa kuatele esapulo limue lia tunda ku Yehova oco a liece ku Baraka liokuti: ‘Kuata 10.000 kalume kuende ka lisangi lolohoka via Yavini kolui Kisone. O ka yula Sisera kesongo kolohoka via Yavini kocitumãlo caco.’ Baraka wa sapuila Devora hati: ‘Ngenda, pole, te lika nda ove enda lame.’ Eye wa popia hati: ‘Ngenda muẽle kumue love. Pole, kũlĩha okuti haveko o ka ponda Sisera. Yehova wa popia okuti ukãi umue eye o ka ponda Sisera.’

Devora wa enda kumue la Baraka kuenda olohoka viaye via lamana Komunda Tavore oku lipongiyila uyaki. Eci Sisera a ci yeva, wongolola  akãlu aye uyaki kumue lolohoka viaye vocimbota. Devora wa sapuila Baraka hati: ‘Lilo olio eteke Yehova a ka ku ĩha eyulo.’ Baraka kumue lalume va soka 10.000 va lokila komunda oku ka lisanga lolohoka via pama via Sisera.

Yehova wa ecelela okuti olui Kisone lu yuka ovava. Akãlu uyaki a Sisera a saka volonata. Sisera wa siapo ekãlu liaye kuenje wa fetika oku lupuka. Baraka kumue lasualali vaye va yula olohoka via Sisera, pole, Sisera wa tila! Eye wa lupuka, yu wa salama vombalaka yukãi umue o tukuiwa hati, Yaele. Ukãi waco wo wĩha asenjele oco a nyue, noke wo sikĩlĩla lombilikiti. Omo okuti ulume waco wa kavele calua wa pekela. Noke Yaele levando lialua, wamẽla kokuaye kuenda wo valela lopeleko yombalaka vutue. Kuenje Sisera wa fa.

Baraka weya oku sandiliya Sisera. Yaele wa talama posamua yombalaka yaye, yu wa popia hati: ‘Enju, hu lekise omunu weya oku sandiliya.’ Baraka wa iñila kuenje wa mola Sisera posi okuti wa fa. Baraka kuenda Devora va sivaya Yehova locisungo omo lioku ecelela okuti va Isareli va yula ovanyãli vavo. Vokuenda kueci ci soka 40 kanyamo a kuamamo, va Isareli va kuatele ombembua.