Uiraa a te feia taio

No te aha te pohe o te mau tavini taiva ore a Iehova ‘e mea taoˈa ˈi i to ˈna aro’?

▪ Ua himene te hoê papai salamo: “E mea taoˈa i te aro o Iehova te pohe o to ˈna ra mau tavini moˈa,” aore ra taiva ore. (Sal. 116:15) Mea faufaa roa no Iehova te ora o ta ˈna mau tavini atoa. Teie râ, e ere noa no te pohe o te hoê tavini te mau parau o te Salamo 116 i faahitihia na.

A vauvau ai i te hoê oreroraa parau hunaraa, e ere i te mea tano ia faaohipa i te Salamo 116:15 no te Kerisetiano tei pohe, noa ˈtu e e tavini taiva ore o ˈna a Iehova. No te aha? No te mea e ere teie mau parau a te papai salamo i te mea taotiahia i te hoê noa taata. Ua hinaaro râ oia e parau e eita te Atua e faatia ia pohe ta ˈna mau tavini taiva ore atoa ei pǔpǔ, mea taoˈa roa hoi ratou no ˈna.—A hiˈo i te Salamo 72:14; 116:8.

Te haapapu maira te Salamo 116:15 e eita Iehova e faatia e ia haamouhia ta ˈna mau tavini taiva ore ei pǔpǔ. Te faaite ra to tatou aamu e ua faaoromai tatou i te mau tamataraa e hamani-ino-raa ino mau. E haapapuraa te reira e eita roa ˈtu te Atua e faatia ia haamouhia tatou.

E Atua mana hope Iehova e e mea papu maitai ta ˈna opuaraa. Eita roa ˈtu ïa o ˈna e vaiiho ia haamouhia tatou ei pǔpǔ. Ahani e faatia te Atua i te reira, e au ra e mea puai aˈe ta ˈna mau enemi ia ˈna. E ere roa ˈtu râ! Eita atoa ta ˈna opuaraa, oia hoi ia parahihia te fenua e te feia tei vai taiva ore ia ˈna, e tupu. (Isa. 45:18; 55:10, 11) Te auraa ïa e e mou te taviniraa moˈa e pûpûhia ra ia Iehova i te mea e aita e taata e haamori faahou ra ia ˈna i roto i te aua fenua o to ˈna hiero rahi! Aita ïa e “fenua apî,” oia hoi te hoê totaiete taata tia o te ora i te fenua i raro aˈe i te “raˈi apî.” (Apo. 21:1) I te mea e aita e huiraatira, eita atoa ïa te Mesia e faatere e tausani matahiti.—Apo. 20:4, 5.

Ia vaiiho te Atua i to ˈna mau enemi ia haamou i to ˈna nunaa taatoa i te fenua, e aimârôhia ïa to ˈna tiaraa e to ˈna iˈoa. E e ino roa atoa to ˈna tiaraa Arii o te ao taatoa. Hau atu â, te faatura nei te Atua ia ˈna iho e i to ˈna iˈoa moˈa. A feruri na: Ei Atua “ino ore,” e paruru iho â oia i te pǔpǔ taata tei tavini ia ˈna ma te taiva ore. (Deut. 32:4; Gen. 18:25) Hau atu â, eita roa ˈtu te manaˈo e e vaiiho o ˈna e ia haamouhia tatou e tuati ra i te Parau a te Atua, o te na ô ra hoi: “No to ˈna ra iˈoa rahi e ore ai Iehova e faarue ai i to ˈna ra taata.” (Sam. 1, 12:22) Oia mau, “e ore hoi Iehova e faarue i to ˈna taata, e ore e haapae i ta ˈna ra tufaa.”—Sal. 94:14.

Mea mahanahana mau â ia ite e eita te nunaa o Iehova i te fenua e haamouhia! No reira, e vai taiva ore noa anaˈe ia Iehova ma te tiaturi i ta ˈna i fafau: “Te mauhaa ra n[o] oe i hamanihia ˈi ra, e ore ïa e tupu; e te mau vaha atoa e patoi ia oe i te haavaraa ra, e hapa ïa ia oe. O te tufaa teie o te mau tavini o Iehova; e tei ia ˈu te faatia ia ratou.”—Isa. 54:17.

[Parau iti faaôhia i te api 12]

Eita roa ˈtu te Atua e faatia e ia haamouhia to ˈna nunaa