Aberahama—E taata faaroo

Te tia noa ra Aberahama i rapaeau a hiˈo ai i te anaana o te mau fetia o te raˈi i roto i te rui muhu ore. Te feruri ra o ˈna i ta te Atua i fafau, oia hoi e rahi mai to ˈna huaai mai teie mau fetia. (Genese 15:5) No ˈna, ua riro te reira ei haamanaˈoraa e mea papu ta Iehova i fafau atu. Eaha hoi, mai te peu e e puai to Iehova no te poiete i te ao nui aano e i te mau mea atoa i roto, aita anei ïa to ˈNa e puai no te horoa i te tamarii na Aberahama raua Sara? Mai tera te faaroo o Aberahama.

EAHA TE FAAROO? “Te faaroo,” i roto i te Bibilia, o te tiaturiraa papu ïa i te tahi mea te ore e itehia e o tei niuhia i nia i te mau haapapuraa. E tiatonu te taata e faaroo to ˈna i te Atua i te tupuraa o ta Iehova mau parau fafau ma te tiaturi papu e e tupu iho â te reira.

MEA NAFEA ABERAHAMA I TE FAAITERAA I TO ˈNA FAAROO? Ua faaite Aberahama e te tiaturi ra o ˈna i ta te Atua mau parau fafau. Ma te faaroo, ua faarue o ˈna i to ˈna oire e ua tiaturi e e tapea Iehova i ta ˈNa i fafau ma te faaite ia ˈna i te tahi atu fenua. Ma te faaroo, ua hahaere Aberahama na Kanaana ma te tiaturi e na to ˈna huaai tera fenua i te pae hopea. E ma te faaroo, ua farii Aberahama i te pûpû ia Isaaka ei tusia ma te tiaturi e ia titauhia e faahoˈi mai Iehova ia ˈna i te ora.—Hebera 11:8, 9, 17-19.

Ua hiˈo noa Aberahama i mua eiaha i muri. E oraraa fanaˈo aˈe to Aberahama raua Sara i Ura i Kanaana, aita râ raua i “nounou i taua fenua no reira mai ratou.” (Hebera 11:15) Ua hiˈo noa raua mea nafea te Atua e haamaitai ai ia raua e to raua huaai i mua nei.—Hebera 11:16.

Ua tano anei Aberahama i te faatupuraa i te faaroo? Mea papu e e. Ua tapea Iehova i ta ˈna mau parau fafau atoa. E rahi mai iho â te huaai o Aberahama a riro mai ai ei nunaa, o Iseraela ïa. I te tau au, e faaea te mau Iseraela i Kanaana, te fenua ta Iehova i fafau ia Aberahama.—Iosua 11:23.

EAHA TE HAAPIIRAA E HUTI MAI? E nehenehe e tiaturi papu e e faatupu Iehova i ta ˈna i fafau. I te mata taata, eita paha te tahi mau parau fafau e tupu. Ua papu râ ia tatou e ‘e tia te mau mea atoa nei i te Atua.’—Mataio 19:26.

Te haapii atoa maira te hiˈoraa o Aberahama ia hiˈo noa i ta tatou e fanaˈo i mua nei, eiaha i ta tatou i fanaˈo na. Tera ïa ta Jason i haapii i te rave. E maˈi to ˈna o tei  haaparuparu roa i to ˈna tino. “Te faˈi nei au e i te tahi taime e manaˈonaˈo noa vau mea nafea i na mua ˈˈe,” ta Jason ïa e parau ra. Te na ô faahou ra oia: “O te tahi mau mea rii ta ˈu e mihi roa ra, mai te tauahiraa i ta ˈu vahine ra o Amanda.”

Te tiaturi papu nei râ Jason e e faatupu iho â Iehova i ta ˈna i fafau, oia atoa e fatata roa to tatou fenua i te riro ei paradaiso e e ora te taata taiva ore e a muri noa ˈtu ma te ea maitai. * (Salamo 37:10, 11, 29; Isaia 35:5, 6; Apokalupo 21:3, 4) “E haamanaˈo vau e to mua te tau maitai aˈe,” ta Jason ïa e parau ra ma te faataa: “Fatata roa tera mau mea atoa—te hepohepo, te taiâ, te oto, te manaˈo faahapahapa—i te oti e i te mou roa.” E hiˈoraa faahiahia mau Aberahama no te faaroo!

[Nota i raro i te api]