E nehenehe outou e maramarama i te Bibilia

3. A farii i ta vetahi ê tauturu

Ua tere haere atoa Edward John Eyre, ratere maimi, na te vahi papu ano o Nullarbor, i ropu ia Auteralia. Ua haapii te feia tumu no reira ia ˈna e nafea e noaa ˈi te pape i roto i te haapueraa one e te mau tumu eucalyptus. Ua ora mai Eyre no to ˈna fariiraa i te tauturu a te feia tei matau maitai i te fenua.

MAI ta teie hiˈoraa e faataa ra, e hinaaro-pinepine-hia te tauturu a te hoê taata aravihi aˈe ia oti roa te hoê ohipa fifi. Oia atoa ia haamata outou i te taio i te Bibilia.

Aita Iesu i manaˈo e e maramarama ta ˈna mau pǐpǐ i te Bibilia ma te tauturu ore. I te hoê taime, “ua faaite [aore ra haamaramarama] maira oia i to ratou aau ia ite ratou i te parau i papaihia.” (Luka 24:45) Ua ite Iesu e e hinaaro te feia taio i te Bibilia i te tauturu no te maramarama i te mau haapiiraa a te mau Papai.

Na vai e tauturu?

Ua titau Iesu i ta ˈna mau pǐpǐ mau ia horoa i teie tauturu. Hou to ˈna maueraa i nia i te raˈi, ua faaue Iesu: “E teie nei, e haere outou e faariro i te mau fenua atoa ei pǐpǐ, . . . ma te haapii atu ia ratou i te haapao i te mau mea atoa ta ˈu i parau atu ia outou.” (Mataio  28:19, 20) Te ohipa matamua a te mau Kerisetiano, o te haapiiraa ˈtu ïa, oia atoa te faataaraa e nafea ia faaohipa i te mau faaueraa tumu bibilia i roto i te oraraa o te mau mahana atoa. E tauturu te mau Kerisetiano mau ia vetahi ê ia maramarama i te Bibilia.

I muri iti aˈe i to Iesu horoaraa i teie faaueraa i ta ˈna mau pǐpǐ, ua tupu te hoê ohipa anaanatae roa. Te faatia ra te Bibilia e te taio ra te hoê taata mana a te arii vahine no Etiopia, i te hoê tuhaa o te parau tohu a Isaia. Aita oia e taa ra i ta ˈna e taio ra. Te na ô ra hoi tera mau irava: “E arataihia oia i te taparahiraa mai te mamoe ra, e mai te arenio e mamû noa i te taata e paoti i tana huruhuru ra, aore atoa hoi to ˈna vaha i parau. I faaorehia ta ˈna parau i tana haehaaraa ra, e na vai to ˈna ui e taua parau? i tâpû-ê-hia to ˈna ora i te ao nei.”—Ohipa 8:32, 33; Isaia 53:7, 8.

Ua ui te taata mana ia Philipa, te hoê Kerisetiano aravihi tei ite maitai i te mau Papai: “No vai ta te peropheta nei parau, no ˈna iho anei, e no te tahi taata ê anei?” (Ohipa 8:34) Ua haere ê na te taata Etiopia haavare ore e  haamori i Ierusalema, e ua pure paha oia no te ani i te aratairaa. Te taio ra iho â ïa oia ma te aau tae e te haehaa. Aita râ oia e taa ra i tera mau irava. Ua ani haehaa ˈtura oia ia Philipa ia tauturu ia ˈna. No to ˈna oaoa rahi no ta Philipa faataaraa, ua turaihia oia ia riro ei Kerisetiano.—Ohipa 8:35-39.

Te tamau noa ra te mau Ite no Iehova i te ohipa i ravehia e Philipa e te tahi atu mau Kerisetiano matamua. I e 235 tiahapa fenua, te tauturu noa nei te mau Ite ia vetahi ê ia maramarama i ta te Bibilia e haapii mau ra. Maoti ïa te haapiiraa i te mau Papai ia au i te mau tumu parau, te hoê ravea no te hiˈopoa riirii i ta te Bibilia e parau ra no nia i te hoê tumu parau taa maitai. *—A hiˈo i te tumu parau  “Pahonoraa tano i te tahi mau uiraa bibilia.”

“Ua pahonohia ta ˈu mau uiraa atoa”

Ua haamata Steven, Valvanera, e Jo-Anne, faahitihia i te tumu parau matamua, i te haapii i te Bibilia e te mau Ite no Iehova. “Ua maere au e ma te faaau i te tahi noa mau faaueraa tumu aore ra faatiaraa o te mau Papai, e pinepine to reira noa te pahonoraa,” ta Steven ïa e parau ra. “Hou vau a haapii ai i te Bibilia, aita hoê aˈe i faaite mai i te tereraa o te haapiiraa. Ua oaoa roa vau i te iteraa e aita e faufaa ia riro te Bibilia ei aimârôraa hopea ore e ei faataaraa i te mau manaˈo tuati ore.”

Te manaˈo atoa ïa o Valvanera. “E tuati pauroa te mau mea e mea tano maitai,” ta ˈna ïa e parau ra. “Ua haapii au e eiaha e tiaturi i te mau mea no te mea noa na te Ekalesia e parau ra, no te mea râ e faataaraa au noa to te mau mea atoa.” Te faatia ra Jo-Anne: “No te mea ua pahonohia ta ˈu mau uiraa atoa e te Bibilia, ua î au i te faatura rahi no te Fatu o teie buka, i te mea e ua faanaho ê na oia e ia papaihia te pahonoraa tano i te uiraa atoa a te taata.”

Ua matau anei outou i te hoê Ite no Iehova? E nehenehe outou e ani ia ˈna ia faataa ˈtu i te tereraa o teie porotarama haapiiraa. Aita anaˈe, a papai na i te hoê o te mau vahi nohoraa i te api 2 o teie vea. Maoti te varua moˈa o te Atua, te hoê feruriraa farii e te tauturu a te hoê orometua haapii aravihi i te Bibilia, eita te Parau a te Atua e riro ei buka fifi no outou. E nehenehe hoi outou e maramarama i te Bibilia!

[Nota i raro i te api]

[Tumu parau tarenihia/Hohoˈa i te api 8]

 Pahonoraa tano i te tahi mau uiraa bibilia

Teie te tahi mau tumu parau ta te mau Ite no Iehova e hiˈopoa i roto i ta ratou porotarama haapiiraa bibilia:

• Eaha te opuaraa a te Atua no te fenua?

• Teihea te feia pohe?

• Te ora ra anei tatou i te “anotau hopea”?

• No te aha te Atua e faatia ˈi i te mauiui?

• E nafea to ˈu oraraa utuafare e oaoa ˈi?

[Hohoˈa i te api 7]

No te maramarama i te Bibilia . . . a pure no te ani i te varua o te Atua, a taio ma te feruriraa farii, a farii i ta vetahi ê tauturu