Te hoê tiaturiraa i parare

“I moemoeâ ino na vau i te ura i roto i te po! I moemoeâ na vau e ua hurihia vau i roto i te hoê vahi auahi ura e e ara mai au ma te auê. Aita e faufaa ia parau e ua tutava vau i te ore e hara.”—Arline.

TE TIATURI ra anei oe e e vahi haamauiuiraa te po no te feia hara? O ta e rave rahi ïa e tiaturi. Ei hiˈoraa, ua itehia mai e te hoê aivanaa no te fare haapiiraa tuatoru no Saint Andrews i Ekosia e ua tiaturi hoê i nia i te toru o te pûpû ekalesiatiko Ekosia e e mauiui te feia i faataa ê ia ratou i te Atua i te “ahoaho mure ore i roto i te po.” Ua tiaturi hoê i nia i te pae e e mauiui te feia i roto i te po i te haamauiuiraa pae tino.

I e rave rahi fenua, e mea matauhia te tiaturiraa i te po. Ei hiˈoraa, i te Hau Amui, i te hoê uiuiraa manaˈo ravehia i 2007 ua itehia e fatata e 70 % o te taata i uiuihia te tiaturi ra i te po. I te mau fenua atoa aita te rahiraa o te taata e tâuˈa roa ra i te haapaoraa, te tiaturi râ ratou i te po. I te hoê uiuiraa manaˈo ravehia i 2004 i Kanada, e 42 % o te taata tei tiaturi i te po. E i Beretane, e 32 % tei papu e te vai ra iho â te reira.

Ta te pûpû ekalesiatiko e haapii

E rave rahi o te pǔpǔ ekalesiatiko tei faaea i te haapii e e vahi haamauiuiraa mau iho â te po. Te turu ra râ ratou i te hoê â huru tatararaa itehia i roto i te Catéchisme de l’Église catholique neneihia i 1992. “Te utua matamua o te po,” ta tera papai ïa e parau ra, “o te faataa-ê-raa mure ore ïa i te Atua.”

Noa ˈtu râ, te tiaturi noa ra e rave rahi taata e e vahi haamauiuiraa pae tino aore ra pae varua te po. Te faahua parau ra te feia e paturu ra i teie huru haapiiraa e ua niuhia taua haapiiraa ra i nia i te Bibilia. Te na ô ra Albert Mohler, peretiteni no te haapiiraa perepitero teologia Baptiste no Apatoa: “E tupuraa noa te reira o te Papai.”

No te aha e mea faufaa ˈi ta oe e tiaturi?

Mai te peu e e vahi haamauiuiraa mau iho â te po, e mea papu e e riaria oe i te reira. Teie râ, mai te peu e e mea hape tera haapiiraa, ua faatupu ïa te mau aratai haapaoraa e haapii ra i te reira i te taa ore e te ahoaho faufaa ore i te feia e tiaturi ia ratou. E ua faaino atoa ratou i te Atua.

Eaha ta te Parau a te Atua, te Bibilia, e parau ra no nia i te reira? E faaohipa te mau tumu parau i muri nei i te mau huriraa bibilia Katolika e Porotetani atoa no te pahono i na uiraa e toru: (1) Eaha te tupu mau i nia i te hoê taata ua pohe anaˈe? (2) Eaha ta Iesu i haapii no nia i te po? (3) E nafea te haapiiraa i te parau mau no nia i te po e ohipa ˈi i nia ia oe?