E haafatata ˈtu i te Atua

“Te Atua no ˈna anaˈe te mahanahana”

Korinetia 2, 1:3, 4

E RAVE rahi mea i roto i te oraraa—te mauiui, te inoino, te moemoe—te nehenehe e hopoi mai i te peapea, e te hepohepo rahi atoa. I taua mau taime ra, e uiui paha oe, ‘Ihea vau e nehenehe ai e ite mai i te tauturu?’ Te haamahitihiti ra te mau parau a Paulo i roto i te Korinetia 2, 1:3, 4 i te hoê tumu tamahanahanaraa aita e faaauraa—te Atua ra o Iehova.

I roto i te irava 3 (MN), te parauhia ra te Atua “te Metua o te aroha [piri].” Eaha ïa te auraa? E tuea te taˈo Heleni hurihia e “aroha piri” i te aumihi e noaa mai no te mau mauiui o vetahi ê. * Te parau ra te hoê papai bibilia e e nehenehe e hurihia teie parau ei “haapeapea” aore ra “haapao-rahi-raa.” Na te “aroha piri” o te Atua e turai ra ia ˈna ia ohipa. Eita anei te iteraa i te reira tuhaa o te huru o te Atua e turai ra ia tatou ia haafatata ˈtu ia ˈna?

Te faahiti atoa ra Paulo ia Iehova mai “te Atua no ˈna anaˈe te mahanahana.” Te faaohipa ra Paulo i ǒ nei i te hoê taˈo o te faaô mai i “te manaˈo tamahanahanaraa i te hoê taata e ahoaho ra aore ra e oto ra e te raveraa i te tahi mea o te tauturu aore ra o te faaitoito ia ˈna.” Te faataa ra te hoê buka tatararaa Bibilia: “E tamahanahana tatou i te hoê taata e mauiui ra ia faaitoito tatou ia ˈna ia faaoromai i to ˈna mauiui.”—The Interpreter’s Bible.

E ui paha oe, ‘E nafea te Atua e tamahanahana ˈi ia tatou e e horoa mai ai i te itoito no te faaoromai i te mauiui?’ Mea na roto iho â râ i ta ˈna ra Parau, te Bibilia, e te ô o te pure. Te na ô maira Paulo e te horoa mai ra te Atua i ta ˈNa ra Parau ma te here ‘ia noaa to tatou tiairaa, i te mahanahana o te parau i papaihia ra.’ Hau atu â, na roto i te mau pure haavare ore, e nehenehe e noaa mai ia tatou “te hau o te Atua, o tei hau ê atu i te ite taata nei.”—Roma 15:4; Philipi 4:7.

I nia i teihea faito e tamahanahana ˈi Iehova i to ˈna nunaa? Te parau ra Paulo e e ‘haamahanahana mai te Atua ia tatou i to tatou mau pohe atoa nei.’ (Korinetia 2, 1:4) Noa ˈtu eaha te faaheporaa, te hepohepo, aore ra te mauiui ta tatou e faaruru paha, e nehenehe te Atua e horoa mai i te itoito e te puai hinaarohia no te faaoromai atu. E ere anei te reira i te mea mahanahana?

Aita te aroha o te Atua i taotiahia i te hoê noa taata. Te parau faahou ra Paulo e te tamahanahana ra te Atua ia tatou ia ‘tia ia tatou ia haamahanahana i te feia i roohia i te pohe,’ aore ra ati, ‘i te mahanahana a te Atua i mahanahana ˈi tatou iho nei.’ I te mea e ua tamahanahanahia tatou i roto i to tatou mau ati, e tauturu ïa te reira ia tatou ia aumauiui ia vetahi ê e e turai ia tatou ia tauturu i te feia e hinaaro ra.

E ere i te mea e o Iehova te “Atua no ˈna anaˈe te mahanahana” te auraa e e faaore oia i to tatou mau fifi aore ra mauiui. E nehenehe râ tatou e papu i teie: Ia fariu tatou ia ˈna ra no te tamahanahana mai, e nehenehe oia e haapuai ia tatou ia faaruru i te mau oto e ati atoa o ta te oraraa e faatupu mai. E mea tano iho â ïa ia haamori e ia pure tatou i taua Atua aroha ra.

[Nota i raro i te api]