Uiraa a te feia taio

E vai noâ anei te fenua?

Eita to tatou paraneta fenua e haamouhia e te hoê ati rahi. No te aha tatou e nehenehe ai e papu i te reira? No te mea te fafau ra te Atua e ‘e ore roa te fenua e aueue [e a muri noa ˈtu].’ (Salamo 104:5; MN) Noa ˈtu e ‘te itea maira te tahi ui e te ore nei te tahi,’ ta te Bibilia ïa e parau ra, “e vai te fenua e a muri noa ˈtu.”—Koheleta 1:4, New International Version.

Te haamahitihitihia ra te vai-noa-raa o te fenua e na taˈo e piti i faaohipahia i roto i te reo Hebera tumu o te Salamo 104:5—ʽoh·lamʹ no “roa” e ʽadh no “e a muri noa ˈtu.” E nehenehe e hurihia ʽoh·lamʹ e “e rave rahi matahiti” aore ra “vai tamau.” Ia au i te hoê titionare a Harkavy (Students’ Hebrew and Chaldee Dictionary), te auraa o ʽadh, oia hoi te “roaraa, mure ore, tau otia ore, e a tau a hiti noa ˈtu.” Te faaite ra teie na taˈo Hebera e piti i te papu-roa-raa o te vai-noa-raa o te fenua. A hiˈo na ïa e toru atu â tumu niuhia i nia i te Bibilia no te tiaturi e e vai noa te fenua e a muri noa ˈtu.

A tahi, ua hamani te Atua i te fenua ia taatahia—ia ruperupe, ia riro mai ei paradaiso oaoa, eiaha râ ei fenua ano. Te faataa ra te Isaia 45:18 ia Iehova mai “tei hamani i te mau raˈi ra; oia te Atua: o tei rave i te fenua e na ˈna i hamani; e na ˈna hoi i haamau: aitâ râ oia i hamani ia vaiiho-taata-ore-noa-hia, ua hamani râ oia ia taatahia.”

A piti, ua fafau te Atua e e parahi te taata e faaroo ia ˈna e a muri noa ˈtu i nia i te fenua i roto i te hau. Te fafau ra te Mika 4:4 e: “E parahi . . . ratou o te taata atoa i raro aˈe i to ratou vine, e i raro aˈe i ta ˈna iho suke, e aore roa e taata e haamǎtaˈu mai ia ratou: o te vaha hoi o Iehova sabaota ra, tei parau mai.” No reira, ia au i te opuaraa a te Atua, e vai noa ïa te fenua e a muri noa ˈtu ei faaearaa no te huitaata, aita anaˈe e faufaa ore ïa ta ˈna mau parau fafau.—Salamo 119:90; Isaia 55:11; Ioane 1, 2:17.

A toru, ua horoa te Atua i te ohipa atuaturaa i teie fenua i te taata. “Te mau raˈi ra, na Iehova ïa mau raˈi; area te fenua nei, ua horoa mai oia i te reira na te tamarii a te taata nei,” ta te Parau a te Atua ïa e parau ra. (Salamo 115:16) E nehenehe anei outou e feruri i te hoê metua tane î i te here o te horoa nei i te hoê ô nehenehe roa i ta ˈna tamarii e o te faaino atu i te reira ô? Eita roa ˈtu! Hoê â huru, eita roa ˈtu Iehova e rave i te tahi noa ˈˈe mea i te fenua e i te feia e parahi ra i nia iho, no te mea ‘e aroha te Atua.’—Ioane 1, 4:8.

Te haapapu ra Iesu Mesia i te reira no nia i to ˈna Metua ma te parau e: “O to parau na te parau mau.” (Ioane 17:17) Te fafau ra te Atua, o te ore e tia ia haavare e: “E parahi te feia parau-tia i nia i te fenua, e parahi tamau â ratou i reira.”—Salamo 37:29; Tito 1:2.

[Faaiteraa i te fatu o te hohoˈa i te api 32]

Fenua: Based on NASA photo