Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Titema 2015

 AAMU

Ua ite au i te hau e te Atua e e to ’u mama

Ua ite au i te hau e te Atua e e to ’u mama

UA PARAU mai to ’u mama: “No te aha aita oe e haamori i to oe mau tupuna? Aita oe i taa e maoti ratou i ora mai ai oe? Aita anei oe e hinaaro e faaite i to oe mauruuru ia ratou? No te aha oe e haapae ai i te mau peu tumu i horoahia e te mau u‘i i mairi. Ma te ore e faahanahana i to tatou mau tupuna, te auraa ïa e e mea maamaa ta tatou haamoriraa.” I muri a‘e a parau ai i te reira, ua haamata mama i te ta‘i.

Tau ava‘e noa na mua ’‘e i te reira, ua ani te mau Ite no Iehova i to ’u mama ia haapii i te Bibilia. Aita oia i hinaaro e haapii. Ma te faatura râ, ua faanaho oia ia haapii ratou ia ’u. E i muri iho, ua riri roa oia ia ’u, e ere i tei matauhia e au, no te mea ua auraro noa vau ia ’na. No to ’u râ hinaaro e faaoaoa ia Iehova, i tera taime, aita vau i faaroo ia ’na. E ere i te mea ohie, ua horoa mai râ Iehova i te itoito.

MA TE HAAPII NO NIA IA IEHOVA

E feia haamori to ’u utuafare ia Bouddha, mai te rahiraa o te taata i Tapone. E piti râ ava‘e i muri iho i ta ’u haapiiraa Bibilia e te mau Ite no Iehova, ua papu ia ’u e e mea mau iho â ta te Bibilia e parau ra. I to ’u haapiiraa e e Metua to ’u i te ra‘i, ua hinaaro iho â vau e ite o vai mau â oia. I te taime matamua, ua oaoa roa mâua mama i te paraparau no nia i ta ’u i haapii. Ua haamata vau i te haere i te mau putuputuraa o te Piha a te Basileia i te Tapati. A haere noa ’i ta ’u haapiiraa i mua, ua ani au ia mama e te hinaaro nei au e faaea i te haere i te mau oroa e ravehia ra no Bouddha. Taui oioi atura to ’na haerea. Ua parau oia: “Mea haama, ia ore hoê o te utuafare e here i to tatou mau tupuna.” Ua parau oia ia ’u ia faaea i te haapii i te Bibilia e i te haere i te mau putuputuraa. Aita roa ’tu vau i mana‘o e e na ô mai mama i te parau! E au ra e e taata ê roa oia.

Ua farii papa i to mama mana‘o. Ua haapii au i roto i te Ephesia pene 6 e te hinaaro ra Iehova ia auraro vau i to ’u na metua. Ua hinaaro vau ia ite faahou to ’u utuafare i te hau e ua mana‘o vau e ia faaroo vau ia raua, e faaroo atoa mai raua i to ’u mana‘o. I tera taime, mea titauhia ia faaineine au i ta ’u hi‘opoaraa haapiiraa, e no na ava‘e e toru, ua farii au i ta to ’u na metua i parau mai. Tera râ, ua euhe au ia Iehova e e apiti faahou vau i te mau putuputuraa ia oti na ava‘e e toru.

E ere râ ta ’u faaotiraa i te mea tano. Teie na tumu e piti. A tahi, ua mana‘o vau e ia oti na ava‘e e toru, te vai noa ra te hinaaro puai e tavini ia  Iehova. Aita râ, ua haamata to ’u taairaa e o ’na i te iti oioi mai. Te piti, ua tutava noa mama raua papa ia faaea iho â vau i te tavini ia Iehova.

TE TAUTURU E TE PATOIRAA

I te Piha a te Basileia, ua farerei au e rave rahi Ite no Iehova o tei patoihia e to ratou utuafare. Ua haapapu mai ratou e e faaitoito mai Iehova ia ’u. (Mat. 10:34-37) Ua faataa mai ratou ia ’u e ia vai taiva ore au ia Iehova, e nehenehe to ’u utuafare e haapii no nia ia ’Na. Ua hinaaro vau e tiaturi ia Iehova, e ua haamata vau i te pure ma te u‘ana.

Ua patoi mai to ’u utuafare ma te mau ravea rau. Ua taparuparu mama ia faaea vau i te haapii i te Bibilia a tamata ’i i te haaferuri ia ’u. I te rahiraa o te taime, ua mamû noa vau. Ia faaite au i to ’u mana‘o, e pinepine mâua i te tatama‘i no te mea e tamata mâua i te haapapu to vai mana‘o te mea tano. I teie nei, ua taa ia ’u e ahani au i faatura ’tu â i to mama mau huru aau e mana‘o, e mǎrû mai atu â ïa te tupuraa. Ua horoa rahi mai to ’u na metua i te ohipa ia faaea vau i te fare. I te tahi mau taime, ua tamau raua i te opani ia faaea vau i rapae i te fare aore ra aita raua i vaiiho mai i te maa.

Ua ani mama ia vetahi no te faataui i to ’u mana‘o. Ua paraparau oia i ta ’u orometua, aita râ te reira i tupu. Ua afai mama ia ’u i ta ’na paoti ohipa no te turai ia ’u ia tiaturi e mea faufaa ore te mau haapaoraa atoa. Ua taniuniu atoa mama i to matou mau fetii a ta‘i noa ’i oia no te taparu i ta ratou tauturu. Ua riri roa vau. Teie râ, i te mau putuputuraa, ua haamana‘o mai te mau matahiapo ia ’u e i to mama paraparauraa ia vetahi ê i to matou tupuraa, te poro atoa ra oia ma te ite ore.

 Ua hinaaro to ’u na metua ia haere au i te haapiiraa teitei ia nehenehe au e imi i te hoê ohipa. No te mea, ua riri matou pauroa, eita e nehenehe e tauaparau no nia i te reira na roto i te mǎrû. Ua papai ïa vau e rave rahi rata na raua no te faataa ’tu i ta ’u mau opuaraa. Ua hae roa papa a parau atu ai: “Mai te peu e e mana‘o oe e e noaa iho â ia oe i te hoê ohipa, a haere e imi ananahi aore ra e faarue oe i teie fare.” Ua ani au i ta Iehova tauturu na roto i te pure. I te mahana i muri iho, a poro ai au, ua ani mai e piti tuahine ia haapii au i ta raua mau tamarii. Aita to ’u papa i au i te reira. Ua faaea ïa papa i te paraparau ia ’u e ua haamata oia i te ore e tâu‘a ia ’u. Ua parau mai mama e mea au a‘e na ’na ia riro vau ei taata ohipa ino, eiaha râ ei Ite no Iehova.

Ua tauturu te reira ia ’u ia maitai atu â to ’u mana‘o e ia ite eaha te rave

I te tahi mau taime, aita vau i papu e ua hinaaro anei Iehova ia patoi vau i to ’u na metua mai tera. No reira vau i pure ai ia Iehova e i feruri maite ai i nia i ta te Bibilia e parau ra no nia i to ’na here. Ua tauturu te reira ia ’u ia maitai atu â to ’u mana‘o e ia taa e i patoi ai to ’u na metua, no to raua ïa hepohepo no ’u. Ua tauturu mai Iehova ia ’u ia faaafaro i to ’u huru feruriraa e ia ite eaha te rave. Oia atoa, hau atu â vau i te haere e poro, rahi atu â vau i te au i te reira. E, ua hinaaro iho â vau e riro ei pionie.

TE TAVINIRAA EI PIONIE

A faaroo ai te tahi mau tuahine e ua hinaaro vau e riro mai ei pionie, ua parau mai ratou ia ’u e mea titauhia ia tiai au ia mǎrû mai to ’u na metua. Ua pure au no te fana‘o i te paari, ua rave au i te mau maimiraa, ua feruri au i te mau tumu i hinaaro ai au e riro ei pionie, e ua tauaparau vau i te mau taeae e tuahine aravihi. Ua faaoti ïa vau e faaoaoa ia Iehova. Ua taa atoa ia ’u, noa ’tu e tiai au tau taime hou a riro mai ai ei pionie, e nehenehe to ’u na metua e patoi mai ia ’u.

Ua haamata vau i te rave i te taviniraa pionie i te taime hopea o ta ’u haapiiraa tuarua. I muri a‘e a riro mai ai ei pionie, ua opua vau e haere i roto i te tahi vahi e hinaaro-rahi-hia ra te tauturu. Aita râ papa raua mama i hinaaro ia faarue au i te fare. Ua tiai ïa vau i te 20raa o to ’u matahiti. Ua ani au i te amaa ia haere au e poro i te pae Apatoa piri noa ’tu i to ’u mau fetii, ia ore mama e haapeapea rahi.

I te roaraa o ta ’u taviniraa, ua oaoa roa vau i te ite e rave rahi o ta ’u mau piahi Bibilia tei bapetizohia. Ua haamata vau i te haapii i te reo Beretane no te mea ua hinaaro vau e horoa rahi atu â i roto i ta ’u taviniraa. I muri iho, i to ’u iteraa i te itoito o na pionie taa ê e piti i roto i ta ’u amuiraa e e mea nafea raua i te tautururaa ia vetahi ê, ua faaoti au e riro mai ei pionie taa ê. I te roaraa o tera taime, e piti taime a ma‘ihia mama i te hoê ma‘i ino mau. E ia taimehia, e ho‘i au i te fare no te tauturu ia ’na e ua maere roa oia. E ua maitai atu â to ’u mama i nia ia ’u.

E RAVE RAHI HAAMAITAIRAA NO Ǒ MAI IA IEHOVA RA

E hitu matahiti i muri a‘e, ua hapono mai Atsushi, hoê o na pionie taa ê o ta ’u i faahiti na, i te hoê rata. Ua anaanatae oia i te faaipoipo e ua ani mai oia eaha to ’u mana‘o no nia ia ’na. Aita roa ’tu to ’u e mana‘o faahinaaro no Atsushi, e aita atoa vau i ite eaha to ’na mana‘o no nia ia ’u. Hoê ava‘e i muri a‘e, ua pahono atu vau ia ’na e ua hinaaro vau e ite maitai atu â no nia ia ’na. Ua taa ia mâua e ua tuea ta mâua mau fa. Ua hinaaro mâua e tamau i te tavini ei pionie taime taatoa e ua ineine mâua i te farii i te hopoia atoa. E ua faaipoipo mâua. Ua oaoa roa vau e ua haere mai mama, papa e te tahi atu mau fetii i to mâua faaipoiporaa.

Népal

Tau taime i muri a‘e, a tavini ai mâua ei pionie tamau, ua maitihia o Atsushi ei mono tiaau haaati. I muri a‘e, ua titauhia ia mâua ia riro ei pionie  taa ê e i muri iho ia rave i te taviniraa haaati ma te tamau. A oti ai te mau amuiraa atoa i te farereihia i roto i ta mâua tuhaa haaati no te taime matamua, ua taniuniu mai te amaa ia mâua. Ua ani mai ratou e ua ineine anei mâua i te haere i te fenua Népal a faaea noa ’i mâua i roto i te tuhaa haaati.

Ua haapii rahi au no nia ia Iehova a tavini ai i roto e rave rahi fenua

Ua haapeapea roa vau i te mana‘o o to ’u na metua ia haere atea vau. I to ’u taniuniuraa ia raua, ua pahono mai to ’u papa: “E haere orua i te hoê vahi nehenehe mau.” Hoê hebedoma na mua ’tu, ua horoa hoê o to ’na hoa i te hoê buka no nia ia Népal e ua mana‘o papa e e vahi nehenehe tera no te haere e mataitai.

Ua oaoa roa mâua i rotopu i te mau hoa no Népal. I muri a‘e, ua tuu-atoa-hia mai te fenua Bangladesh i roto i ta mâua tuhaa haaati. Noa ’tu mea piri roa ia Népal, mea taa ê roa râ i ǒ. Ua ite mâua e rave rau huru taviniraa. I muri a‘e e pae matahiti, ua tonohia mâua i te fenua Tapone, e te oaoa nei mâua i roto i teie tuhaa haaati.

Ua haapii rahi au no nia ia Iehova a tavini ai i Tapone, Népal e i Bangladesh. Mea taa ê te ta‘ere e te mau peu tumu a te feia o tera fenua. Mea taa ê roa te tahi taata i te tahi taata. Ua ite au mea nafea Iehova i te aupururaa i te taata taitahi, i te fariiraa, i te tautururaa e i te haamaitairaa ia ratou.

E rave rahi tumu e haamauruuru ai au ia Iehova. Ua farii oia ia ite au o vai o ’na e ia rave i ta ’na ohipa. Ua horoa mai oia i te hoê tane Kerisetiano maitai. Ua tauturu mai Iehova ia ’u ia rave i te mau faaotiraa maitai. E i teie nei, e taairaa maitai to ’u e o ’na e e to ’u utuafare. Mauruuru ia Iehova, ua riro faahou mâua mama ei hoa maitai. Te haamauruuru nei au e ua ite au i te hau e te Atua e e to ’u mama.

Ua oaoa roa mâua i roto i te tuhaa haaati