Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Titema 2015

Te hoê huriraa o te Parau a te Atua ohie ia taa

Te hoê huriraa o te Parau a te Atua ohie ia taa

“E mea ora . . . te parau a te Atua.”—HEB. 4:12.

HIMENE: 37, 116

1. (a) Eaha te hopoia ta te Atua i horoa ia Adamu? (b) Mai reira mai, mea nafea te nunaa o te Atua i faaohipa ’i i te ô o te parau?

UA HOROA te Atua ra o Iehova i te taata te ô o te parau. I roto i te ô i Edene, ua horoa te Atua i te hopoia ia Adamu, te horoaraa ïa i te i‘oa a te mau animara atoa. Ua horoa Adamu i te i‘oa e auraa to te reira no te mau animara taitahi. (Gen. 2:19, 20) Mai reira mai, ua faaohipa te nunaa o te Atua i te ô o te parau no te arue ia Iehova e no te faaite ia vetahi ê no nia ia ’na. Aita i maoro a‘enei, ua faaohipa te nunaa o te Atua i teie ô no te huri i te Bibilia ia nehenehe hau atu â taata e haapii no nia ia Iehova.

2. (a) Eaha te mau faaueraa tumu faufaa ta te mau melo o te Tomite Huriraa i te Bibilia a te ao apî e pee ra i roto i ta ratou ohipa? (b) Eaha ta tatou e hi‘opoa mai i roto i teie tumu parau?

2 Te vai ra e tausani huriraa Bibilia. Mea tano a‘e râ te tahi huriraa Bibilia i te tahi atu. No te huri i te Bibilia ma te tano, ua faaoti te Tomite Huriraa i te Bibilia a te ao apî ia pee i na faaueraa tumu faufaa e toru: (1) Ia faahanahanahia to te  Atua i‘oa e ia faaohipahia te reira i roto i ta ’na Parau e rave rahi taime mai te reo tumu. (A taio i te Mataio 6:9.) (2) Ia huri-maite-hia te poroi o te reo tumu, te mau pereota atoa mai te peu e e nehenehe. Mai te peu râ aita e nehenehe, a huri i te auraa tano. (3) Ia faaohipahia te hoê parau mea ohie ia taio e ia taa. * (A taio i te Nehemia 8:8, 12.) Ua pee te feia huri o te Huriraa i te Bibilia a te ao apî i teie na faaueraa tumu faufaa e toru na roto hau atu 130 reo taa ê. I roto i teie tumu parau, e hi‘opoa ana‘e e nafea teie mau faaueraa tumu faufaa e faaohipahia ’i no te neneiraa faaapîhia o te Huriraa o te ao apî tei matara i 2013 e te huriraa o te reira na roto i te tahi atu mau reo.

TE HOÊ BIBILIA O TE FAAHANAHANA RA I TO TE ATUA I‘OA

3, 4. (a) Te itehia ra na reta Hebera e maha ihea? (b) Eaha ta te rahiraa huriraa Bibilia i rave no nia i te i‘oa o te Atua?

3 Ua papaihia te i‘oa o te Atua ma na reta Hebera e maha. Ua itehia taua mau reta ra i roto e rave rahi papai Hebera tahito mai te mau otaro o te miti Pohe. Te vai atoa ra te reira i roto i te tahi mau papai, te Septante, na roto i te reo Heleni i neneihia e 200 matahiti hou te Mesia e tae atu i 100 matahiti i muri a‘e i te Mesia. Ua maere roa te rahiraa o te taata i to ratou iteraa e e rave rahi taime i itehia ’i te i‘oa o te Atua i roto i te mau papai tahito.

Ua maere roa te rahiraa o te taata i to ratou iteraa e e rave rahi taime i itehia ’i te i‘oa o te Atua i roto i te mau papai tahito

4 Mea titauhia ia itehia te i‘oa o te Atua i roto i te Bibilia. Noa ’tu râ, e rave rahi huriraa aita e faaohipa ra i te reira. Ei hi‘oraa, piti matahiti noa i muri a‘e i te papairaahia te Bibilia Les Écritures grecques chrétiennes. Traduction du monde nouveau, ua matara mai te hoê neneiraa faaapîhia o te American Standard Version. I 1901, ua faaohipa te American Standard Version i te i‘oa o te Atua. Area râ te neneiraa faaapîhia o te American Standard Version o tei matara i 1952, aita ïa. No te aha? No te feia o tei huri i te reira, “e ere i te mea tia” ia faaohipa i te i‘oa o te Atua. Ua na reira atoa e rave rahi huriraa, na roto i te reo Beretane e na roto atoa i te tahi atu mau reo.

5. No te aha mea faufaa ia faaohipa i te i‘oa o te Atua i roto i te Bibilia?

5 E mea faufaa anei ia faaohipa te feia huri i te i‘oa o te Atua aore ra aita? E! Te hinaaro ra Iehova, te Tumu o te Bibilia, ia ite te taata i to ’na i‘oa. E titauhia i te hoê taata huri maitai ia taa eaha ta te hoê taata papai e hinaaro ra a mana‘o atu ai e e nehenehe te reira e ohipa ’i i nia i ta ’na mau faaotiraa i te pae o te huriraa. E rave rahi irava Bibilia o te faaite ra e e mea faufaa te i‘oa o te Atua e e mea tia ia faahanahanahia te reira. (Exo. 3:15; Sal. 83:18;  148:13; Isa. 42:8; 43:10; Ioa. 17:6, 26; Ohi. 15:14) Ua faaurua Iehova i te mau taata papai Bibilia ia faaohipa i to ’na i‘oa tausani taime i roto i te mau papai tahito. (A taio i te Ezekiela 38:23.) No reira, ia tatara te feia huri i te i‘oa o te Atua, aita ratou e faatura ra ia Iehova.

6. No te aha ua tuuhia te i‘oa o te Atua i na vahi e ono i roto i te Huriraa o te ao apî o tei hi‘opoa-faahou-hia?

6 I teie mahana, e rave rahi atu â haapapuraa o te faaite ra e e mea tia ia faaohipahia to Iehova i‘oa. I roto i te Bibilia Huriraa o te ao apî faaapîhia o tei matara i 2013, e 7 216 taime i te faaohiparaahia te i‘oa o te Atua, oia hoi e 6 atu â vahi te tuuraahia te reira ia faaauhia te huriraa tahito. E 5 o te reira, ua tuuhia te i‘oa o te Atua no te mea ua itehia te reira i roto i te mau otaro o te miti Pohe * o tei nenei-apî-hia. E itehia te i‘oa o te Atua i teie na vahi e pae i roto i te Samuela 1, 2:25; 6:3; 10:26; 23:14, 16. E te ono, ua tuuhia i roto i Te mau tavana 19:18 no te tahi hi‘opoa-maite-raa o te mau papai tahito Bibilia papu.

7, 8. Eaha te auraa o te i‘oa o Iehova?

7 No te mau Kerisetiano mau, e mea faufaa ia taa maitai i te auraa o te i‘oa o te Atua, oia hoi “Na ’na e faariro.” * I na mua ’‘e, ua faataa ta tatou mau papai i te auraa o te i‘oa o te Atua a faaohipa ’i i te Exodo 3:14 o te na ô ra: “Te vai nei au o vau e vai nei.” Ua faataa te Bibilia o tei faaapîhia e tei matara i 1984 e e faariro Iehova ia ’na ia au i tei hinaarohia no te faatupu roa i ta ’na mau opuaraa. * Teie râ, te faataa ra te Bibilia faaapîhia o tei matara i 2013: “Aita râ te i‘oa ra Iehova i taai-noa-hia i ta ’na e maiti i te riro. E faariro atoa oia i te melahi e te taata mai ta ’na atoa e hinaaro ia riro ratou ia tupu ta ’na opuaraa.”

8 Ua faariro Iehova i ta ’na i poiete mai ta ’na e hinaaro. Ei hi‘oraa, ua faariro te Atua ia Noa ei taata hamani i te araka, ia Bezaleela ei taata rimaî aravihi, ia Gideona ei aito rahi e ia Paulo ei mitionare. E auraa mau râ to te i‘oa o te Atua no to ’na nunaa. No reira ïa te Tomite Huriraa i te Bibilia a te ao apî i tuu ai i te i‘oa o te Atua i roto i teie huriraa.

9. Eaha te hoê tumu e haafaufaahia ’i te huriraa o te Bibilia na roto i te tahi atu mau reo?

9 E rave rahi atu â huriraa Bibilia o tei tatara i to te Atua i‘oa. Ua faaohipa râ ratou i te tiaraa i‘oa “fatu” aore ra te i‘oa o te tahi atu atua. Teie hoê tumu faufaa i hinaaro rahi ai te Tino aratai ia fana‘o te taata o te mau reo atoa i te hoê Bibilia o te faahanahana ra i to te Atua i‘oa. (A taio i te Malaki 3:16.) No reira, te faahanahanahia ra to Iehova i‘oa i roto i te mau neneiraa o te Huriraa o te ao apî na roto hau atu 130 reo.

TE HOÊ HURIRAA TAA-MAITAI-HIA E TE MEA PAPU

10, 11. Eaha te tahi mau fifi i itehia a hurihia ’i te Bibilia Huriraa o te ao apî na roto i te tahi atu mau reo?

10 Ua itehia te tahi mau fifi a hurihia ’i te Bibilia Huriraa o te ao apî mai te reo  Beretane i te tahi atu mau reo. Ei hi‘oraa, ua faaohipa te neneiraa reo Beretane i te ta‘o Hebera “Sheol” i roto i te Koheleta 9:10 e i roto i te tahi atu mau irava. Ua faaohipa atoa te tahi atu mau Bibilia Beretane i tera ta‘o. Aita râ e nehenehe e faaohipa i teie ta‘o i roto i e rave rahi reo no te mea aita te rahiraa o te feia taio o teie mau reo e taa ra i te ta‘o Hebera “Sheol.” Aita teie ta‘o i roto i ta ratou mau titionare e no vetahi, o te i‘oa teie o te hoê vahi. No reira, ua fariihia te feia huri ia huri i te ta‘o Hebera “Sheol” o te tuea i te ta‘o Heleni “Hades” ei “apoo.” E huriraa papu teie e te mea ohie a‘e ia taa.

11 Mea fifi atoa ia huri i te ta‘o Hebera e Heleni ei “varua” na roto i te tahi mau reo. I roto i teie mau reo, te auraa o te ta‘o “varua,” o te hoê ïa tupapau aore ra te hoê varua o tei haere i rapae i te hoê tino pohe o te hoê taata. Ia ore te reira e fifihia, ua farii te feia huri ia huri i te ta‘o “varua” ia au i te tupuraa. Te itehia ra te hoê faataaraa o te mau auraa rau o te ta‘o “varua” i roto i te appendice o te Bibilia Les Saintes Écritures. Traduction du monde nouveau (avec notes et références). Ua tuuhia te mau nota i roto i te neneiraa o te Bibilia faaapîhia no te ite atu â no nia i te mau ta‘o Hebera e Heleni ia taio-maitai-hia e ia taa-maitai-hia te tumu parau Bibilia.

Ua hi‘opoahia e tausani uiraa a te feia huri Bibilia i te roaraa o te hi‘opoa-faahou-raa

12. Eaha te tahi atu mau tauiraa i ravehia i roto i te Bibilia no 2013 tei hi‘opoa-faahou-hia?

12 Ua haapapu te mau uiraa a te feia huri i te tahi atu mau taa-ore-raa o te mau papai tumu Bibilia. No reira i Tetepa 2007, ua  farii te Tino aratai ia hi‘opoa-faahou-hia te Bibilia Beretane. E tausani uiraa a te feia huri Bibilia tei hi‘opoahia i te roaraa o teie ohipa. Ua tauihia te mau parau mea tahito ma te mau parau mea matauhia i teie mahana. Mea ohie a‘e ia taio e ia taa i te Bibilia a tapea-noa-hia ’i te tanoraa. E ere i te mea maoro, ua tauturu atoa te huriraa i rave-a‘ena-hia na roto i te tahi atu mau reo no te haamaitai i te Bibilia Beretane.—Mas. 27:17.

TE MAURUURU RAHI

13. Eaha te mana‘o o vetahi no nia i te Bibilia no 2013 tei faaapîhia?

13 Eaha te mana‘o o vetahi no nia i te Bibilia Beretane te Huriraa o te ao apî tei faaapîhia? Ua hapono mai to tatou mau taeae e tuahine e tausani rata ei tapao no to ratou mauruuru i te pu rahi a te mau Ite no Iehova no Brooklyn, i New York. Ua tuea te mana‘o o te rahiraa o ratou i ta te hoê tuahine i papai: “E afata piru te Bibilia o tei î i te mau tao‘a faahiahia mau. Ia taiohia te mau parau a Iehova ma te ohie e ma te faaohipa i te Bibilia no 2013 tei faaapîhia, e nehenehe te reira e faaauhia i te hi‘opoaraa i te mau piru atoa, ma te hi‘opoa i te huru, te maramarama, te û e te nehenehe o te reira. Ua faaite te mau Papai i te hoê parau ohie ia taa e o tei tauturu ia ’u ia riro mai ei taata matau-a‘e-hia e Iehova, mai te hoê papa o te tauahi ra ia ’u a taio mai ai oia i ta ’na mau parau.”

14, 15. Eaha te mana‘o o te taata no nia i te Huriraa o te ao apî na roto i te tahi atu mau reo?

14 Ua mauruuru atoa te feia o te paraparau ra na roto i te tahi atu mau reo ê i te reo Beretane no te Bibilia Huriraa o te ao apî. Ua parau te hoê taata ruhiruhia no Sofia, i Bulgarie no nia i te Bibilia Bulgarie: “Ua taio vau i te Bibilia e rave rahi matahiti. Tera râ, a tahi ra vau i taa ’i i te hoê huriraa mea ohie a‘e ia taa. Ua putapû roa to ’u aau.” Ua papai atoa te hoê tuahine no Albanie: “Mea faahiahia roa te Parau a te  Atua na roto i te reo Albanie! Auê te fana‘oraa taa ê ia paraparau mai Iehova ia matou na roto i to matou reo!”

15 I roto i te rahiraa fenua, mea moni aore ra mea fifi roa ia fana‘o i te hoê Bibilia. E haamaitairaa rahi ia fana‘o tatou i te hoê Bibilia! Te na ô ra te hoê faaiteraa no Rwanda: “Aita te taata e rave rahi o tei haapii i te Bibilia e te mau taeae i haere i mua i te pae varua no te mea aita ta ratou e Bibilia. Aita ta ratou e nehenehe e hoo mai i te Bibilia a te ekalesia. I te tahi taime, aita ratou e taa maitai i te auraa o te tahi mau irava. Ua haafifi te reira ia ratou ia haere i mua i te pae varua.” A matara mai ai te Huriraa o te ao apî na roto i to ratou reo, ua parau te hoê utuafare no Rwanda e maha tamarii taurearea ta raua: “Ua mauruuru roa vau ia Iehova e i te tavini haapao maitai e te paari i te fana‘oraa i teie Bibilia. Mea veve roa matou e aita ta matou e moni no te hoo mai i te mau Bibilia no te mau melo utuafare atoa. I teie nei râ, e Bibilia ta matou taitahi. No te faaite i to matou mauruuru ia Iehova, e taio amui matou i te Bibilia i te mau mahana atoa.”

16, 17. (a) Eaha ta Iehova e hinaaro ra no to ’na nunaa? (b) Te titauhia ra ia tatou ia faaitoito i te rave i te aha?

16 E fana‘o te mau reo atoa i mua nei i te Bibilia te Huriraa o te ao apî tei faaapîhia. Te tamata ra Satani e tapea i teie ohipa. Ua ite râ tatou e te hinaaro ra Iehova ia faaroo to ’na nunaa atoa ia paraparau oia ia ratou na roto i te hoê parau mea papu e mea ohie ia taa. (A taio i te Isaia 30:21.) Fatata ‘e î te fenua i te ite ia Iehova, mai te vairaa miti e î i te miti.’—Isa. 11:9.

17 Ia faaitoito ana‘e i te faaohipa i te mau ô atoa ta Iehova i horoa, oia atoa teie huriraa Bibilia o te faahanahana ra i to ’na i‘oa. A vaiiho ia ’na e paraparau ia oe i te mau mahana atoa na roto i ta ’na Parau. E faaroo maite oia i ta tatou mau pure atoa. E tauturu mai teie aparauraa ia ite atu â o vai Iehova e e rahi atu â to tatou here no ’na.—Ioa. 17:3.

“Auê te fana‘oraa taa ê ia paraparau mai Iehova ia matou na roto i to matou reo!”

^ par. 2 A hi‘o i te tumu parau “Comment choisir une bonne traduction de la Bible?” i roto i Te Pare Tiairaa o te 1 no Me 2008 (Farani).

^ par. 6 Ua hau atu 1 000 matahiti to te mau otaro o te miti Pohe i te mau papai Hebera a te mau Massorètes.

^ par. 7 Ua faataa atoa te tahi mau buka faahororaa i te reira, aita râ pauroa te feia îite e farii.

^ par. 7 A hi‘o Les Saintes Écritures. Traduction du monde nouveau (avec notes et références), appendice 1A “Le nom divin dans les Écritures hébraïques,” api 1676.