Ki taina tali‵tonu:

E pelā mo te mea ko iloa ne koutou, a te Tusi Tapu se tusi eiloa e uiga ki tino. E tokouke mai i ei ne tāgata mo fāfine fakamaoni kae ne fakafesagai atu ki tulaga faiga‵ta kolā e tai ‵pau mo mea ne fe‵paki mo tatou. Ne maua ne latou a “lagonaga e penei eiloa mo tatou.” (Iakopo 5:17) Ne loto vāi‵vai a nisi tino ona ko fakalavelave mo mea e manava‵se latou ki ei. Kae ko nisi tino ne logo‵mae malosi mai i olotou kāiga io me mai taina tapuaki. Kae e tokouke a tino ko puapuaga eiloa i olotou lagonaga ma‵sei ona ko olotou mea ‵se ne fai.

E mata, ko oti eiloa ne tiakina katoatoa ne tino penā a Ieova? Ikai. E fai eiloa a tino e tokouke e pelā mo te faisalamo telā ne ‵talo atu: “Au e takasese pelā me se mamoe ko galo; tela la, vau o ‵sala ake au, tau tavini me seki tiakina eiloa ne au au tulafono.” (Salamo 119:176) E a, e tai ‵pau mo ou lagonaga?

E se mafai o puli i a Ieova ana tino tapuaki kolā e takase‵se atu kea‵tea mai te lafu. E ‵kese mai i ei, e taumafai eiloa a ia o fanatu ki a latou—e masani o fai penā e auala i olotou taina tali‵tonu. Mafaufau ki te auala ne fesoasoani atu ei a Ieova ki tena tavini ko Iopu, telā ne fe‵paki mo mea faiga‵ta e uke—e aofia i ei a te ‵galo atu o ana tupe, ana tino pele, kae maua ne ia se masaki matagā. Ne kufaki foki a Iopu i pati fakalogo‵mae mai i a latou kolā ne ‵tau o fesoasoani atu ki a ia. Kae ne seki fulitua atu eiloa a ia ki a Ieova, faitalia me ne tai takasese a ia i ana mafaufauga mō se taimi. (Iopu 1:22; 2:10) Ne fesoasoani atu pefea a Ieova ke toe maua ne Iopu se kilokiloga paleni?

Ne fesoasoani atu eiloa a Ieova ki a Iopu e auala i se taina talitonu e igoa ki a Eliu. I te taimi ne fakaasi atu ei ne Iopu tena manavase, ne fakalogologo atu a Eliu kae ne fakamalosi aka ei tou tagata ke faipati atu. Ne ana muna? E mata, ne fakamasei ne ia a Iopu io me e taumafai ke fakamalosi atu mai te fakaaoga o pati fakamasei io me ko pati fakama? E mata, ne mafaufau a Eliu me e maluga atu a ia i a Iopu? E se taitai eiloa! Ona ko te fakamalosi aka ne te agaga o te Atua, ne fai atu ei a Eliu: “A tāua e ‵pau i mua o te Atua, a tāua ne faite katoa mai i te ‵pefu.” Tela la, ne fakatalitonu atu a ia penei ki a Iopu: “E se ‵tau mo koe o mataku mai ki a au; e se ta ne au a koe.” (Iopu 33:6, 7) I lō te fakaopoopo atu ki te amoga ‵mafa a Iopu, ne tuku atu eiloa ne Eliu mo te alofa a pati fakatonutonu mo fakamalosiga kolā ne manakogina ne Iopu.

E fakamolemole atu foki ke iloa ne koe me tenā foki eiloa te agaga ne fakatoka ei ne matou a te polosiua tenei. Muamua la, e fakalogo‵logo matou, mai te mafaufau faka‵lei ki fakanofonofoga mo lagonaga o tino e tokouke kolā ne tapea‵pea atu kea‵tea. (Faataoto 18:13) Ka oti, ko ‵suke ei matou ki te Tusi Tapu fakatasi mo ‵talo, ke sukesuke ki tala e uiga ki te auala ne fesoasoani atu ei a Ieova i te taimi ne fe‵paki ei ana tavini i aso ko ‵teka, mo fakanofonofoga tai ‵pau mo ‵tou fakanofonofoga. Oti aka loa, ne tuku fakatasi ne matou a tala konā mai te Tusi Tapu mo tala i aso nei ke fakatoka ei te polosiua tenei. E ‵kami atu eiloa ne matou koe mo te alofa ke sukesuke faka‵lei aka ki fakamatalaga konei. Masaua me e a‵lofa tonu matou ki a koe.

Te Potukau Pule o Molimau a Ieova