A te Potukau Pule se tamā potukau o Kelisiano ma‵tua ‵lei faka-te-agaga kolā e tuku mai ne latou a fakatakitakiga ki Molimau a Ieova i te lalolagi kātoa. E lua a vaega o te lotou galuega:

•   E onoono latou ki te fakatokaga o akoakoga faka-te-Tusi Tapu e auala i tusi, fakatasiga, mo akoga a Molimau a Ieova.—Luka 12:42.

•   E tausi ne latou te galuega talai a Molimau a Ieova i te lalolagi kātoa mai te faiga ne latou o te takitakiga i te galuega talai mo te onoono faka‵lei ki te fakaaogaga o meaalofa.

 E tau‵tali atu a te Potukau Pule ki te fakatokaga ne fai ne “te kau apositolo mo toeaina i Ielusalema” i te senitenali muamua, kolā ne fai ne latou a fakaikuga tāua mō te fakapotopotoga Kelisiano kātoa. (Galuega 15:2) E pelā mo tāgata fakamaoni konā, a sui o te Potukau Pule e se ne takitaki o te motou fakapotopotoga kātoa. E ‵kilo atu latou ki te Tusi Tapu ke takitaki ki ei latou, kae iloa ne latou me ne ‵tofi aka ne Ieova te Atua a Iesu Keliso ke fai mo fai te Ulu o te fakapotopotoga.—1 Kolinito 11:3; Efeso 5:23.

Ko oi a sui o te Potukau Pule?

 A sui o te Potukau Pule ko Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, mo Jeffrey Winder. E tavini atu latou i te motou laumua i Warwick, New York, Amelika.

E fakatoka pefea a te Potukau Pule?

 Ne fakatoka ne te Potukau Pule a komiti e ono ke onoono ki vaega kese‵kese o te ‵tou galuega, kae e tavini atu a sui takitasi i se komiti e tasi io me lua.

•   Komiti o Kouotineita: E tausi ne latou a mea tau tulafono kae ‵saga fakavave atu latou ki fakalavelave ‵tupu, mea ‵tupu ki Molimau a Ieova kolā e fakasauagina ona ko olotou talitonuga fakalotu, penā foki mo nisi mea tāua kolā e pokotia i ei a Molimau a Ieova.

•   Komiti o Tino Ga‵lue i Ofisa: E onoono latou ki te fakatokaga o tino i te kāiga Peteli.

•   Komiti ‵Lomi Tusi: E tausi ne latou te ‵lomiga mo te lafoatuga o tusi faka-te-Tusi Tapu, te faitega o fale tapuaki, ofisa ‵fulitusi mo ofisa lagolago.

•   Komiti o te Galuega Talai: E onoono latou ki te ˋtou galuega ko te talaiatuga o te “tala ‵lei o te Malo.”—Mataio 24:14.

•   Komiti o Akoakoga: E fakatonutonu ne latou a te fakatokaga o akoakoga faka-te-agaga kolā e tuku mai i fakatasiga, akoga, mo polokalame fakalogo‵logo mo vitio.

•   Komiti Tusi Tusi: E fakatonutonu ne latou a te faiga o akoakoga faka-te-agaga kolā e maua e auala i tusi mo te motou fakatuatusi i te itaneti kae onoono foki ki galuega ‵fulitusi.

 I tafa o olotou galuega e auala i komiti konei, e maopoopo foki a te Potukau Pule i vaiaso takitasi ke mafau‵fau ki manakoga o te fakapotopotoga kātoa. I fono konei, e sau‵tala a sui ki mea e fai mai i te Tusi Tapu, kae talia ne latou ke takitaki latou ne te agaga tapu o te Atua, kae taumafai malosi ke lotoma‵lie fakatasi a latou katoa ki se fakaikuga.—Galuega 15:25.

Ko oi a taina fesoasoani ki te Potukau Pule?

 A latou konei ko Kelisiano fakatalitonugina kolā e fesoasoani atu i komiti a te Potukau Pule. (1 Kolinito 4:2) E maua ne latou te malosi mo te atamai i te galuega telā e tausi ne te komiti e ga‵lue latou i ei, kae ‵kau atu foki latou ki fono a te komiti i vaiaso katoa. E tiga eiloa e se aofia latou i te faiga o fakaikuga, e tuku mai ne taina konei a pati fakatonutonu mo fakamatalaga aoga, e fakagalue ne latou a fakaikuga a te komiti, kae onoono foki latou ki ikuga o mea konā. E mafai foki o ‵tofi aka latou ne te Potukau Pule ke āsi atu ki te motou kautaina i koga kese‵kese o te lalolagi io me fai ne latou a lāuga i maopoopoga ‵lasi e pelā mo te fono tausaga io me ko te pukegā pepa i Kiliata.