Levitiko 21:1-24
21 Ne fai atu a Ieova ki a Mose: “Faipati atu ki te kau faitaulaga, ki tama tāgata a Alona, kae fai atu ki a latou, ‘E seai se tino e ‵tau o fakalailai ne ia a ia eiloa ona ko te tino mate mai i ana tino.+
2 Kae e mafai o fai ne ia te mea tenā ki sena kāiga pili, ki tena mātua, tena tamana, tena tama tagata, tena tama fafine, tena taina,
3 kae e mafai o fakalailai ne ia a ia eiloa ona ko tena tuagane māfai a tou fafine se tamafine ‵ma telā e pili ki a ia kae e seki avaga.
4 E se ‵tau o fakalailai ne ia a ia eiloa kae fai ne ia ke masiasi a ia ona ko te fafine telā e isi sena avaga mai i ana tino.
5 E se ‵tau o fai ne latou ke ‵tula+ olotou ulu io me ‵vele a feitu e lua o olotou talafa io me katikati olotou foitino.+
6 E ‵tau o tapu latou i te kilokiloga a te lotou Atua+ kae e se ‵tau o fakamasei ne latou te igoa o te lotou Atua,+ me e ofo atu ne latou a taulaga a Ieova kolā e ‵sunu ki te afi, ko meakai a te lotou Atua, kae e ‵tau o tapu+ latou.
7 E se ‵tau latou o a‵vaga ki se fafine talitāgata,+ se fafine telā ko oti ne fakalailaigina, io me se fafine ko oti ne ‵tala tena avaga,+ me i te faitaulaga e tapu i te kilokiloga a tena Atua.
8 E ‵tau mo koe o faka‵malu a ia,+ me e ofo atu ne ia a meakai a tou Atua. E ‵tau o tapu a ia i tau kilokiloga, me i a au, Ieova, te tino telā e faka‵malu ne ia koutou, e tapu.+
9 “‘Kafai e fakamasiasi ne se tama fafine a se faitaulaga a ia eiloa mai te fai pelā me se fafine talitāgata, ko fakamasiasi foki ne ia tena tamana. E ‵tau eiloa o ‵sunu a ia ki te afi.+
10 “‘A te faitaulaga sili i ona taina, telā ne ‵ligi atu ki luga i tena ulu a te sinu mo faū+ a tino kae ne fakasopo ko te mea ke pei ki gatu o faitaulaga,+ e se ‵tau o tuku tena ulu ke makosukosu io me saesae ana gatu.+
11 E se ‵tau o fakapilipili atu a ia ki se tino mate;+ e se ‵tau o fakalailai ne ia a ia eiloa faitalia me ko tena tamana io me ko tena mātua.
12 E se ‵tau o fano a ia ki tua mo te faleie tapu kae e se ‵tau o fakamasei ne ia a te koga tapuaki o tena Atua,+ me ko i luga i a ia a te fakailoga o te tukuatuga, telā ko te sinu o tena Atua+ mo faū a tino. Au ko Ieova.
13 “‘E ‵tau o avaga a ia ki se tamafine ‵ma.+
14 E se ‵tau o avaga a ia ki se fafine ko mate tena avaga, se fafine ne ‵tala tena avaga, se fafine telā ko oti ne fakalailaigina, io me se fafine talitāgata; kae e ‵tau o avaga a ia ki se tamafine ‵ma.
15 E se ‵tau o fakamasiasi ne ia tena tama i mua o ana tino,+ me i a au ko Ieova telā e faka‵malu ne au a ia.’”
16 Ne toe faipati atu a Ieova ki a Mose, ana muna:
17 “Fai atu ki a Alona, ‘E seai se tagata mai i au tama i olotou kautama katoa telā e isi sena pona e ‵tau o fakapilipili mai ki a au o ofo atu a meakai a tena Atua.
18 So se tagata telā e isi sena pona e se ‵tau o fakapilipili mai: se tagata ‵kivi io me e ‵pili io me pakia tena isu io me se isi pona i tena foitino,
19 se tagata e fati tena vae io me fati tena lima,
20 e piko tena tua io me toetoe io me se tagata e masei tena mata io me magiso tena pa‵kili io me lafā io me pa‵kia ana koga tapu.+
21 E seai se tagata mai i tama a Alona te faitaulaga telā e isi sena pona e ‵tau o fakapilipili atu ke ofo ne ia a taulaga ki a Ieova kolā e ‵sunu ki te afi. Ona ko te mea e isi sena pona, e se ‵tau o fakapilipili atu a ia o ofo atu a meakai a tena Atua.
22 E mafai o kai a ia ki meakai a tena Atua mai toe mea tafasili i te tapu+ mo mea tapu.+
23 Kae e se ‵tau a ia o vau ki tafa o te ‵pui laugatu,+ kae e se ‵tau a ia o fakapilipili atu ki te fatafaitaulaga,+ me e isi sena pona; kae e se ‵tau o fakamasei ne ia a toku koga tapuaki+ me i a au ko Ieova telā e faka‵malu ne au a latou.’”+
24 Ne faipati atu eiloa a Mose ki a Alona mo ana tama tāgata mo tino Isalaelu katoa.
