KAFAI e fakafesagai atu koe io me ko sou tino pele mo se masaki telā e iku fakamuli atu ki te mate, e iloa ne koe a te faigata o te mea tenā. E se gata fua i te masaki, kae ka fakafesagai atu koe mo te loto mafatia mo te manavase. A te faiga o asiga ki tokita, te faigata ke maua io me ke ‵togi a togafiti fakatokita, io me ko pokotiaga sē ‵lei mai vailakau, e mafai o fakamāfua ne ia te mataku mo te manavase. E mafai ne te masaki matagā mo te sē toka o te mafaufau ke manavase malosi ei se tino.

Tefea te koga e mafai o maua ne tatou i ei se fesoasoani? Ne maua ne te tokoukega a te fakamafanafanaga sili mai te fakalagolago ki te Atua i ‵talo kae fai‵tau ki fuaiupu fakamafanafana loto kolā e maua i te Tusi Tapu. A te suā fesoasoani e mafai o maua e auala i te alofa mo te ‵lago mai o kāiga mo taugasoa.

“Ke fakafesagai atu ki masaki fakatasi mo te fakatuanaki ki te Atua,” ko pati fakatonutonu a te toeaina ko Robert telā ko 58 ana tausaga, “kae ka fesoasoani mai a ia ke kufaki koe. Fanatu ki a Ieova i ‵talo. Fai ke iloa ne ia ou lagonaga. Fakamolemole atu ki a ia mō te agaga tapu. Fakamolemole atu ki a ia ke tuku mai te malosi ke fakamalosi ne koe tou kāiga kae ke kufaki i tou masaki.”

“Ko oko eiloa i te tāua māfai e ‵lago atu tou kāiga ki a koe i mea tau lagonaga, māfai e toka latou o fesoasoani atu ki a koe. Ne telefoni mai se tokotasi io me se tokolua ki a au i aso katoa kae ‵sili mai, ‘E a mai koe?’ E maua ne au a fakamalosiga e uke mai oku taugasoa kolā e ‵nofo i koga kese‵kese. E mautinoa eiloa me fakamalosi faeloa ne latou au, kae fesoasoani mai ke mo a e ‵fiu vave au.”

Kafai koe se taugasoa telā e asi atu ki se tino masaki, onoono aka la ki pati a Linda: “E mautinoa eiloa me manako te tino masaki ke maua ne ia te malosi ‵lei, kae e se manako a ia o faipati e uiga ki tena masaki. Tela la, ke sau‵tala e uiga ki mea kolā e masani o faipati sāle koe ki ei.”

Fakatasi mo te malosi mai te Atua mo fakamafanafanaga mai te Tusi Tapu, e pelā foki mo te fesoasoani a‵lofa mai kāiga mo taugasoa, ko mafai ei o fakatumau ne tatou a te loto tali‵tonu me e isi eiloa se aoga o te olaga faitalia me e kufaki tatou i se masaki matagā.