“E mafai o foliga fakafi‵ta mai a te Tusi Tapu,” ko muna a se talavou e igoa ki a Will, “māfai e se iloa ne koe te auala tonu ke faitau ki ei.”

E mata, e fia iloa ne koe te auala ke mafai o fiafia koe i tau faitauga ki te Tusi Tapu? E mafai o fesoasoani atu te mataupu tenei ki a koe.

•  Ke fakafoliga ‵tonu a tala i te Tusi Tapu

•  Ke iloilo faka‵lei!

•  Pati a ou taugasoa

Fai ke aofia koe i au mea e faitau. E mafai o fakaaoga ne koe te auala tenei:

1. Filifili se tala i te Tusi Tapu telā e fia sukesuke koe ki ei. E mafai o filifili ne koe se tala io me se fuaiupu i te Tusi Tapu mai i se tusi Evagelia, io me se tala mai i faitauga fakamalosi loto ki te Tusi Tapu kolā e maua i te jw.org.

2. Faitau te tala. E mafai o faitau tokotasi koe ki ei io me e fai‵tau ki luga fakatasi mo taugasoa io me ko tino o te kāiga. E mafai o faitau ne se tino a vaega o te tino fakamatala, kae ko nisi tino e mafai o fai‵tau ne latou a vaega o nisi tino kolā e aofia i te tala.

3. Tofotofo ki se mea e tasi io me uke mai manatu fesoasoani konei:

   • ‵Lomi a ata ke fakamatala mai i ei te tala. Io me se fakasologa o tamā ata faigofie kolā e fakamatala mai i ei a mea ne ‵tupu. Tusi ne fakamatalaga i tafa o ata ke fakaasi mai i ei a mea ne ‵tupu i taimi takitasi.

   • Tusi ki lalo te auala e ‵soko tasi ei a mea. E pelā mo te mea tenei, kafai ko oti ne faitau koe e uiga ki se tino fakamaoni, ke tusi ki lalo te auala e ‵soko tasi ei ana uiga mo faifaiga ki fakamanuiaga ne maua ne ia.

   • ‵Fuli te tala ki se tala fakasalalau. Ke lipoti atu a mea ne ‵tupu mai feitu kese‵kese, kae ke “fakasau‵tala” foki a tino ne aofia i ei mo latou kolā ne molimau ki ei.

   • Kafai se tino i te tala ne fai ne ia se fakaikuga sē ‵lei, mafaufau ki se fakaotiga tai ‵kese. E pelā mo Petelu, ne fakafiti ne ia a Iesu. (Maleko 14:66-​72) Ne mafai pefea o saga atu a Petelu ki te tulaga tenā i se auala tai ‵lei atu?

   • Kafai e manako koe ke tai uke atu au mea e fai, ke tofotofo o tusi sau tala totino telā e fakavae ki se tala i te Tusi Tapu. Ke aofia i ei a akoakoga kolā e mafai o tauloto mai te tala tenā.​—Loma 15:4.

Kafai e iloilo aka a fakamatalaga likiliki, e mafai o maua ne koe a taemani ‵funa i se tala. A te ‵tonuga loa, i nisi taimi, e tāua ‵ki eiloa se pati e tasi io me lua i se tala i te Tusi Tapu.

E pelā mo te mea tenei, fakatusa te Mataio 28:7 ki te Maleko 16:7.

•   Kaia ne aofia ne Maleko a te fakamatalaga likiliki me ko pili o fakasae atu a Iesu ki ana soko, “mo Petelu”?

• Manatu tonu: Ne seki molimau atu a Maleko ki mea konei ne ‵tupu; e manino ‵lei, me ne maua ne ia ana fakamatalaga mai i a Petelu.

• Taemani ‵funa: Kaia ne ‵tau ei o maua ne Petelu a te loto fiafia i te logoga me e manako a Iesu ke toe fetaui lāua? (Maleko 14:66-​72) Ne fai pefea a Iesu mo fai se taugasoa tonu ki a Petelu? E mafai pefea o fakaakoako atu koe ki a Iesu kae fai mo taugasoa tonu ki nisi tino?

Kafai e fakafoliga ‵tonu ne koe i tou mafaufau au mea e faitau i te Tusi Tapu kae iloilo faka‵lei a fakamatalaga likiliki i ei, ka gasolo aka loa o gali tau faitauga ki te Tusi Tapu!