Te Tusi a Maleko 14:1-72

  • Aofaga a faitaulaga ke tamate a Iesu (1, 2)

  • Ko ‵ligi atu se sausau ki luga i a Iesu (3-9)

  • Ko fakatogafiti ne Iuta a Iesu (10, 11)

  • Te ‵toe Paseka (12-21)

  • Te kamataga o te ‵Kaiga a te Aliki i te Afiafi (22-26)

  • Ko ‵valo mai te fakafitiga a Petelu (27-31)

  • Ko ‵talo a Iesu i Ketesemane (32-42)

  • Ko puke fakapagota Iesu (43-52)

  • Ko fakamasino i mua o te Sanetulini (53-65)

  • Ko fakafiti ne Petelu a Iesu (66-72)

14  E toe lua aso+ kae fai te Paseka+ mo te ‵Kaiga Fiafia o Falaoa sē Faka‵fete.+ Kae ne salasala a faitaulaga pule mo failautusi ki se togafiti ke puke ne latou a Iesu ke tamate,+ 2  me ne fai aka latou penei: “E se ‵tau o fai te mea tenā i te aso o te fakamanatuga i te mea ma fakatupu ei ne tino se fakalavelave.” 3  Kae koi kai* a ia i te fale o Simona te lepela i Petania, ne fanatu se fafine mo se fagu* sinu manogi ne faite mai te tinā nato, kae ‵togi ‵mafa ‵ki. Ne ‵tala ne ia te fagu sinu kae kamata o ‵ligi atu ki luga i te ulu o Iesu.+ 4  Ona ko te mea tenei ne fai aka a nisi tino o latou mo te sē fia‵fia: “Kaia ne fakamāumāu ei te sinu manogi tenei? 5  Me ne mafai o fakatau atu a te sinu manogi tenei ki tupe e silia atu i te 300 tenali,* ko tuku atu ei a tupe ki tino ma‵tiva!” Kae ne kaitāua malosi latou ki* tou fafine. 6  Kae ne fai atu a Iesu: “Tuku malie ei a ia. Kaia e taumafai ei koutou o fakalavelave atu ki te fafine tenei? Ne fai ne ia se mea ‵lei ki a au.+ 7  Me e ‵nofo faeloa koutou mo tino ma‵tiva,+ kae mafai o fai ne koutou a mea ‵lei ki a latou i so se taimi e ma‵nako koutou ki ei, kae ko au e se ‵nofo faeloa mo koutou.+ 8  Ko fai ne ia a te mea e mafai ne ia o fai. Ne ‵ligi ne ia a te sinu manogi ki toku foitino kae koi tuai au o tanu.+ 9  Au e fai ‵tonu atu ki a koutou, i so se koga o te lalolagi e talai atu ei te tala ‵lei tenei,+ ka fakamatala atu foki i ei a te mea ne fai ne te fafine tenei e pelā me se fakamasauaga ki a ia.”+ 10  Kae ne fanatu a Iuta te Isikaliota, se tokotasi mai te toko Sefululua, ki faitaulaga pule ke fakatogafiti ne ia a Iesu kae ke tuku atu ki a latou.+ 11  I te lagonaga ne latou a te mea tenā, ne fia‵fia malosi latou kae tauto ke tuku atu ki a ia a tupe siliva.+ Tenā ne kamata ei o ‵sala tou tagata ki se avanoaga ‵lei ke fakatogafiti ei a ia. 12  I te aso muamua o te ‵kaiga o Falaoa sē Faka‵fete,+ ko te taimi e masani o ofo atu i ei ne latou se manu mo fai te taulaga o te Paseka,+ ne fai atu ana soko ki a ia: “Tefea te koga e manako koe ke fakatoka ne matou ke kai koe i ei i te Paseka?”+ 13  Ne uga atu ne ia ana soko e tokolua kae fai atu ki a lāua: “Olo ki loto i te fakai kae ka fetaui koulua mo se tagata e amo ne ia se tiā vai. Tau‵tali i a ia,+ 14  kae ko so se fale e ulu a ia ki ei fai atu ki te matai o te fale, ‘Muna a te Faiakoga: “Tefea te potu talimalo telā ka ‵kai ei au mo oku soko i te Paseka?”’ 15  Kae ka fakaasi atu ne ia ki a koulua se potu lasi i luga telā e toka a mea katoa i ei. Fakatoka la mō tatou.” 16  Ne olo a soko konei kae oko atu ki te fakai, kae ne maua atu ne lāua a mea katoa kolā ne fai atu ne ia, fakatoka ei ne lāua mō te Paseka. 17  I te afiafi po, olo atu ei a ia mo te toko Sefululua.+ 18  Kae koi saga‵saga latou i te taipola o ‵kai, ne fai atu a Iesu: “Au e fai ‵tonu atu ki a koutou, e tokotasi i a koutou telā e ‵kai fakatasi māua ka fakatogafiti ne ia a au.”+ 19  Ne kamata o fanoa‵noa ana soko kae fai atu latou taki tokotasi ki a ia: “E a, ko au?” 20  Ne fai atu a ia ki a latou: “Se tokotasi mai te toko Sefululua, ko ia telā e ufi fakatasi mā falaoa ki loto i te pōla.+ 21  Me i te Tama a te tagata ka fano kea‵tea, e pelā eiloa mo mea ne tusi e uiga ki a ia, kae kalofa eiloa a te tagata telā e fakatogafiti ne ia te Tama a te tagata!+ E ‵lei atu moi ne seki fanau mai te tagata tenā.”+ 22  Kae koi ‵kai latou, ne puke ne Iesu se falaoa, fai te fakafetai, tofitofi kae tuku atu ki a latou, ana muna: “Puke; e fakauiga te mea tenei ki toku foitino.”+ 23  Ne puke a ia ki te ipu, fai ne ia te fakafetai kae tuku atu ki a latou, kae ne inu katoa latou ki ei.+ 24  Kae ne fai atu a ia ki a latou: “E fakauiga te mea tenei ki toku ‘toto+ o te feagaiga,’+ telā ka ‵ligi ki tua mō tino e tokouke.+ 25  Au e fai ‵tonu atu ki a koutou, ka se toe inu eiloa au ki te uaina tenei, ke oko eiloa ki te aso ka inu ei au ki te uaina fou i te Malo o te Atua.” 26  Fakamuli ifo, i te otiga ne usu ne latou a pese o vikiga,* olo ei latou ki te Mauga o Olive.+ 27  Kae ne fai atu a Iesu ki a latou: “Ka tiaki katoa ne koutou au, me e fai mai te tusi: ‘Ka tamate ne au te tausi mamoe,+ kae ka mafuta valevale a mamoe.’+ 28  Kae kafai ko toetu aka au, ka mua atu au i a koutou ki Kalilaia.”+ 29  Ne fai atu a Petelu ki a ia: “E ui eiloa e tiaki ne latou katoa konei a koe, kae ka se tiaki eiloa ne au a koe.”+ 30  Muna a Iesu ki a ia: “Au e fai ‵tonu atu ki a koe i te aso nei, ao, i te po eiloa tenei, koi tuai o tagi fakalua te moa, kae ko oti ne fakafiti fakatolu ne koe au.”+ 31  Kae ne fai atu faeloa a Petelu: “Kafai foki eiloa e ‵tau o ‵mate fakatasi tāua, ka se mafai lele eiloa o fakafiti ne au a koe.” Ne kamata foki o fai atu penā a nisi soko katoa.+ 32  Ne oko atu latou ki te koga e igoa ki Ketesemane, fai atu ei a ia ki ana soko: “‵Nofo i konei ke fano au o ‵talo.”+ 33  Kae ne puke ne ia a Petelu mo Iakopo mo Ioane ke olo latou,+ kae ne kamata a ia o mafatia malosi kae fi‵ta. 34  Ana muna ki a latou: “Ko mafatia malosi eiloa au+ ke oko ki te mate. ‵Nofo i konei kae ke matapula‵pula koutou.”+ 35  Ne tai momea atu a ia ki mua kae fakasiga ifo ki lalo kae kamata o ‵talo ko te mea ke se oko mai te itula tenā ki a ia, māfai e mafai. 36  Kae ne fai atu a ia: “Apa,* te Tamana,+ e mafai ne koe o fai a mea katoa; ave kea‵tea te ipu tenei mai i a au. Kae ke se fai te mea e manako au ki ei ka ko te mea e manako koe ki ei.”+ 37  Ne toe foki atu a ia ki ana soko kae maua atu ne ia a latou e ‵moe, fai atu ei a ia ki a Petelu: “Simona, a koe na e moe? E a, ko seai eiloa sou malosi o ‵pula i se itula e tasi?+ 38  Ke tumau i te matapula‵pula kae ‵talo faeloa, ko te mea ke se fakaosoosogina koutou.+ E manako ki ei te loto, kae ko vāivāi te foitino.”+ 39  Ne toe foki a ia o ‵talo, kae fai atu ana pati foki eiloa konā.+ 40  Ne toe foki mai a ia kae maua atu ne ia a latou e ‵moe, me ko se mafai eiloa o ‵pula olotou mata, kae ne seki iloa ne latou me ne a olotou pati e ‵tau o fai atu ki a ia. 41  Ne toe fanatu a ia ki a latou i te tolu o taimi, ana muna ki a latou: “A koutou e ‵moe kae malō‵lo i se vaegā taimi penei! Ko lava! Ko oko mai te itula!+ Kiloke! Ko fakatogafiti te Tama a te tagata kae ka tuku atu ki lima o tino agasala. 42  ‵Tu ki luga, ‵tou olo. Kiloke! A te tino ka fakatogafiti ne ia au ko pili mai.”+ 43  Kae koi faipati a ia, ne oko mai a Iuta, se tokotasi o te toko Sefululua, fakatasi mo te vaitino mo olotou pelu mo pago, ne uga mai ne faitaulaga pule mo failautusi mo toeaina.+ 44  Ko oti ne tuku atu ne te tino faitogafiti ki tino konā se fakailoga, ana muna: “A te tino e sogi au ki ei, ko ia tenā; puke atu a ia kae takitaki atu fakapagota.” 45  Kae ne fanatu ‵tonu a ia ki a Iesu kae fai atu, “Te Faiakoga!” sogi atu ei ki ei. 46  Tenā ne olo atu ei latou o puke a ia o ave fakapagota. 47  Kae ne tapale ne se tino e tokotasi i konā a tena pelu, ‵kati ei ne ia te taliga o te pologa a te faitaulaga sili, tō ei kea‵tea.+ 48  Ne fai atu a Iesu ki a latou: “A koutou na e o‵mai mo otou pelu mo pago o puke au e pelā me se tagata kaisoa?+ 49  I aso takitasi ne nofo faeloa au i te faletapu fakatasi mo koutou o akoako atu i ei,+ kae ne seki puke eiloa au ne koutou. Kae ko ‵tupu katoa a mea konei ke fakataunu ei a muna i Tusitusiga Tapu.”+ 50  Ne tiaki a ia ne latou katoa kae ‵tele kea‵tea.+ 51  Kae ne tautali fakapilipili atu ki a ia se tamataene e pulupulu ki se gatu lino ‵lei, kae ne taumafai latou o puke a ia, 52  kae ne tiaki ne te tamataene tenā a tena gatu lino ‵loa kae tele fuafua.* 53  Ne ‵taki atu ne latou a Iesu ki te faitaulaga sili,+ kae ne maopoopo mai katoa a faitaulaga pule mo toeaina mo failautusi.+ 54  Kae ne tautali atu a Petelu i a ia mai i se koga tai ‵mao, ke oko eiloa ki te koga ateatea i loto i te fale o te faitaulaga sili, kae ne saga‵saga fakatasi a ia mo tavini o te fale o fakavelavela i tafa o se afi.+ 55  Ko te taimi eiloa tenā ne salasala ei a faitaulaga pule mo tino katoa o te Sanetulini ki ne molimau e uiga ki a Iesu ko te mea ke tamate a ia, kae e seai ne olotou mau ne maua.+ 56  Ne tuku atu ne tino e tokouke a molimau sē ‵tonu e uiga ki a ia,+ kae e kese‵kese katoa olotou mau. 57  Ne ‵tu aka foki a nisi tino o tuku atu a molimau sē ‵tonu e uiga ki a ia, olotou muna: 58  “Ne lagona ne matou ana muna konei, ‘Ka lepe ne au ki lalo te faletapu tenei ne faite ne tino, kae ka toe fakatu aka ne au se isi faletapu i aso e tolu kae e se faite ne tino.’”+ 59  Kae ne kese‵kese faeloa olotou mau konā. 60  Tenā ne tu aka ei te faitaulaga sili i va o latou kae fesili atu ki a Iesu, ana muna: “E a, e seai sau tali? Ne a mea kolā e molimau mai ki ei a tino konei e uiga ki a koe?”+ 61  Kae ne seki faipati eiloa a ia kae seai sena tali ne fai.+ Ne toe fesili atu te faitaulaga sili ki a ia, ana muna: “A koe ko te Keliso te Tama a te Tino i o ia a Vikiga?” 62  Tenā ne fai atu ei a Iesu: “Ao ko au, kae ka lavea ne koutou a te Tama a te tagata+ e sagasaga i te feitu fakaatamai+ o te tino i o ia te malosi kae vau i kaumana o te lagi.”+ 63  Ne saesae ne te faitaulaga sili ana gatu kae fai atu: “Kaia e toe ‵sala ei tatou ki nisi molimau?+ 64  Ko oti ne lagona ne koutou ana muna ma‵sei e uiga ki te Atua. Se a te otou fakaikuga?”* Ne taku fakamasei ne latou katoa a ia me e ‵tau eiloa o fakasala a ia ki te mate.+ 65  Kae ne kamata o puapuaki a ia ne nisi tino,+ fakapulou atu ana mata, kae fusufusu ne latou a ia kae fai atu ki a ia: “Kafai koe se pelofeta, taku mai ki a matou me ko oi ne ta ne ia koe!” Ne laupāpā ana mata, puke ei a ia ne tavini o te fono famasino.+ 66  Kae koi nofo a Petelu i lalo i te koga ateatea kae ne vau se pologa fafine a te faitaulaga sili.+ 67  I te laveaga ne ia a Petelu e fakavelavela i tafa o te afi, ne kilo ‵tonu atu tou fafine ki a ia kae fai atu: “A koe foki ne ‵nofo mo Iesu te Nasaleta.” 68  Kae ne fakafiti a Petelu, ana muna: “E se iloa ne au a te tagata tenā kae e se malamalama foki au i te mea e faipati koe ki ei.” Tenā ne fano ei a ia ki tua. 69  Ne toe lavea a ia i konā ne te pologa fafine kae toe fai atu ki tino kolā e takatu‵tu i ana tafa: “Tenei te tino e tokotasi o latou.” 70  Ne toe fakafiti ne tou tagata te mea tenā. E seki leva, ne toe fai atu a tino kolā ne takatu‵tu i konā ki a Petelu: “E tonu eiloa, a koe se tino e tokotasi i a latou, me i a koe se tino Kalilaia.” 71  Kae ne kamata a ia o tauto atu: “Ke malaia eiloa au māfai au e loi! E se iloa ne au te tagata tenā e fai‵pati koutou ki ei!” 72  I konā foki eiloa ko te moa loa ko tagi i te lua o taimi,+ kae ne masaua ne Petelu a pati a Iesu ne fai atu ki a ia: “Koi tuai o tagi fakalua te moa, kae ko oti ne fakafiti fakatolu ne koe au.”+ Kae ne kamata o tagi mautuutu tou tagata.

Fakamatalaga mai lalo

^ Io me “fakapale i te taipola.”
^ Eleni, “fagu alapasa.”
^ Onoono ki te MF E14.
^ Io me “ne fai‵pati atu latou mo te kaitāua ki; ne kote ne latou.”
^ Io me “pese ‵lotu; salamo.”
^ Se pati i te ‵gana Epelu mo te ‵gana Alamaika telā e fakauiga ki “Te Tamana.”
^ Io me “e pei fua ki se gatu ‵tao loto.”
^ Io me “Se a te otou faka‵tau?”