Abanyakatagara bakatwara Yesu omu kikaali kya Pirato. Pirato akabakaguza ati: ‘Omusaija onu akozere musango ki?’ Bakamugarukamu bati: ‘Nayeyeta omukama!’ Pirato akakaguza Yesu ati: “Niiwe Mukama wa Bayudaya?” Yesu akamugarukamu ati: “Obukama bwange tibuli bw’omu nsi enu.”

Hanyuma Pirato akasindika Yesu mwa Herode, omulemi wa Galiraya nukwo arole obwaraaba aine omusango gwona. Herode nauwe akasanga Yesu ataine musango, hanyuma akongera yamusindika owa Pirato. Pirato akagambira abantu ati: ‘Nyowe na Herode tusangire omusaija onu ataine musango gwona. Nahabweki ningenda kumulekera agende.’ Abantu bakagamba bati: ‘Omwite! Omwite!’ Abaserikale bakatera Yesu embooko, kandi bamucwera ebicwanta. Bakamujweka ekondo y’amahwa ha mutwe kandi bamusekereza nibagamba ngu: ‘Siiba kurungi Omukama w’Abayudaaya.’ Pirato akongera yagambira abantu ati: ‘Omusaija onu taine musango.’ Baitu abantu bakatokera ha iguru nibagamba bati: “Muhanike ha muti.” Pirato akaikiriza abantu bagende baite Yesu.

Bakatwara Yesu omu kiikaro ekirukwetwa Gologosa kandi bamuhanika ha muti. Hanyuma, Yesu akasaba ati: ‘Taata, baganyire, habwokuba tibamanyire ekibarukukora.’ Abantu bakamusekereza nibagamba bati: ‘Obworaaba oli Mwana wa Ruhanga, ruga ha muti ogu, oyejune.’

Omu ha basaija abakaba bahanikirwe ha muti akagambira Yesu ati: ‘Olinyijuka obwolihika omu Bukama bwawe.’ Yesu nauwe akamuraganiza ati: “Oliba nanyowe omu nsi ya Ruhanga.” Omu bwire bwa nyamusana, hakaija omwirima ogw’amaani ogw’amazire esaaha isatu. Bamu ha begeswa otwaliremu na Malyamu nyina Yesu bakemerra haihi n’omuti Yesu akaba ahanikirweho. Yesu akagambira Yohana ngu arolerre Malyamu nka nyina.

Hakumalirra, Yesu akagamba: “Kihoire!” Akainamya omutwe gwe hanyuma yaikya ogw’okumalirra, y’afa. Omu kasumi ako, hakabaho omusisa ogw’amaani muno. Orutimbi orw’omu yekaru  orwayahukanizaaga Ekiikaro Ekirukwera hamu n’Ekirukwera Muno, rukatemuka. Omu ha baserikale akagamba: ‘Onu mali Mwana wa Ruhanga.’