Hanyuma ya Yesu kubonekera abakwenda, Petero akacwamu kugenda kutandika kusoha ha nyanja ya Galiraya. Abakwenda nka Tomasi, Yakobo, Yohana hamu n’abegeswa abandi bakamuhondera kandi bakasoha kuhikya obwire kukya batakakwasire encu yoona.

Obu bwakiire, nyenkyakara, bakarora omusaija ayemeriire ha musa gw’enyanja. Omusaija onu akatandika kubeta nabakaguza ati: ‘Haroho encu yoona ei mukwasirege?’ Bakamugarukamu bati: “Nangwa!” Omusaija akabagambira ati: “Munage ekisoha [ekitimba] ha rubaju orwobulyo orwobwato.” Obu banagire ekitimba omu maizi, kyona kikaijura encu nyingi muno kandi kyabalema n’okukisika kukita omu lyato. Yohana akamanyiraho ngu omusaija ogu akaba ali Yesu kandi yagamba ati: “Nuwe Mukama!” Aho n’aho, Petero akaguruka yagwa omu maizi kandi yaziha kugenda ha musa nambere Yesu akaba ali. Abegeswa abandi bakamuhondera n’elyato.

 Obu bahikire ha musa gw’enyanja, bakarora omugaati hamu n’encu biri ha murro. Yesu akabagambira bamuletere encu ezindi nukwo bazongere ha kiihuro. Hanyuma, akabagambira ati: ‘Mwije mulye ekyanyenkya kara.’

Obu bamazire kulya, Yesu akakaguza Petero ati: ‘Nongonza kukira kusoha?’ Petero akamugarukamu ati: ‘Ego Mukama wange, naiwe okimanyire ninkugonza.’ Yesu akamugambira ati: ‘Lisa entaama zange.’ Yesu akongera yamukaguza: ‘Petero, nongonza?’ Petero akamugarukamu ati: ‘Mukama wange, naiwe okimanyire.’ Yesu akamugambira ati: ‘Lisa entaama zange.’ Yesu akongera yamukaguza omurundi ogwakasatu. Petero akahurra kubi kandi yagamba ati: ‘Mukama wange, omanyire buli kimu. Naiwe okimanyire ninkugonza.’ Yesu akamugambira ati: ‘Lisa entaama zange.’ Hanyuma Yesu akagambira Petero ati: “Nkuratira.”